Kant kwaan mbill An
2
Zee lee An ngunii lo Dios nu nzhé:Chul doo nzhak lextoo na lo lu, Me Tubka Nak,
nel lu nzaa jwers lo na.
Zee nzho mod nii na lo re me nayii ne na,
nu nix doo nzhak na lo mod nle lu yud na.
2 Nyentra stub me mod lu, Me Tubka Nak;
nyentra stub me nak mod ke kwaan nsaaw kwenta lu, me nak Xtios be
nixa nyentra stub me mod lu.
3 Laa gu nawdizht gu kwaan yalxwa nu yiya;
nawdizht gu mod me non doo,
nel lee Me Tubka Nak, nak Dios, me ne rese kwaan
nu lee me naab kwent lo re kwaan nle myet.
4 Lee wez cheen re me ngezh doo ngoch.
Nu nzaa me jwers lo re me nales nzhak.
5 Lee re me mkano doo kwaan yat ndaw yilo,
lee nal nkin ke me zhiin zee zi me kwaan gaw me;
Lee re me bid doo mded lo yalnlaan,
lee nal nkano doo me kwaan gaw me.
¡Lee re ngwnaa me nit zan mad tub gazh welt!
Lee re me mkano zyen mad, lee nal nyentra jwers me.
6 Lee Me Tubka Nak nzaa yalnaban nu lee me nkiiba;
lee me ncheep be leen baa nu lee me koo be lo baa.
7 Me Tubka Nak nzaa yalrik nu yalprob,
lee me nle non re be nu nle nanont re be, nu nle me zee nla myet lo yo nu nlee me zee nyixche re myet stuba.
8 Dios nlep re me prob, me nla lo yo
nu ngoo me re me nales nzhak lo re kwaan nawent
nu zob me me lo re me non
nu nle me zee nzob me tub pa non doo.
Me Tubka Nak, nak xpixwann yizhyo
nu nzob me xana
nu loya mlek me re yezh.
9 Lee me nkanap re me nali nak lo me,
per lee re me nle kwaan nawent, lo yalnakaw nzhet me;
nel nik tub me nangezht kwaan leeka jwers cheen.
10 Me Tubka Nak le byog re me nayii ne me
nu axta yiba xaal me balngwzi la tich re me.
Me Tubka Nak naab kwent lo dubse yizhyo,
nu zaa me yalnabeyy lo rey, me mleyy me
nu le naro me yalnabeyy lo me mle nzhul me.
11 Zee lee Elcana mbare garli naz Ramá nu lee mad mlake mke zhiin lo Xaa Tubka Nak tubka kwaan Li, xaa nak ngwleyy.
Jwalt cheen rop xgann Li
12 Lee rop xgann Li nak xaa nle kwaan nawent nu nanlet xaa kas Xaa Tubka Nak. 13 Lee kwaan nle rop ngwleyy ne kwaan re xaa yezh nak, gorna lee tub xaa nzek tub gon, gorna lee baal kayek lee xaa nke zhiin lo ngwleyy nzen tub leeya kwaan kwaan nzob chon ley. 14 Nu ncheep xaa kwaan nzob chon ley leen yas o leen chee kwaan nzho kalt leen nu rese kwaan ngoo xaa kwaan kwaan nzob ley nak cheen ngwleyy. Snee mle xaa kwaan re xaa Israel gorna nya xaa naz Silo. 15 Nu sbaaka gorna zeeraka zeek xaa ze lo mdo lee xaa nke zhiin lo ngwleyy nya lo xaa nted ma nu mbezh xaa: "Zaa baal keex na gaw ngwleyy nel nakayaat xaa baal kwaan nguy lo lu sinka kayaa xaa kwaan nye". 16 Nu chelee xaa keb xaa: "Nzhaal yek ze yilotlaka zeera nzho mod wee lu paro baal kwaan nzhekla lu".a Lee xaa nke zhiin lo ngwleyy mbezh: "Aa, zaaya nal gorne o che kiib luya kwaan lajwers lo na". 17 Sbaa lee jwalt cheen rop xgann Li gro doo ngok lo Xaa Tubka Nak, nel mle nanont xaa gon cheen Xaa Tubka Nak.
