Dios nak xaa nkanap na
Salm kwaan mkee David, nu mzaa xaaya lo xaa nabeyy lo re xaa nzholl. Nzhaal gool xaa kant ne kwaan ton cheen “Naluuxt lu”.
Gorna lee Saúl mxaal xaa mzob xlaan garli David zee gut xaa xaa.
59
Xtios na,
bloo na lo re xaa nayii ne na;
le yud na lo re xaa keeya yek na.
2 Bloo na lo re xaa nle kwaan nawent lo na,
le yud na lo re xaa nzhut myet.
3 Mzhaal re xaa ngezh doo
nu kambaz xaa gut xaa na.
Xaa Tubka Nak,
nixa nanarast na nu nanlet na jwalt;
4 nixa namlet na kwaan nakap.
¡Ble prad,
te le yud na!
5 Lu,
Xaa Tubka Nak,
Xaa Nkano Dubse Yalnabeyy;
Dios cheen Israel,
wii nu tezi rese yezh,
nalestla lu ne lu re xaa,
rese xaa nle kwaan nakap.
{Mbaz}
6 Mbare xaa yaal nu nxooy xaa kwenta mbak
nu nzaa xaa welt dub welt yezh.
7 Nebse bchiin nzhak roo xaa
nu nebse de nzhiib roo xaa
nu mbezh xaa:
“Nyent cho gona.”
8 Per lee lu,
Xaa Tubka Nak,
nxizhno lu re xaa
nu kan nxizh lu ne lu re yezh.
9 Xtios na,
kwaan yalngezh cheen lu nkanap lu na
nu lu nak Dios xaa nle yud na.
10 Lu nak Dios xaa nkela na,
nu nyaner lu lo na
nu nle lu zee wii na,
gorna nyayo re xaa nayii ne na.
11 Per naluuxt lu xaa,
zee nayenlazht re xaa lazh na xaa;
mas wen cheech chii xaa kwaan yalnabeyy cheen lu,
Xaa Tubka Nak,
xaa nsaaw na mod tub lee yiib.
12 Nebse jwalt nroo roo xaa,
lo re wdizh kwaan nroo roo xaa,
zee la xaa leen tramp cheen yalxwa cheen xaa,
nel nebse nkade xaa nu nge xaa.
13 Bluux re xaa kwaan yalnayii cheen lu,
bluux re xaa zee nazotra xaa nee;
snee zee ne re xaa lee Dios cheen Kob nak xaa nabeyy
nu nabeyy xaa lo dubse yizhyo.
{Mbaz}
14 Mbare xaa yaal nu nxooy xaa kwenta mbak
nu nzaa xaa welt dub welt yezh.
15 Nazre nu nazba nya xaa nkwaan xaa kwaan gaw xaa;
nebse mbazhe xaa,
nel nanyalot nyazhe lextoo xaa.
16 Per lee na gol lo yalngezh cheen lu
nu lee garziil gol na lo yalnkela cheen lu,
nel lu nak xaa nkanap na mbizh nales nzhak na
nu lu nak kwenta yoo ndok kwaan nsaaw na,
gorna nales doo nzhak na.
17 Lo lu gol na kant,
nel lu nak yalngezh cheen na,
Dios,
nel lu nak xaa nkanap na,
lu nak Dios,
xaa tubka nkela na.