Snee ngok Saúl rey
9
Ngu tub xaa lo dii cheen Benjamín, xaa le Cis. Non doo xaa. Ngok xaa xgann Abiel, xaa ngok xgann Zeror, xgann Becorat, xgann Afía, tub xaa lo dii cheen Benjamín. 2 Nu nkano xaa tub xgann xaa le Saúl, tub xaa chul doo nzhak nu nyentra stub xaa chul nzhak mod lee xaa lo re xaa Israel nu ndok doo xaa neta xuk xaa nzhin stub naz xaa.3 Nu tub mbizh mzowen" re xngwes Cis, zee nzhé xaa lo Saúl xgann xaa: "Be tub xaa nke zhiin lo na zee ya kwaan gu re xngwes na, ma mzowen. 4 Zee ngwa Saúl kwaan xmos xuz xaa nu mded naz yizhyo cheen re xaa lo dii cheen Efraín nu noka mded xaa naz yizhyo cheen re xaa Salisa, nu nanguzhalt ma lo xaa. Zeera ngwa xaa naz yizhyo Saalim nu noka ngwa xaa naz dub yizhyo cheen Benjamín per nanguzhalt ma lo xaa. 5 Nu Gorna mzhin yizhyo Zuf, Saúl nzhé lo xmos xuz xaa:
—Chaa bare be; napa lee xuz na kale xgab be masra ke xngwes.
6 Zee lee xaa mkeb nu nzhé xaa:
—Yezh ne nzho tub xaa Dios; xaa nzhob doo xtizh; rese kwaan nii xaa nzhak. Ya be lo xaa zee nel cho kwaan né xaa lo be zee ya be pa naz xaal xaa be.
7 Zee mkeb Saúl lo xmos xuz xaa nu nzhé xaa:
—Ya be lo xaa, ¿per cho kwaan zaa be lo xaa, nel yat kwaan nzheno be ngulo mluxla? ¿Cho kwaan zaa be lo xaa?
8 Zee mkeb mos lo Saúl nu nzhé xaa:
—Wii nee, nkano na tub demi plat chuut kwaan nzho mod zaa be lo xaa zee né xaa lo be nel pa naz nzhaal ya be.
9 (Axta yilo lo re be, xaa Israel gorna lee tub xaa ya nabdizh lo Dios mbezh xaa: "Ya be lo xaa ngwii kwaan gak", nel sbaa nii re xaa yilo lo xaa nzaa kwent kwaan nzhé Dios lo lee xaa.)
10 Zee nzhé Saúl lo xmos xaa:
—Wena, chaa ya be.
Zee ngwa xaa yezh pa nzho xaa Dios.
11 Nu nzha yixoob gax yi cheen yezh, zee mzhaal xaa lak ngwnaa mad, me nzhexii nis, zee ngunabdizh xaa lo me nu nzhé xaa:
—¿Che nee nzho me ngwii cho kwaan gak?
12 Zee lee me mkeb nu nzhe:
—Nee nzho me. Le gu prad gwa gu lo me pense mzhin xaa yezh nel nalzhe teed xaa ma yek yi pa nambey. 13 Nu gorna reep gu leen yezh, kwaan gu xaa gorna zeeraka yixoob xaa yataw xaa, nel lee re xaa yezh nagawt axta gorna zeera zhin xaa nel lee xaa nii lo Dios kwent cheen kwaan teed re xaa. Zeera gaw re xaa ngulo mrezh xaa. Gwa gu nal telise nzhoka xaa.
14 Zee ngwa xaa yezh, nu gorna mzhin xaa leen yezh zee ngune xaa lee Samuel nzha yixoob yek yi pa gaw xaa ma kwaan teed re xaa.
15 Nzho jwalt stub mbizh gorna zeeraka zhin Saúl, zee lee Xaa Tubka Nak mlu tub kwaan lo Samuel, nu nzhé xaa: 16 "Yee leeka gorne, xaal na tub xaa dii cheen Benjamín lo lu. Chuun lu anseyt yek xaa kwaan luu mleey na xaa zee nabeyy xaa lo re xaa Israel, yezh cheen na, nel mbin na kwaan mbezh re xaa yezh cheen na zee xaal na tub xaa dil kwaan re xaa Filistea." 17 Gorna lee Samuel ngune lo Saúl zee lee Xaa Tubka Nak nzhé lo xaa: "Xaa ne nak xaa ngunii na lo lu, xaa nabeyy yezh cheen na". 18 Nu gorna mzhin xaa roo yezh zee mbii Saúl lo Samuel nu nzhé xaa:
—¿Che nzho mod né lu lo na paro nzho xaa ngwii kwaan gak.
19 Zee mkeb Samuel lo Saúl nu nzhé xaa:
—Mer na nak xaa zee; chaa ya be yek yi pa nambey nel nalzhe gaw lu kwaan na baa. Yee garziil nya lu nu za na kwent kwaan kwaan nzhekla lu. 20 Nzha chon mbizh, lee ngwes, ma kwaan mzowen, mbare ma li ma, kwaanzee nalet gu xgab ma. Noka lu nak xaa nzhekla re xaa Israel; lu kwaan re xaa sawlizh lu.
21 Zee lee Saúl mkeb nzhé:
—¿Chozhiin né lu kwaan ba? ¡Na nak tub xaa lo dii cheen Benjamín kwaan nak dii mas chuut lo re xaa Israel! ¡Nu dii xey na tira nanont re sawlizh na!
22 Zee mbe Samuel Saúl nu xaa nke zhiin lo xaa, paro mbaz re xaa nu mzaa xaa tub pa non doo zob xaa. Nak kan tub galbchii xaa nzhi. 23 Zee nzhé Samuel lo xaa kwaan ndexkwaa kwaan nzhaw xaa:
—Teno baal kwaan mza na lo lu, kwaan nii na lo lu ngoxa lu.
24 Zee mloo xaa baal xuk ma nu mzaa xaaya lo Saúl zee nzhé Samuel:
—Kwaane mloxa na gaw lu. Dawa, nel mroxa naya kwent cheen lu. Nzhé na lo re xaa yezh kano na xaa mrezh na.
Saúl ndaw kwaan Samuel mbizh zee. 25 Nu gorna nzha xaa pa yi nambey yezh, zee ngunii xaa lo Saúl yek yoo. 26 Nu gorna ngunii yizhyo stub mbizh garziil doo, gorna nzela xni mbizh, zee mrezh Samuel Saúl gorna nax xaa yek yoo, nu nzhé xaa lo xaa:
— Guxche nal nel nal nya lu.
—Guzh lo mos zee yaner xaa, lee lu kwaz zee za na kwent xtizh Dios lo lu.
Zee le mos nguner.