18 Nu lee Samuel seetaka mad xaa, tubka mke mad zhin lo Xaa Tubka Nak, nu ngok xaa xab ngwleyy kwaan wen doo kwaan nzhak kwenta mandil. 19 Nu kad liin gorna lee xnaa mad nya yidoo ndexkwaa me ler kwaan nzhe rop sa me gorna nted me ma lo Dios. 20 Zee lee Li nii wen lo Elcana nu lo xngwnaa xaa nu mbezh xaa: "Naab na zee lee Xaa Tubka Nak zaa zyen doo xinn lu lo ngwnaa ne." Zeera mbare rop sa xaa garli xaa. 21 Nu lee Xaa Tubka Nak ngunii wen lo An zee mbeyxinn me nu ngol chon xgann me nu chop xchaap me. Nu lee Samuel nzexen kwaan yalngezh cheen Xaa Tubka Nak.
22 Lee Li ngoxla xaa per gorna ngune xaa lee re xgann xaa kale kwaan nawent lo re xaa Israel nu nkano xaa re ngwnaa me nkanap roo pwert li Xaa Tubka Nak paro nkasa re xaa, 23 zee nzhé xaa lo rop xgann xaa: "¿Chozhiin kale gu re kwaan nakap? Nzhon na kwaan nii re xaa yezh ne, re kwaan nawent kwaan kale gu. 24 Aa, xgaan nawent kwaan kale gu kwaan yezh cheen Xaa Tubka Nak. 25 Chelee tub xaa le jwalt lo stub xaa lee Dios nii kwent cheen xaa; per chelee tub xaa le jwalt lo Xaa Tubka Nak, ¿cho nii kwaan kwent cheen xaa? Per lee rop xaa namlet kas kwaan nzhé xuz xaa lo xaa, nel lee Xaa Tubka Nak mlela xgab gut rop xaa.
26 Lee Samuel xaa mad nzhaxen nu kale xaa kwaan wen lo Dios nu lo re myet.
27 Zee ngwa tub xaa mzaa kwent kwaan nzhé Dios lo lee xaa lo Li nu nzhé xaa:
—Snee né Xaa Tubka Nak: "Gorna lee re xey gu mke zhiin naz Egipto lo faraón mlu na na lo re xaa. 28 Mleyy na xey lu zee ngok gu xngwleyy lo rese dii cheen Israel, zee nzek gu yaal kwaan chul doo nzebech lo mdo nu gak gu ler kwaan nzhak kwenta mandil lo na. Mza na tub le gon kwaan mzaa re xaa Israel lo na lo re gu. 29 ¿Chozhiin mle nanont gu gon kwaan ngunabeyy na gu teed gu garli na? ¿Chozhiin mle nonra lu xgann lu ke na? Kasechaa gu kwaan gon wenra kwaan nzaa re xaa Israel lo na. 30 Na Xaa Tubka Nak myaan kwaan re xaa li lu nu kwaan re xey lu xaa yilo gak xaa xngwleyy na. Per nagakta sbaa. Na le nanont xaa mle nanont na nu ted na bid re xaa mle nanont na. 31 Mzhin gaxla gor luux na yalnabeyy cheen lu nu dii cheen re xey lu xaa yilo nu nik tub xaa lo dii cheen xey lu nazhint lo yalgox cheen. 32 Gak lu mbidyos lo re kwaan wen le na lo re xaa Israel nu tira nik tub dii cheen lu nazhint yalgox. 33 Re xaa lu nakiibt na ke xaa zhiin lo na lo mdo cheen na zee gak nales lextoo lu wii lu xomod le xaa nu yet xaa gorna seetaka ngezh xaa. 34 Kwaane gak tub nseyn lo lu gorna lee rop xgann lu, Ofni nu Finees yet tuka mbizh. 35 Per le na zee roo tub ngwleyy, xaa nali gak, nu le xaa rese kwaan nzhekla na nu kwaan nyula na. Tubka yo dii cheen xaa nu ke xaa zhiin mod ngwleyy lo na, xaa nle nzhul na. 36 Zee lee rese xaa mbanka lake garli lu yiid kichxub lo xaa zee naab xaa tub demi plat lo xaa o naab xaa yat kwaan gaw xaa nu noka naab xaa zhiin cheen ngwleyy lo xaa zee nzho mod le xaa gan kwaan gaw xaa."