Re xaa Filistea mbe kaj cheen trat
4
Samuel ngunii lo re xaa Israel.Lee mbizh zee lee re xaa Israel ngwa mdil kwaan re xaa Filistea nu mlaz xaa gax Eben-ezer nu lee re xaa Filistea mlaz naz Afec. 2 Lee re xaa Filistea mri wen zee mdil xaa kwaan re xaa Israel nu gorna mdil mle xaa gan lo re xaa Israel nu mbit xaa kan tub tap mil xaa Israel paro mdil xaa. 3 Gorna lee re soldad xaa Israel mbare paro mbaz xaa, lee re xaa gol, xaa Israel nzhé: "¿Chozhiin mlaa Xaa Tubka Nak be, zee mle re xaa Filistea gan lo be? Ya be yaxii be kaj cheen trat cheen Xaa Tubka Nak naz Silo, zee zoya xsaw lo re be zee leya yud be lo re xaa nayii ne be." 4 Zee lee re xaa yezh mxaal lak xaa naz Silo zee nguxii xaa kaj cheen trat cheen Xaa Tubka Nak, xaa nkano dubse yalnabeyy, xaa nzho xsaw lo rop mandad kwaan le Kerubin. Nu lee rop xgann Li, Ofni nu Finees mkanap kaj cheen trat cheen Dios.
5 Gorna lee kaj cheen trat cheen Xaa Tubka Nak mzhin paro mbaz re xaa, rese xaa Israel mrazhe nye doo kwaan yalnix zee lee yizhyo mxiz. 6 Gorna mbin re xaa Filistea rezh cheen yalnix zee nzhé re xaa: "¿Cho rezh tant nke paro mbaz re xaa hebreo?" Per gorna ngune xaa lee kaj cheen trat cheen Xaa Tubka Nak, mzhin paro mbaz re xaa, 7 zee mzheb doo re xaa Filistea nu nzhé re xaa: "Tub dios nzo paro mbaz re xaa Hebreo. ¡Ay nales doo nzhak re be, zer gak tub kwaan snee lo re be! 8 ¡Ay re be! ¿Cho koo be lozhya re dios xaa nkano yalnabeyy? Mluux re dios ne Egipto naz yizhyo bizh kwaan rete klas yalyizh. 9 Nye gak re be xaa Filistea, chelee be nanzheklat be ke be zhiin lo re xaa Hebreo modxa mke xaa lo be nal nu dil be mod xaabyi.
10 Zee mdil re xaa Filistea kwaan re xaa Israel nu mle xaa gan lo xaa zee zyen doo xaa ngut; kan tub galbchii mil soldad xaa Israel mbit xaa. Lee re xaa mle gan mxonn xaa nya xaa leen yoo ler cheen xaa. 11 Nu lee re xaa Filistea mbe kaj cheen trat cheen Dios nu mbit xaa rop xgann Li, Ofni nu Finees.
Yalgut cheen Li
12 Tub xaa lo dii cheen Benjamín mle gan mxonn paro mdil re xaa nu mzhin xaa leeka mbizh zee naz Silo, mraz xab xaa nu nyazhe yo leen yich yek xaa. 13 Gorna mzhin xaa lee Li nzob lo tub yagxil ngwii naz leen naz. Nxiz lextoo nel nle xaa xgab kaj cheen trat cheen Dios. Gorna lee xaa mzeeb leen yezh nu nzhé xaa re kwaan ngok zee rese xaa yezh mbazhe. 14 Gorna mbin Li rezh cheen re myet zee ngunabdizh xaa:
—¿Chozhiin tant nke rezh?
Zee lee xaa zee lijer doo ngwa lo Li nu nzhé xaa re kwaan ngok. 15 Lee Li nzhola tub tap gal nzho chiinmchon liin nu mchoola lo xaa, nyentra mod wii xaa. 16 Lee xaa zee nzhé lo Li:
—Nyal na nel mle na gan mxonn na lo dil.
Zee lee Li ngunabdizh lo xaa:
—Xgaan, ¿cho kwaan ngok?
17 Zee nzhé xaa:
—Lee re xaa Israel mxonn lo re xaa Filistea zee mbit xaa Filistea zyen doo xaa yezh nu noka ngut rop xgann lu Ofni nu Finees nu lee kaj cheen trat mbe re xaa Filistea.
18 Gorna lee xaa mzeet kaj cheen trat cheen Dios lo Li, gorzee mbaxche xaa naz tich xaa lo yagxil zee mla xaa naz roo yezh zee ngoch zhit yenn xaa nel nga doo xaa zee gut xaa. Nu ngunabeyy xaa lo re xaa Israel dubse tub choo liin.
19 Lee xix xaa, xngwnaa Finees, nakxinn me nu mer doo gal xinn me. Nu gorna mbin me lee kaj cheen trat cheen Dios mbe re xaa nu lee xazhap me nu lee xmbyi ngulola ngut, gorzee mzhiib yalne lextoo me nu ngol xinn me. 20 Nu gorna mwii re me nzen mad lo me lee mer yet, zee nzhé re me lo me: "Nazhebt lu nel ngol tub xgann lu". Per lee me namkebt nixa namlet me kas. 21 Nu mloole me mad Icaboda nu nzhé me: "¡Lee yalnabeyy mbachi lo re xaa Israel!, nel mbe re xaa Filistea kaj cheen trat cheen Dios". Nu mle doo me xgab yalgut cheen xazhap me nu yalgut cheen xmbyi me. 22 Zee nzhé me: "Lee yalnabeyy cheen Dios mbachi lo re xaa Israel, nel mbe re Filistea xaa kaj cheen trat cheen Dios".