Dios nzaa yalnabeyy lo rey
Tub salm kwaan mkee David.
110
Lee Xaa Tubka Nak,
nzhé lo Xaa Nabeyy lo na:
“Zob lad li lo na,
axtaka chezhin na rese xaa nayii ne lu,
zee kichxub xaa lo lu
nu zhiib lu nii lu tich xaa.”a
2 Xaa Tubka Nak,
xaal nabeyy lu Jerusalén
nu zaara xaa yalnabeyy lo xpaston lu,
¡Kwaanzee nabeyy lu axta lo rese xaa nayii ne lu!
3 Zhe kwaan dil lu,
lee rese xaa lu kwi lo lu,
nel sbaasa nzhekla xaa.
Gak xaa ler chul cheen xaa kwaan nambey
nu luu xaa kwenta xni mbizh gorna kaxni yizhyo.
Kwentaxa nla gop dubse yizhyo yizata garziil,
sbaa gak re xaa lu,
nu gak xaa mod tub xaa yeen.
4 Lee Xaa Tubka Nak mcheroo
nu nacheet xaa xtizh xaa:
“Lu nak ngwleyy tira mod Melquisedec.”b
5 Lee Xaa Nabeyy nzo lad li lo lu;
telise luux xaa re rey lo yizhyo zhe kwaan yii xaa.
6 Naab xaa kwent lo rese yezh;
nu kwek bdook xaa re xaa ngut;
taazh xaa yek rese rey,
xaa dubse yizhyo.
7 Roo yuu go xaa nis gorna nzha xaa naz,
zee kano xaa jwers zee tira le xaa gan lo dil.