7
Zee mbe re xaa Quiriat-jearim, kaj cheen trat cheen Xaa Tubka Nak nu mlo xaaya leen li Abinadab kwaan nzhi naz yenn lach; zee mle nambey re xaa Eleazar xgann Abinadab zee kanap xaa kaj cheen trat cheen Xaa Tubka Nak.
2 Nu gorna mzhin kaj cheen trat naz Quiriat-jearim mlaza tub gal liin naz ba; nu rese xaa Israel mkwaan Xaa Tubka Nak kwaan yalnix.
Samuel ngok xaa ngunaab kwent lo re Israel
3 Zee ngunii Samuel lo rese xaa Israel, nu nzhé xaa: "Chelee gu wlipa gu kwaan dub lextoo gu bare gu lo Xaa Tubka Nak, bluux gu re dios, nu re ngwneb Astarot kwaan nkano gu, nu kwaan dub lextoo gu bwii gu lo Xaa Tubka Nak, zee kanap xaa gu lo re xaa Filistea". 4 Zee lee re xaa Israel mluux re dios nu re ngwneb Astarot, nu mbill xaa nebse lo Xaa Tubka Nak.
5 Zee nzhé Samuel: "Toop rese xaa Israel naz Mizpa, zee na naab lo Xaa Tubka Nak kwent cheen re gu". 6 Nu gorna mdoop re xaa Israel naz Mizpa, mloo xaa nis nu mxo xaaya lo Xaa Tubka Nak. Nu mkwan re xaa dubse zhe nu nzhé re xaa: "Mle nu jwalt lo Xaa Tubka Nak". Nu naz Mizpa mzelo Samuel ngunaab kwent lo re xaa Israel. 7 Gorna mbin re xaa Filistea lee re xaa Israel nzhi naz Mizpa, zee ngwasya re xaa Filistea zee mdil xaa kwaan re xaa Israel; nu gorna mbin re xaa Israel kwaane, zee mzheb doo re xaa ngune xaa re xaa Filistea. 8 Zee nzhé re xaa Israel lo Samuel: "Nalaat lu naab lu kwent cheen re nu lo Xaa Tubka Nak xaa nak Xtios be, zee kanap xaa nu lo re xaa Filistea. 9 Zee mzen Samuel tub mbakxiil ma nzho xizh nu mted xaa dub ma lo mdo lo Xaa Tubka Nak zee ngunaab Samuel lo Xaa Tubka Nak nu lee Xaa Tubka Nak mbin kwaan ngunaab xaa. 10 Gorna kated Samuel ma lo Xaa Tubka Nak lee re xaa Filistea mzhin dil kwaan re xaa. Zee lee Xaa Tubka Nak ngunii tich re xaa Filistea mod balngwzi nye doo. Zee mzheb doo re xaa Filistea nu nguga xaa lo xaa Israel 11 Zee lee re xaa Israel mreke tich re xaa Filistea axta Mizpa nu axta Bet-car; nu mbit xaa re xaa naz.
12 Zee mzoli Samuel tub ke xsaw Mizpa nu Sen, nu mlole xaaya Eben-ezera nu nzhé xaa axta ne mle Xaa Tubka Nak yud be 13 Sbaa mle xaa gan lo re xaa Filistea nu namzebt xaa Filistea leen yizhyo cheen re xaa Israel dubse mbizh kwaan mban Samuel, nel Xaa Tubka Nak mkanap re xaa lo re xaa Filistea. 14 Sbaa mbare re Israel mkayaa Ecrón nu axta Gat, kwaan nak re yizhyo kwaan mkiib re xaa Filistea lo xaa. Nu mkiib xaa Israel dubse yizhyo cheen xaa stuba lo re xaa Filistea zee wen ngu re xaa Israel kwaan re xaa Amorreo.