Lo re mig xaa nkade
Salm kwaan mkee David, nu mzaa xaaya lo xaa nabeyy lo re xaa nzholl. Maskil*.
55
Xtios na,
kenzha kwaan nii na;
nakaxlaant lu,
ble kwaan nii na.
2 Kenzha nu keb lo na.
Kwaan wdizh nii na,
nel nayetra na lo yalnales.
3 Lee re xaa nayii ne na nii nawent na,
nales nzhak lextoo na ne na re kwaan nle xaa nakap
nu mzhib xaa re yalnakap cheen xaa tich na
nu kwaan yalxyan nrenal xaa na.
4 Ne doo lextoo na
nu nzheb doo na ne na yalgut.
5 Nxiz na gorna zhin yalnacheb lo na.
6 ¡Chol kano na xiil mbex,
zeesi nzho mod zobi na nu zhin na paro kwaz na!
7 ¡Nu xon na zit doo,
zee lake na yoo na yizhyo bizh!
{Mbaz}
8 Le na prad xon na nu kaxlaan na
lo mbi kwaan nyaadno yey nu mbi dox.
9 ¡Xaa Nabeyy,
bluux re xaa!
¡Nu ble net luzh xaa!
Nel nebse ne na nzhedizh nawent xaa wechxinn xaa
nu nakap nak xaa nu ndil xaa leen yezh,
10 zhe nu yaal ngo xaa welt cho bla cheen yezh
nu naz xsaw yezh nzho kwaan nakap nu dil.
11 Naz leen yezh nzho kwaan nakap
nu tubka nkade re xaa leen re naz
nu nebse nkayoo xaa kwaan.
12 Chelee tub xaa nayii ne na le nawent lextoo na,
zyela na ne na xaa;
chelee tub xaa nakap yasya lo na,
nzho mod kaxlaan na lo xaa.
13 ¡Nel lu nak xaa mas nyen na,
xaa nze rop na,
wech na xaa nyen doo na!
14 Lu nu na,
chul doo nzhedizh be
nu tuka nya be garli Dios.
15 ¡Lee yalgut zhin lo re xaa ne!
¡Nu naban naban xaa la xaa leen baa,
nel kwaan nawent nzho lo re xaa!
16 Per lee na nii lo Dios,
nu lee Xaa Tubka Nak le yud na.
17 Garziil,
mzhel yizhyo nu mchool yizhyo,
nii na lo Dios nu lee xaa gon xtizh na.
18 Lee xaa koo na lo dil
nu lee xaa le zee wen yoo na,
nixa zyen doo xaa nayii ne na.
19 Dios gon xtizh na nu le nadoo xaa xaa nakap,
nel lee xaa tira nak Rey,
{Mbaz}
Nel nazheet mod nak re xaa nakap ne,
nixa nanzhebt xaa ne xaa Dios.
20 Nanlet xaa kwaan nyaan xaa
nu nkee xaaya yek xaa wen ngok lo xaa.
21 Nu mod chul doo nzhedizh xaa,
nak kwenta ze,
per lee xgab cheen xaa nak nebse le xaa gan lo dil.
Naguuzh doo nak xtizh xaa,
kwenta nseyt,
per wlipa leeya nak mod kuchi kwaan nanzhot leen xked.
22 Per lu laa re xgab lo Xaa Tubka Nak,
zee lee Xaa Tubka Nak zo nye lu
nu tira naleyaat xaa re xaa nali nak.
23 Xtios na,
rese xaa nzhut nu xaa nkade,
nazhint xaa ni rol liin kwaan nzhaal ban xaa
nu lebi lu xaa axta xan baa;
per lee na ngwii nebse lo lu.