Re xaa Israel ngunaab tub rey
8
9Gorna lee Samuel ngoxla zee mzob xaa rop xgann xaa nabeyy lo re yezh Israel. 2 Lee xgann xaa xaa yilotlaka le Joel nu lee xaa rop le Abías; ropse xaa ngunabeyy naz Beerseba. 3 Per lee rop xaa namlet kwaan wen kwaan mle xuz xaa, sinka mzoblazh xaa nu mzen xaa demi lo re kwaan mle xaa nu nangunaabt xaa kwent tub mod nali.4 Zee mkasa re xaa gol xaa Israel nu ngwa xaa lo Samuel naz Ramá, 5 nu nzhé re xaa: "Lu ngoxla nu lee rop xgann lu nakalet kwaan wen modxa mle luya; mas wen kwaan tub rey zee nabeyy xaa lo nu, modxa nkano re stub naz yezh rey". 6 Gorna mbin Samuel lee re xaa nzhekla rey xaa nabeyy lo xaa, zee ngok nawent lextoo xaa zee ngunii xaa lo Xaa Tubka Nak. 7 Per lee Xaa Tubka Nak nzhé lo Samuel: "Bkenzha rese kwaan né xaa yezh lo lu; nel naleet lu nayii xaa ne xaa sinka na nayii xaa ne nu nanzheklat xaa nabeey na lo xaa. 8 Axta mbizh kwaan mloo na re xaa yizhyo Egipto nu axta nal leeka kwaan ba mle re xaa lo na nu kale re xaa lo na; mlaa xaa na nu mbill xaa lo stub naz dios. 9 Lee nal bin kwaan né re xaa; per guzh lo re xaa xomod nabeyy rey nu xomod le xaa kwaan re xaa."
10 Zee lee Samuel mbare nzhé rese wdizh kwaan nzhé Xaa Tubka Nak lo re xaa yezh, xaa nzhekla rey. 11 Nu nzhé xaa lo re xaa:
—Kwaane le rey, xaa nabeyy lo gu: wee xaa xgann gu zee kanap xaa karet cheen re soldad nu zee nzob tich re xaa kabay nu yaner xaa delant lo karet. 12 Lee tub naz xaa nabeyy lo tub mil soldad nu lee stub naz nabeyy lo choobchii soldad lee stub naz xaa lee xkizhyo xaa nu stub naz xaa toop yalgon cheen xaa, lee stub naz xaa dexkwaa yiib kwaan ya xaa lo dil nu stub naz xaa dexkwaa yiib cheen xkaret xaa. 13 Nu noka wee xaa xchaap gu dexkwaa perfum nu dexkwaa me kwaan gaw re xaa li xaa nu dexkwaa me yat. 14 Nu nabeyy xaa xkizhyo gu nu yag ub cheen gu nu yag olib cheen gu nu zaa xaaya lo re xaa nke zhiin lo xaa. 15 Nu kiib xaa tub part lo chii part yalgon cheen gu nu ub cheen gu nu zaa xaaya lo xaa nabeyy nu lo xaa nke zhiin lo xaa. 16 Wee xaa re xaa nke zhiin lo gu nu re me nke zhiin lo gu nu re xaa mad nu noka xkoon gu ma wen nu xngwes gu zee ke zhiin lo xaa. 17 Nu kiib xaa tub part lo chii part xpakxiil gu nu xchib gu nu axta noka lee gu gak xmos xaa. 18 Zhin tub mbizh gorna naab gu lo Dios zee le xaa yud gu kwent cheen rey xaa mleey gu, per lee Xaa Tubka Nak nakebt lo gu.
19 Per lee re xaa yezh namlet kas kwaan nzhé Samuel nu nzhé re xaa:
—Nexa, nzhekla nu tub rey xaa nabeyy lo nu, 20 zee gak nu mod stub naz re yezh. Lee rey cheen nu nabeyy lo nu, nu yaner xaa lo nu lo dil.
21 Mbin Samuel kwaan nzhé re xaa yezh zee nzhé xaaya lo Xaa Tubka Nak. 22 Per lee Xaa Tubka Nak nzhé lo Samuel:
—Bkenzha kwaan né re xaa lo lu nu bleyy tub xaa gak rey lo re xaa.
Zee lee Samuel nzhé lo re xaa Israel:
—Bare gu naz lazh gu.