Xaa Tubka Nak ngunii lo Samuel
3
Samuel seetaka mad xaa nu nle xaa zhiin lo Xaa Tubka Nak mod ngunii li lo mad. Re mbizh zee cheepse nii Xaa Tubka Nak lo myet nu nanlut xaa kwaan lo re xaa.2 Tub yaal naxna Li leen li xaa nu mzelo garlo xaa mchool nu nanyanitraya. 3 Nu lee Samuel naxna leen li Xaa Tubka Nak paro nax kaj cheen trat cheen Dios. Nu gorna zeeraka yuyy bruj cheen Dios, 4 zee mrezh Xaa Tubka Nak Samuel, nu lee xaa mkeb nu nzhé xaa:
—Lee na neeka.
5 Zee mrexonn xaa ngwa xaa paro nzo Li, nu nzhé xaa:
—Lee na neeka; ¿Chozhiin kabezh lu na?
Zee lee Li nzhé lo xaa:
—Nakabezht na lu zyaa goot.
Zee nya xaa ngoot xaa. 6 Zee lee Xaa Tubka Nak mrezh Samuel stuba. Zee nguxche Samuel nu ngwa xaa lo Li nu nzhé xaa:
—Lee na neeka; ¿chozhiin kabezh lu na?
Zee lee xaa nzhé:
—Xgann, nakabezht na lu zyaa got.
7 Samuel seetaka nanlabeyyt cho nak Xaa Tubka Nak, nel zer gon xaa nii Dios lo xaa. 8 Ngok yon welt mrezh Xaa Tubka Nak Samuel, zee nguxche xaa nu ngwa xaa lo Li nu nzhé xaa:
—Lee na neeka; ¿chozhiin kabezh lu na?
—Zyaa goot nu chelee xaa kwezh xaa lu stuba zee yé lu lo xaa: "¿Cho kwaana? Xaa Tubka Nak, kayon na kwaan né lu lo na xaa nak xmos lu".
Zee nya Samuel ngoot paro naxna xaa.
10 Zee mbiid Xaa Tubka Nak lo xaa nu mrezh xaa stub welt nu nzhé xaa lo xaa:
—¡Samuel, Samuel!
Zee lee Samuel mkeb nu nzhé:
—¿Cho kwaana né lu lo na, xaa nak xmos lu?
11 Zee nzhé Xaa Tubka Nak lo Samuel:
—Wii, le na tub kwaan lo re xaa Israel, nu gorna gon xaaya gak ne nzha re xaa gona. 12 Nu mbizh zee gak rese kwaan nzhé na axta yilo lo Li nu lo re xaa li xaa. 13 Nu nzhéla na lo xaa kwent cheen re jwalt cheen rop xgann xaa, naab na kwent lo re xaa li xaa. Nel nela xaa nawent mle rop xgann xaa, per nanguniit xaa lo xaa. 14 Myaan na kwaan re xaa li xaa, "nik tub kwaan nyent mod che re jwalt cheen re xaa li xaa: nik tub ma kwaan ted xaa nu nixa re gon kwaan zaa xaa nyent mod che re jwalt cheen xaa".
15 Zee ngoot Samuel axta ngulo nguni yizhyo, zee mxal xaa roo li Xaa Tubka Nak, per nzheb xaa yé xaa lo Li kwaan myun lo xaa. 16 Zee mrezh Li Samuel nu nzhé xaa lo xaa:
—Samuel, xgaan na.
Zee lee xaa mkeb nu nzhé xaa:
—Lee na neeka.
17 Zee nzhé Li lo xaa:
—¿Cho kwaan né Xaa Tubka Nak lo lu? Nzhekla na yé luya lo na nu chelee lu nayét lu re kwaan né xaa lo lu zee le Dios tub kwaan nawent lo lu.
18 Zee nzhé Samuel rese kwaan nzhé Xaa Tubka Nak lo xaa, nu nik tuba namkaxlaant xaa. Nu nzhé Li:
—Xaa Tubka Nak nak xaa; laa le kwaan nzak xaa wen.
19 Nu nzharoora Samuel nu lee Xaa Tubka nak nzo kwaan lee xaa nu mle xaa rese kwaan nzhé xaa lo xaa le xaa. 20 Nu dubse Israel, Dan nu axta Beerseba ne, lee Samuel ngok xaa kwaan mzaa kwent kwaan nzhé Dios lo lee xaa. 21 Zee myun Xaa Tubka Nak lo xaa naz Silo; nel baa nzhekla xaa yé xaa rese kwaan nzhekla xaa lo Samuel.