Nii xaa lo Dios kwent cheen re xaa nayii ne xaa
Salm kwaan mkee David zee seed xaa re xaa, nu mzaa xaaya lo xaa nabeyy lo re xaa nzholl. Nzhaal gool xaa kant ne kwaan ton cheen “Yeey kartuch cheen trat”.
Gorna lee David mroo mdil kwaan re xaa Aram, xaa nzho Naharaim nu Soba, zee mbare Joab lo dil pa mbit xaa chiibchop mil xaa Edom naz Lach cheen Zed.
60
Xtios nu,
lo yalnayii cheen lu mlaa lu nu,
mlaa lu nu nu namlet lu yud nu;
bare lo nu nal.
2 Mle lu mgun yizhyo nu mxala;
¡saaw re bech kwaan mke choya nel zluxa!
3 Mle lu wii nu,
yezh cheen lu,
lo re kwaan naxinn;
mle lu ngu nu xis ub kwaan mle nachan yek nu.
4 Mlu lu nseyn lo re xaa nzheb ne lu,
zee nagalt nu wez kwaan nkee xaa yenn nu.
5 ¡Ble yud nu kwaan yalnabeyy cheen lu!
¡Bkeb zee nzho mod le lu yud nu!
6 Dios ngunii axta pa nak leen li xaa:
“Gak nix lextoo na kiiz na yizhyo Siquem
nu za na yizhyo Lach cheen Sucot lo re xaa na.
7 Cheen na nak yizhyo Galaad
nu cheen na nak Manasés;
Efraín nak kwaan nsaaw yek na
nu Judá nak bastona kwaan nzho yaa na.
8 Moab nak chee kwaan nyanag na leen;
lo Edom nlebi na xkelyed na
nu nkee na bi nel mle na gan lo re xaa Filistea.”
9 ¿Cho wee na lo yezh kwaan nyaaw bla?
¿Cho wee na zee zeeb na leen yezh non cheen yizhyo Edom?
10 Telise luya Xtios na;
per mlaa lu nu nu nanyatra lu kwaan re xsoldad nu lo dil.
11 Ble yud nu lo xaa nayii ne nu,
nanont yud cheen re myet.
12 ¡Kwaan yud cheen Dios telise le be re kwaan gro;
lee xaa taazh tich re xaa nayii ne be!