Naab na zee kanap Dios na
Salm kwaan mkee David, nu mzaa xaaya lo xaa nabeyy lo re xaa nzholl. Nzhaal gool xaa kant ne kwaan ton cheen “Naluuxt lu”.
Gorna mxonn xaa lo Saúl nu ngu xaa leen yeer.
57
Xtios na,
blesla lu ne lu na,
blesla lu ne lu na,
nel nebse lo lu ngwii na
nu yolaan na xan xiil lu,
axta gorna yilo ded re yalzi.
2 Ni na lo Dios,
Xaa Nzob Naz Yiba,
Dios xaa nle yud na lo rese kwaan.
3 Naz yiba yiid lu le lu yud na
nu koo lu na lo re xaa nawent nak.
{Mbaz}
¡Dios xaal yalnkela nu kwaan wli lo na!
4 Nzo na xsaw lo re xaa naras,
lo re xaa nak kwenta mbezh,
ma nzhaw xaa.
Lee keleyy xaa nzhak kwenta wez nu stak,
lee luzh xaa nak kwenta spad kwaan ndox doo lo.
5 ¡Lee lu Dios,
non doo lu naz leen yiba
nu yalnabeyy cheen lu nzho dubse lo yizhyo!
6 Mzob xaa yex zen xaa na
nu nzak na nguga na leen yex
nu mdeen xaa tub yeer paro deed na zee la na leena,
per leeka re xaa nak xaa mla leena.
{Mbaz}
7 Xtios na,
nali nak lextoo na lo lu,
listla nzo na gol na salm lo lu.
8 Yixche na nu gol na lo lu kwaan bagwel kwaan nkano chiibchop yib
nu yixche na garziil zee gol na lo lu kwaan bagwel kwaan nkano chii yib.
9 Xaa Nabeyy lee na gol lo lu delant lo re xaa,
gol na salm lo lu delant lo re yezh,
10 Gro doo nak yalnkela cheen lu,
nzhina axta yiba
¡nu axta lo xkaw nzhin xtizh lu kwaan wli!
11 ¡Lee lu Dios,
non doo lu naz leen yiba
nu yalnabeyy cheen lu nzho dubse lo yizhyo!