Kaj cheen trat naz yizhyo Filistea
5
Gorna lee re xaa Filistea mzen kaj cheen trat cheen Dios, naz Eben-ezer nu mbe xaaya naz Asdod. 2 Zee mbe re xaa Filistea kaj cheen trat cheen Dios, nu mlo xaaya leen li Dagón, xaa nak xtios xaa, nu mzo xaaya gax lo Dagón. 3 Nu stub mbizh garziil gorna nguxche re xaa Asdod, mwii xaa lee maj cheen Dagón na lo naz lo yo, nax gax lo kaj cheen trat cheen Xaa Tubka Nak. Zee mlep xaaya nu mzo xaaya paro nzoya. 4 Nu gorna nguxche xaa garziil stub mbizh. Mwii xaa lee maj cheen Dagón na lo naz lo yo, nax gax lo kaj cheen trat cheen Xaa Tubka Nak stuba. Mbyiib yenna nu mlux yaaya nu ngok byogya nu naxtoya axta roo yoo, nebse xana wen. 5 Kwaanzee re ngwleyy cheen Dagón nu re xaa nya yidoo cheen Dagón, nazobt nii xaa mer roo yoo cheen Dagón naz Asdod, axta mbizh nalzhe.6 Zee mla yalnayii cheen Xaa Tubka Nak tich re xaa yezh cheen Asdod nu mluux xaa rese xaa nzhi re yezh gax nu kwaan xyan mseweey xaa re xaa kwaan yoob nakap. 7 Zee gorna ngune re xaa Asdod re kwaan kaded xaa zee nzhé xaa: "Nalaket kaj cheen trat cheen xtios xaa lo nu, nel dios baa kated doo nu bid nu noka lo Dagón, xtios nu". 8 Zee mrezh xaa rese xaa nabeyy lo re xaa Filistea nu nzhé xaa lo xaa:
—¿Cho kwaan le be kwaan kaj cheen trat cheen Dios xaa Israel?
Zee lee re xaa mkeb nu nzhé xaa:
—We be kaj cheen trat cheen xtios xaa naz Gat.
Zee mbe xaa kaj cheen trat cheen Dios naz ba. 9 Nu gorna mbe xaaya zee lee Xaa Tubka Nak mted re xaa yezh zee bid, zee mzheb doo re xaa, xaa win nu xaa gox nel mlen yoob nakap doo lo re xaa. 10 Zee mxaal xaa kaj cheen trat cheen Dios naz Ecrón. Nu gorna mzhin kaj cheen trat naz Ecrón zee mbazhe re xaa yezh nu nzhé xaa: "¿Che nzeno gu kaj cheen trat cheen dios cheen xaa Israel nee zee gut gu rese nu nu rese xaa yezh?"
11 Zee mrezh xaa rese xaa non lo re xaa Filistea nu nzhé xaa: "Xaal be kaj cheen trat cheen xtios xaa Israel leeka paro mroya zee naguta re be nu re xaa yezh cheen be". Nel ngut doo re xaa paro nzeno xaaya nu mla yalnayii cheen Dios tich re xaa ba. 12 Nu re xaa nanguta, mlake xaa kwaan yoob nakap, nu lee bi kwaan mbazhe re xaa yezh nzhin axta naz leen yiba.