Saúl mle gan lo re xaa Ammon
11
Zee nguxoob Nahas, xaa Ammon. Nu msaaw xaa re xaa yezh Jabes naz Galaad. Zee nzhé re xaa Jabes lo Nahas:—Yaan re be zee gak nu xaa nke zhiin lo lu.
2 Zee mkeb Nahas xaa Ammon nu nzhé xaa:
—Yaan re be nzhaal ko na zaalo gu lad li zee ton gu nu ton rese xaa Israel.
3 Zee nzhé re xaa gol, xaa Jabes:
—Zaa gazh mbizh zee xaal nu xaa ya dubse Israel, cheleeya nyent cho le yud nu zee yiid nu le nu yud gu.
4 Gorna mzhin xaa mxaal xaa naz Gabaa lo Saúl nu nzhé xaa kwaane lo re xaa yezh, rese xaa yezh mbinn. 5 Nu gorna nyaadno Saúl ngoon ngwa wen zee ngunabdizh xaa lo re xaa yezh cho kwaan ngok re xaa yezh nu cho zhiin nzhonn re xaa. Zee nzhé xaa re kwaan nzhé xaa Jabes lo. 6 Nu gorna mbin Saúl re kwaane, zee lee Mbi Naban cheen Dios ngunabeyy lo xaa zee ngu nayii doo xaa. 7 Zee mbit xaa chop la ngonn, nu mle byog xaa ma nu mxaal xaa ngulaa ma lo rese yezh cheen Israel, nu nzhé xaa: "Modxa mle na kwaan ngoon ne, snee le na loka cho nazhaalt kwaan rop na Samuel". Zee mzheb doo re xaa ngune Xaa Tubka Nak, zee rese xaa mroo ngwa lo dil. 8 Nu mtoop Saúl re xaa naz Bezec; nu ngu chon gayoo mil soldad xaa Israel, nu galbchii mil xaa Judá. 9 Zee nzhé re xaa lo xaa ngulaa abis:
—Guzh lo re xaa Jabes naz Galaad, yee rolta mbizh koo nu gu lo re xaa nayii ne gu.
Zee ngwa re xaa nzhéya lo re xaa Jabes nu nix doo ngok lextoo re xaa Jabes. 10 Zee nzhé re xaa Jabes lo re xaa nayii ne xaa:
—Yee zhaal re be zee le gu kwaan nzhekla gu lo nu.
11 Zee stub mbizh, nguni yizhyo, zee mle Saúl re xsoldad xaa chon tant. Nu mzhaal re xaa paro mbaz re xaa Ammon, nu mdil re xaa axta rolta mbizh. Zee lee re xaa mlake mrech nu namzhaalt re xaa tubka.
12 Zee nzhé re xaa yezh lo Samuel:
—¿Cho xaa nanzheklat gak Saúl rey lo re nu? Né nel choya, zee gut be xaa.
13 Zee nzhé Saúl lo re xaa:
—Nyent cho yet nalzhe, nel Xaa Tubka Nak mloo re xaa Israel lo xaa nayii ne xaa.
14 Zee nzhé Samuel lo re xaa yezh:
—Te re gu zee ya be naz Gilgal zee le be kwaan myaan be, lee Saúl nak rey lo be.
15 Zee ngwa re xaa naz Gilgal lo Xaa Tubka Nak, zee myaan re xaa stub welt lee Saúl gak rey nu mted xaa gon kwaan kwi wen xaa, zee nix doo ngok lextoo re Israel mbizh zee.