10
Zee mzen Samuel kwaan nzho nseyt leen, nu mchuun xaa nseyt yek Saúl nu ndaw xaa bit ta garlo xaa nu nzhé xaa lo xaa: "¡Wii, Xaa Tubka Nak mle nzhul lu zee nabeyy lu yezh cheen axaa! 2 Leeka nalzhe gorna roo lu lo na nee, zee yizhal lu chop xaa gax paro nzob baa cheen Raquel naz Selsa, gax roo xkizhyo Benjamín. Xaa ne né lo lu: "Lee ngwes, ma nkwaan lu, nguzhala . Per nal lee xuz lu nakaletra xgab ngwes sinka lee xaa kale xaa xgab gu, nu nzhé xaa: '¿Xomod yizhal na xgann na?'" 3 Mas naz delant gorna zhin lu xan yag zin cheen Tabor zhaal lu chon xaabyi, xaa nzha yixoob gool lo Dios naz Bet-el. Tub xaa nzhano chon chib yeen lee stub xaa nzhano chon yat nu lee xaa stub nzhano tub yed xis ub. 4 Nu gorna yilo nii xaa dix lo lu zee zaa xaa chop yat lo lu zee zen luya lo xaa. 5 Zee zhin lu Gabaa cheen Diosb, paro nzhi yoo ndok pa nlaach xaa Filistea. Nu gorna reep lu leen yezh yizhal lu tub naz xaa nii xtizh Dios, xaa nyaad nkato pa nambey doo. Nzholl xaa bagwel kwaan nkano chii yiib, tambor chuut, bzhik, nu stub bagwel nu nii xaa xtizh Dios. 6 Zee lee Mbi Naban cheen Xaa Tubka Nak mla tich lu kwaan yalnabeyy, zee noka re ngunii xtizh Dios, zee chee Dios lextoo lu. 7 Nu gorna gak re kwaane lo lu, le lu kwaan nzak lu wen nel Dios nzo kwaan lu. 8 Nu ya lu yilo lo na naz Gilgal nu zeera ya na lo lu zee zeek be ma lo mdo, zee zaa lu gon kwaan nak kwaan kwi wen xaa. Nu kwaz lu baa tub gazh mbizh, zeera yal na lo lu zee nii na lo lu cho kwaan nzhaal le lu".9 Nu gorna myek Saúl nya, lee Dios mchee lextoo xaa zee ngok re kwaan gro ne mbizh zee. 10 Gorna ngulo mzhin Saúl kwaan xaa nke zhiin lo xaa naz Gabaa, zee mroo lak xaa noka ngunii xtizh Dios. Zee lee Mbi Naban cheen Dios mla tich xaa kwaan yalnabeyy nu noka lee xaa ngunii xtizh Dios. 11 Nu rese xaa nlabeyy xaa yilo, gorna ne xaa lee xaa ngunii xtizh Dios, zee nzhé re xaa lo tub xaa nu lo stub xaa: ¿Cho kwaan nzak Saúl xgann Cis? ¿Cho kwaan nii xtizh Dios? 12 Nu tub xaa nzho baa ngunabdizh lo nu nu nzhé xaa: ¿"Cho xgann nak xaa ne"? Baa nze kwaan nii xaa: "¿Che noka Saúl nzho lo re xaa nii xtizh Dios?" 13 Gorna ngulo ngunii Saúl xtizh Dios zee mzhin xaa pa nambey doo yek yi.
14 Tub xich Saúl nzhé lo Saúl nu lo xaa nke zhiin lo xaa:
—¿Pa ngwa lu?
Zee lee xaa mkeb nu nzhé xaa:
—Lee nu ngwa kwaan ngwes; per nanguzhalt ma lo nu zee ngwa nu lo Samuel.
15 Zee lee xich Saúl nzhé:
—Nzhekla na né lu lo na cho kwaan né Samuel lo lu.
16 Zee lee Saúl mkeb lo xich xaa nu nzhé:
—Ngune xaa lo na lee re ngwes ngulola nguzhal.
Per nanzhét Saúl xomod nak kwaan nzhé Samuel lo xaa, xomod gak xaa xaa nabeyy lo re xaa Israel.
17 Zee mrezh Samuel re xaa yezh Israel zee mkasa re xaa lo Xaa Tubka Nak naz Mizpa, 18 zee nzhé xaa lo re xaa Israel:
—Snee né Xaa Tubka Nak, Dios cheen re be, xaa Israel: "Na mloo gu lo re xaa Egipto nu mloo na gu lo yalnabeyy cheen re xaa paro mzhin gu, xaa mted gu bid. 19 Per nal myenlazh gu xaa nak Xtios gu, xaa mle yud gu lo re yalnales kwaan mded gu, nu lo re bid kwaan mded gu. Nu nzhé gu: 'Aka, zaa tub rey xaa nabeyy lo nu'. Lee nal yiid gu lo Xaa Tubka Nak, kad tub gu nu mod nak dii cheen gu nu re sawlizh gu."
20 Zee ngunabeyy Samuel zee ya re xaa lo dii cheen xaa yaloo swert, nu gorna mloo xaa swert zee lee swert ngolzo re xaa lo dii cheen Benjamín. 21 Zee mrezh xaa re xaa lo dii cheen Benjamín mbi gax kad sawlizh xaa, zee lee swert ngolzo sawlizh Matri nu zee lo lee xaa mroo Saúl xgann Cis. Mkwaan re xaa xaa per nanguzhalt xaa lo xaa. 22 Zee ngunii xaa lo Xaa Tubka Nak stuba, nu nzhé xaa:
—¿Che nabiit xaa zee nee?
Zee lee Xaa Tubka Nak mkeb nu nzhé:
—Nee nzo xaa, lee xaa nzholaan leen re kwaan baa.
23 Zee nguloo re xaa xaa paro nzholaan xaa, nu mzo xaa xaa xsaw lo re xaa yezh, nu gorna ngune re xaa nanzhint re xaa xuk xaa. 24 Zee nzhé Samuel lo re xaa yezh:
—¡Gwii gu lo xaa mleyy Xaa Tubka Nak! ¡Nyentra stub xaa mod lee xaa dubse Israel!
Zee lee re xaa yezh mrazhe kwaan yalnix nu nzhé xaa:
—¡Mban xrey be!
25 Zee nzhé Samuel xomod nak ley cheen yalnabeyy cheen xaa lo re xaa yezh nu mkee xaa tub yech nu mlozhaw xaaya leen li Xaa Tubka Nak. Zee mxaal xaa re xaa yezh zee nya re xaa garli xaa. 26 Nu noka Saúl mya garli naz Gabaa, kwaan re xsoldad, xaa xaa mchee Dios lextoo. 27 Per lee lak xaa nakap nzhé: "¿Che xaa ne le yud be?" nu ngunayii re xaa ne Saúl nu mle nanont xaa xaa, per lee Saúl namlet kas.