Lee re xaa Filistea mzere kaj cheen trat
6
Tub gazh mbee ngu kaj cheen trat cheen Xaa Tubka Nak xkizhyo re xaa Filistea. 2 Zee lee re xaa Filistea mrezh ngwleyy cheen xaa nu re wezh nu ngunabdizh xaa lo xaa:—¿Cho kwaan le nu kwaan kaj cheen trat cheen Xaa Tubka Nak? Né lo nu xomod yalaa nuya paro nzhoya.
3 Lee re xaa nzhé:
—Chelee gu zere gu kaj cheen trat cheen dios xaa Israel, naxaalt gu nebse leeya sinka zaa gu tub gon lo re kwaan nawent kwaan mle gu, zee gakwen gu zee ne gu chozhiin mted xaa gu bid.
4 Zee lee re xaa Filistea nzhé:
—¿Cho gon nzhaal zaa nu?
Zee lee re xaa mkeb nu nzhé:
—Dexkwaa gu gaay ngwneb or kwaan nzhak kwenta yoob kwaan nlen cho gu nu tub gaay ngwneb kwaan nak kwenta mzin kwaan nak or nel nzho gaay xaa nabeyy, nu nel leeka yalyizh kwaan kaded lo re xaa non noka ded lo re gu. 5 Bdexkwaa gu ngwneb kwaan nak kwenta yoob nu kwaan nak kwenta mzin kwaan kaluux xkizhyo be, nu ble non gu Dios cheen re xaa Israel, zee ne che zlaa xaa nateedt xaa bid lo be nu lo re dios kwaan nzho xkizhyo be. 6 ¿Chozhiin nle ned gu lextoo gu mod re xaa Egipto nu mod faraón? Nebse gorna ngulo mted Dios xaa bid mlaa nya re xaa Israel. 7 Bdexkwaa gu tub karet kub nu be gu chop la bak ma pense ngol xinn, nzhaal gak ma ma zer kwib yog yenn. Bliib gu ma nu bkee gu karet reke ma per nalaat gu reke beser tich ma, laa gu lake beser pa nzho re xma gu. 8 Zeera zen gu kaj cheen trat cheen Xaa Tubka Nak, nu zhiib guya lo karet, nu zhiib kaj kwaan nzho re ngwneb or kwaan kix gu mod tub lo kwaan nawent kwaan mle gu; nu laa gu nya techo kaj. 9 Per bwii wen gu cheleeya nyaya naz xkizhyo re xaa Bet-semes zeesi mer lee xaa mxaal yalyizh ne lo be nu chelee karet nanyat naz ba zeesi sbaasa ngok kwaane lo be.
10 Nu mzen re xaa chop la bak ma pense ngol xinn ma nu mliib xaa ma nu mkee xaa karet reke ma nu lee re beser msebyoo xaa pa nzho re xma xaa. 11 Zeera mzhib xaa kaj cheen trat cheen Xaa Tubka Nak lo karet nu kaj kwaan nzho ngwneb kwaan nzhak kwenta mzin nu ngwneb kwaan nzhak kwenta yoob kwaan nlen cho xaa. 12 Nu lee rop la bak nya naz Bet-semes; nu nalise nzha ma nu mbazhe ma nu nixa nanroot ma naz lad li nixa lad beg. Nu lee re xaa non lo re xaa Filistea ngwake tich ma axta paro nzhaal yizhyo Bet-semes. 13 Lee re xaa nzho Bet-semes katoop nzhobxtil lo lach. Gorna mwii xaa lo kaj cheen trat nyaad ngok nix doo lextoo re xaa. 14 Gorna lee karet mzhin naz wen xkizhyo Josué naz Bet-semes nu mlaza baa paro nzob tub ke ndok. Zee mchoog re xaa tab cheen karet nu mkwaa xaaya lo ki nu mted xaa rop la bak mod gon kwaan nzek xaa ma lo Xaa Tubka Nak. 15 Zee lee re xaa Leví mla kaj cheen trat cheen Xaa Tubka Nak, nu kaj kwaan nzho re kwaan nak or leen nu mzhib xaaya yek tub ke ndok. Zee lee re xaa Bet-semes mted xaa gon kwaan nzek xaa ma lo mdo nu mzaa xaaya lo Xaa Tubka Nak mbizh zee. 16 Gorna ngune gaay xaa non xaa Filistea kwaane, leeka mbizh zee mbare xaa naz Ecrón.
17 Mzaa re xaa Filistea lo Xaa Tubka Nak ngwneb yoob kwaan nak or kwent cheen kwaan nawent kwaan mle xaa. Nu kad tub yezh nyalzo tubga; tuba ngolzo yezh Asdod, tuba ngolzo yezh Gaza, tuba ngolzo yezh Ascalón, tuba ngolzo yezh Gat, nu tuba ngolzo yezh Ecrón. 18 Nu noka mzaa re xaa Filistea gaay ngwneb or kwaan nzhak kwenta mzin; nu kad xaa nabeyy mzaa tubga kwent cheen yezh ndok kwaan nyaaw kwaan bla kwaan re yezh win kwaan nayaawt kwaan bla cheen xaa. Nu lee ke paro mzhib xaa kaj cheen trat cheen Xaa Tubka Nak, seetaka nzob axta mbizh nalzhe naz wen xkizhyo Josué naz Bet-semes.
19 Per lee Xaa Tubka Nak mbit chongal chii xaabyi yezh Bet-semes nel mwii re xaa leen kaj cheen trat cheen Xaa Tubka Nak. Nu lee re xaa yezh mbinn doo, nel lee Xaa Tubka Nak, mbit zyen doo xaa.a 20 Zee lee re xaa Bet-semes nzhé: ¡Nyent xaa nzho mod zo delant lo Xaa Tubka Nak, Dios xaa nambey nak! ¿Cho lo nzho mod xaal kaj cheen trat zee nalaketa lo be? 21 Zee mxaal xaa xaa nzhé lo re xaa Quiriat-jearim, nu nzhé re xaa: Lee re xaa Filistea mzere kaj cheen trat cheen Xaa Tubka Nak, te re gu zee wee guya.