Samuel mzaa yalnabeyy lo Saúl
12
Zee lee Samuel nzhé lo re xaa Israel:—Mbin na kwaan né gu nu mza na tub rey, xaa nabeyy lo gu. 2 Lee nal nkanola gu rey, xaa nabeyy lo gu. Lee na ngoxla na nu nzeb doo rus yich yek na; nu lee xgaan na nzo lo gu. Na mzo lo gu dubse leezha mad na nu axta nal. 3 Lee na nzoka lo gu nal. Né gu che mzen na tub la xkoon gu o tub xngwes gu o mle na tub kwaan nawent lo tub gu o mted na yalzi lo tub xaa, nu nixa namkayaat na demi xlaan mod né guya lo na delant lo Xaa Tubka Nak nu delant lo xaa mleey xaa zee kix na kwaan nzeeb na lo gu.
4 Nzhé re xaa:
—Nixa namlet lu nales nu, nu nixa namlet lu kwaan nawent lo nu, nu nixa namzent lu demi lo nu.
5 Zee Samuel nzhé lo re xaa:
—Xaa Tubka Nak, nak testig nu noka xaa mleey xaa nak testig nalzhe ke nik tub kwaan nawent nanguzhalt gu lo na.
—Sbaa naka —nzhé re xaa.
6 Zee lee Samuel nzhé lo re xaa yezh:
—Xaa Tubka Nak mleey Ches rop Aarón, xaa mloo re xey be naz yizhyo Egipto. 7 Kwaanzee kenzha gu nal delant lo Xaa Tubka Nak, za na kwent klar lo gu lo re kwaan mle xaa lo be nu re kwaan mle xaa lo re xey be xaa yilo. 8 Gorna lee Kob ngulo mya naz yizhyo Egipto zee mzhin mbizh lee re xey be ngunii lo Xaa Tubka Nak, zee mxaal xaa Ches rop Aarón zee mloo xaa re xey be naz yizhyo Egipto zee ngu re xaa yizhyo ne. 9 Per lee re xaa myenlazh xaa Xaa Tubka Nak, xaa nak Xtios xaa nu lee xaa mzaa re xaa lo Sísaraa, xaa nabeyy lo soldad cheen Hazor nu lo re xaa Filisteab nu lo rey cheen yizhyo Moabc zee mdil re xaa. 10 Zee ngunii re xaa lo Xaa Tubka Nak nu nzhé re xaa: "Mle nu jwalt lo lu nel mlaa nu lu nu mbill nu lo dios Baal nu lo dios Astoret, lee nal ble yud nu lo re xaa nayii ne nu zee gool nu nebse lo lu". 11 Zee lee Xaa Tubka Nak mxaal Jerobaald, Barace, Jeftéf nu nag, mle nu yud gu lo re xaa nayii ne gu zee wen yo gu. 12 Per gorna ngune re gu lee Nahas, xaa nak rey lo re xaa Amón nzhekla dil kwaan re gu, zee ngunaab gu tub rey lo na, xaa nabeyy lo gu nu nela gu lee Xaa Tubka Nak, xaa nak Xtios gu, nak rey lo gu. 13 Lee rey xaa mleey gu nzo nee. Lee Xaa Tubka Nak mzaa rey, xaa ngunaab gu. 14 Chelee gu nu rey, xaa nabeyy lo gu, zheb ne Xaa Tubka Nak, nu gool gu lo xaa nu le gu kwaan nzhé ley cheen xaa nu nali zo gu lo xaa, wen ded gu. 15 Per chelee gu nagont gu xtizh xaa nu nalet gu kwaan nzhé ley cheen xaa, zee lee yalnayii cheen xaa la tich gu modxa mlaya tich re xey be, xaa yilo.
16 &Lee nal bwii wen gu kwaan rop garlo gu lo kwaan gro doo kwaan le Xaa Tubka Nak. 17 Nal nanakt mbee kwaan nla yey, nak mbee kwaan toop xaa yalgon cheen nzhobxtil. Na nii lo Xaa Tubka Nak, zee xaal xaa yey nu balngwzi zee ne gu xana jwalt gro kwaan mle gu lo xaa gorna ngunaab gu tub rey, xaa nabeyy lo gu."
18 Zee ngunii Samuel lo Xaa Tubka Nak zee mxaal xaa balngwzi nu yey mbizh zee nu rese xaa yezh mzheb doo ngune Xaa Tubka Nak, nu mzheb doo re xaa ngune Samuel. 19 Zee nzhé re xaa yezh lo Samuel:
—Gunii lo Xaa Tubka Nak xaa nak Xtios lu kwent cheen re nu, xaa nak xmos lu, zee nayeta nu nel mle nu jwalt ngunaab nu tub rey, xaa nabeyy lo nu.
20 Per lee Samuel nzhé lo re xaa:
—Nazhebt gu. wlipa mle gu kwaan nawent; per nabachit gu lo Xaa Tubka Nak, sinka bil gu lo xaa kwaan dub lextoo gu. 21 Nawiit gu lo maj kwaan nyent mod le yud gu nel sbaasa naka. 22 Xaa Tubka Nak kwaan gro doo yalnkela cheen xaa nalaat xaa yezh cheen xaa nel nzhekla xaa gu gak yezh cheen xaa kwaan ngwii doo xaa respet lo. 23 Nalaat na ni na kwent cheen gu lo Xaa Tubka Nak. Chelee na laa na ni na kwent cheen gu naka tub jwalt. Na tubka seed na gu zo wen gu nu yo gu nali lo xaa. 24 Kwaan le re gu nak zheb gu ne gu Xaa Tubka Nak, nu gool gu lo xaa kwaan dub lextoo gu nu selazh gu re kwaan gro kwaan mle xaa lo gu. 25 Per chelee re gu nu rey cheen gu seetaka le kwaan nawent telise lux gu.