Nzho tub Dios, xaa naab kwent
Salm kwaan mkee David. Nzhaal gool xaa kant ne kwaan ton cheen “Naluuxt lu”.
58
Re gu,
xaa non,
¿che nali naab gu kwent?
¿Che nali naab gu kwent lo re myet?
2 Re kwaan nawent kwaan nle gu xgab le gu,
nle guya
nu gu nle kwaan nakap nu nzhaxena leen yezh.
3 Gorna zeeraka gal xaa lee xaa nakla xaa nakap;
nzhoka xaa lextoo xnaa xaa,
lee xaa nakla xaa nkade.
4 Nayii doo re xaa ne kwenta mball wiz;
nle xaa mod tub xaa nanzhonta,
mod mball ma nanzhonta,
5 nanzhont ma xtizh re xaa nsegan yek ma,
nixa nzhak doo xaa yalwezh.
6 Xtios na,
¡naab na zee kiib lu ley re xaa ba!
Xaa Tubka Nak,
¡bluux kolmi cheen re mbezh yeen ba!
7 Yetlo xaa mod nis kwaan nxonn;
¡lee kwaan nkee xkwez xaa gak rol gorna kee xaaya!
8 ¡Gak xaa mod karakol,
ma nzhak nis!
¡Gak xaa mod mad nzhalyet,
mad nanet lo xni mbizh!
9 ¡Gorna zeraka zeen xaaya,
lee xaa kayekla modxa nzhek yag yich bizh!
¡Nu mod nzhe mdun yag,
nixa naye naya o mbizha,
sbaa gak lo xaa ba!
10 Gak nix lextoo re xaa nali nak gorna ne xaa lee Dios naab kwent;
lebsii xaa nii xaa kwaan ren cheen re xaa nakap.
11 Sbaa zee ne re myet:
Wlipa nzho kwaan le xaa nali nak gan;
wlipa naab Dios kwent lo re myet.