Yech gaay
(Salm 107-150)
Dios koo xaa lo yalnales
107
Gool be lo Xaa Tubka Nak,
nel wen nak xaa,
nel tubka nkano xaa yalnkela.
2 Yé be lee Xaa Tubka Nak,
nak xaa mle yud be,
lee xaa mloo be lo yalnabeyy cheen re xaa nayii ne be.
3 Lee xaa mtoop be lo re yezh lo yizhyo,
naz pa nlen mbizh nu naz pa nyaaz mbizh,
naz ta yat nu naz ta ya.
4 Mzewen xaa gorna mkanze xaa yizhyo bizh
nu nanguzhalt xaa naz,
nixa nanguzhalt xaa yezh pa yo xaa.
5 Ngok nlaan xaa nu ngok nzhek lextoo xaa
nu mer doo nget xaa.
6 Lo yalnales cheen xaa ngunii xaa lo Xaa Tubka Nak
nu lee xaa mloo xaa lo yalnales.
7 Mbe xaa xaa tub naz nali,
zee zhin xaa tub yezh pa yo xaa.
8 Zaa be dixkix lo Xaa Tubka Nak,
lo yalnkela cheen xaa,
lo re kwaan gro kwaan mle xaa lo re xaa,
9 nel lee xaa nzaa kwaan nzho re xaa nzhek lextoo
nu nzaa xaa kwaan nzhaw re xaa nlaan.
10 Lak xaa nzho lozhyib lo yalnakaw cheen yalgut,
nzho xaa lo yalnales nu nkadoo xaa kwaan kaden.
11 Nel nambint xaa xtizh Xaa Tubka Nak
nu namlet xaa kas kwaan mlaa Xaa Nzob Naz Yiba.
12 Kwaanzee bid mted Dios xaa lo zhiin;
mla xaa lo yo nu nyent cho mle yud xaa.
13 Lo yalnales cheen xaa ngunii xaa lo Xaa Tubka Nak
nu lee xaa mloo xaa lo yalnales,
14 Mloo xaa xaa lo yalnakaw cheen yalgut
nu byog mle xaa xkaden xaa.
15 Zaa be dixkix lo Xaa Tubka Nak,
lo yalnkela cheen xaa,
lo re kwaan gro kwaan mle xaa,
16 Lee xaa mluux roo lozhyib kwaan nak brons
nu mle byog xaa re kwaan nak yiib.
17 Ngok nachan xaa lo re xjwalt xaa
nu mded xaa bid lo re kwaan nakap
nu lo re kwaan nawent kwaan mle xaa.
18 Nyent mod ngaw xaaya
nu mzhin xaa axta lo yalgut.
19 Lo yalnales cheen xaa ngunii xaa lo Xaa Tubka Nak
nu lee xaa mloo xaa lo yalnales.
20 Mxaal xaa xtizh xaa nu msekwen xaa xaa
nu mloo xaa xaa leen baa.
21 Zaa be dixkix lo Xaa Tubka Nak,
lo yalnkela cheen xaa,
lo re kwaan gro kwaan mle xaa.
22 Nzhaal zaa xaa gon kwaan nzholl xaa
nu kwaan yalnix nzhaal nii xaa re kwaan mle Dios.
23 Rese xaa nzeno bark leen nistoo
nu nle xaa negos leen nis nal,
24 ngwii xaa kwaan nle Xaa Tubka Nak,
kwaan gro kwaan nle xaa leen nis nech.
25 Ngunii Dios,
zee mroo tub mbi dox,
kwaan mzhitno nistoo.
26 Mbe nis xaa naz ya
nu mbe nis xaa naz yat
nu mzheb doo xaa lo re kwaan nakap.
27 Nxiz xaa nu naz ne naz ba nzhak xaa kwenta nguy
nu namlet yalnzhak cheen xaa sirb lo xaa.
28 Lo yalnales cheen xaa ngunii xaa lo Xaa Tubka Nak
nu lee xaa mloo xaa lo yalnales.
29 Mle xaa mbi dox cheepse,
zee zheta ngok nistoo.
30 Zee ngok nix lextoo xaa,
nel mlaz nis nakap
nu mbe Dios xaa lo yizhyo pa nzhekla xaa ya xaa.
31 Zaa be dixkix lo Xaa Tubka Nak,
lo yalnkela cheen xaa,
lo re kwaan gro kwaan mle xaa lo re xaa.
32 Nzhaal gool xaa lo xaa,
paro nkasa re xaa yezh,
nzhaal gool xaa lo xaa,
paro nkasa re xaa gol.
33 Dios nsekwiizh yuu nu nle xaaya yizhyo bizh
nu noka xlen nle xaa yizhyo bizh.
34 Lee yizhyo wen nle Dios zee nazaata kwaan,
lo re kwaan nawent kwaan nle xaa.
35 Lee yizhyo bizh nle xaa nzhi yal nis
nu lee yizhyo bizh nle xaa xlen.
36 Baa mbiidno Dios xaa nlaan
nu mlek xaa yezh pa yo xaa.
37 Nxeen xaa kwaan naz wen nu nzo xaa yag ub,
zee ntoop xaa xle
nu ntoop xaa zyen doo yalgon.
38 Dios ngunii wen lo xaa nzhak zyen xinn
nu nzhak zyen doo xma.
39 Zeera ngok nazyent xaa nu ngok prob xaa,
nel re xaa nayii ne xaa mluux xaa nu mtezi xaa xaa.
40 Dios nankayaat re xaa non
nu nlaa xaa nzowen xaa yizhyo bizh pa nyent naz.
41 Ngoo xaa xaa prob lo yalnales
nu nle zyen xaa sawlizh xaa,
kwenta mbakxiil.
42 Gorna ne re xaa nali nak kwaane zee gak nix lextoo xaa
nu lee xaa nakap saaw xaa roo.
43 Xaa nkano yalnzhak,
nzhaal kozhaw xaa kwaane
nu la yek xaa gro nak yalnkela cheen Xaa Tubka Nak.