Wii na lo Dios, zee kanap xaa na
Salm kwaan mkee David, nu mzaa xaaya lo xaa nabeyy lo re xaa nzholl. Nu nzhaal gool xaaya kwaan bagwel.
61
Xtios na,
kenzha xtizh na;
bin kwaan nii na.
2 Nii na lo lu,
axta paro mas zit lo yizhyo,
gorna nales nzhak na.
Be na lo ke kwaan nzeb yara lo na.
3 Nel lu nak xaa nkanap na
nu lu nak kwenta yoo ndok,
kwaan nsaaw na lo re xaa nayii ne na.
4 Nzhekla na tira yoo na leen li lu
nu nyent cho gak na yoo na xan xiil lu.
{Mbaz}
5 Xtios na,
lu mbin kwaan myaan na
nu mzaa lu kwaan yizo na,
tubka kwaan rese xaa nzheb ne lu.
6 Zaa lu zyen mbizh lo rey
nu ban xaa zyen doo liin.
7 Nzhekla na tubka nabeyy xaa kwaan yalwen cheen lu;
Dios,
kanap lu xaa kwaan yalnkela nu kwaan yalwli cheen lu.
8 Snee zee tubka gol na lo lu
nu yizata mbizh le na kwaan myaan na kwaan lu.