Ngwii na lo Dios
Salm kwaan mkee David nu mzaa xaaya lo xaa nabeyy lo re xaa nzholl. Nzhaal gool xaa kant ne kwaan ton cheen “ngolche ma nzho leen re yag zin”.
Leezha mzen re xaa Filistea David yezh Gat.
56
Xtios na blesla lu ne lu na,
nel nzho xaa nzhekla renal na,
yizata mbizh nchaldil xaa na.
2 Yizata mbizh nzhekla xaa zaa xaaya yenn na;
¡zyen doo xaa nto yalxwa,
xaa ndil kwaan na!
3 Per gorna nzheb na,
zee ngwii na lo lu.
4 Xtios na,
ngwii na lo lu nu gol na lo lu kwent cheen xtizh lu;
Xtios na,
ngwii na lo lu nu nazhebt na.
¿Cho kwaan nzho mod le tub myet,
xaa sbaasa lo na?
5 Yizata mbizh nchee xaa kwaan nii na zee le xaa kwaan nawent lo na
nu nebse nle xaa xgab le xaa kwaan nawent lo na.
6 Nkasa xaa nu nkaxlaan xaa,
zee ngwii xaa ne paro deed na
nu nkambaz xaa gut xaa na.
7 ¡Xtios na,
bted xaa bid lo re kwaan nawent kwaan kale xaa,
lo yalnayii cheen lu,
koo xkalnto re xaa ne!
8 Lu ne lak welt mbinn na;
lu mlo nis kwaan mbinn na leen tub mbud
nu mkee luya lo xkech lu.
9 Xoon re xaa nayii ne na,
mbizh kwaan naab na yud lo lu;
na ne wen Dios nzo kwaan na.
10 Ngwii na lo Dios nu gol na lo xaa kwent cheen xtizh xaa;
ngwii na lo Xaa Tubka Nak,
nu nzholl na lo xaa kwent cheen xtizh xaa.
11 Ngwii na lo lu Xtios na,
nu nazhebt na.
¿Cho kwaan nzho mod le tub myet xaa sbaasa lo na?
12 Xtios na,
kwaan myaan na lo lu,
le naya
nu za na dixkix lo lu,
13 nel lu mloo na lo yalgut
nu namlaat lu mralnii na,
zee zee na lo xni cheen yalnaban cheen lu,
xaa nak Xtios na.