Nebse Dios nak xaa nkanap na
Salm kwaan mkee David, nu mzaa xaaya lo Jedutún, xaa nabeyy lo re xaa nzholl.
62
Nebse lo Dios yizhal na yalnix;
nebse lee xaa nzho mod le yud na.
2 Nebse lee xaa nak ke kwaan nsaaw na nu nak xaa nle yud na,
nu lee xaa nak xaa kwaan nsaaw na zee naruzht nii na.
3 ¿Axta cho gor le re gu xgab nayaantra gu gaazh gu kwaan tich na
nu luux gu na mod tub bla kwaan mer baxche
nu mod tub yilo kwaan mer yachinn?
4 Nebse nzhekla gu luux gu na
nyakla gu nkade gu;
wen nii gu kwaan roo gu,
per naz leen lextoo gu nzhiib xyan.
{Mbaz}
5 Nebse lo Dios yizhal na yalnix;
nebse lee xaa nkambaz na.
6 Nebse lee xaa nak ke kwaan nsaaw na nu nak xaa nle yud na
nu lee xaa nak xaa nkanap na zee naruzht nii na.
7 Nebse lo Dios nzho yalnaban cheen na nu yalnix cheen na;
Dios nak ke kwaan nsaaw na,
kwaan nye doo nak nu nak pa yo laan na.
8 Yezh cheen na tubka wii gu lo Dios
nu gunii gu kwaan dub lextoo gu lo xaa.
¡Dios nak kwaan nsaaw be!
{Mbaz}
9 Rese myet,
nexa chol rik xaa o chol prob xaa,
nebse mod ngob xaa tub mbi nak re xaa
nu chol lal chiix xaa re xaa lo xobex zee ne xaa nyent cho nak xaa.
10 Nawiit gu lo kwaan nakap,
nixa lo re demi kwaan nawent nle gu gan;
chelee gu mzhin gu ngok gu rik,
nawiit gu loya.
11 Dios ngunii tub welt;
chop welt mbin na kwaane:
“Cheen Dios nak yalnabeyy
12 nu cheen lu Xaa Nabeyy nak yalnkela;
lu kix lo kad tub xaa lo re kwaan mle xaa.”