Re xaa Israel, xaa nambint diizh
106
¡Gool be lo Xaa Tubka Nak!
¡Zaa be dixkix lo Xaa Tubka Nak,
nel wen nak xaa;
nel tira nak yalnkela cheen xaa!
2 ¿Cho nzho mod ne re kwaan gro kwaan mle Xaa Tubka Nak?
¿Cho gool lo xaa mod nzhaal gool xaa lo xaa?
3 Wen re xaa kwaan nle kwaan wli
nu tubka nle xaa kwaan wen nak.
4 Xaa Tubka Nak,
selazh na,
gorna wen le lu lo yezh cheen lu,
gorna yiid lu le lu yud nu.
5 Zee wii na lo kwaan wen cheen xaa mleyy lu,
zee gak nix na kwaan yalnix cheen yezh cheen lu,
Zee gak nix na lo re xaa kwaan mlake lu.
6 Mle nu jwalt leeka mod mle re xey nuya;
mle nu kwaan nawent,
mle nu kwaan naxinn.
7 Re xey nu,
xaa ngu naz Egipto,
namwiit xaa lo re kwaan gro kwaan mle lu;
myenlazh xaa yalnkela cheen lu
nu ngok ned xaa ne xaa lo lu roo Nistoo Naxne.
8 Per Xaa Tubka Nak,
mle yud xaa kwaan yalnkela cheen xaa,
zee luu yalnabeyy cheen xaa.
9 Mgalno xaa nistoo nu mle xaa mbizha,
mle xaa mded xaa pa nech leen nistoo modxa nded xaa lo yizhyo bizh.
10 Mle lu yud xaa lo re xaa nayii ne xaa
nu mloo lu xaa lo re xaa nayii.
11 Mlaw re xaa nayii ne xaa leen nistoo
nu nik stub re xaa namlaket.
12 Kwaanzee mle re xaa krer xtizh xaa
nu mbill re xaa lo xaa.
13 Lijer doo myenlazh xaa re kwaan mle xaa
nu namlazt xaa mbin xaa xkonsej xaa.
14 Yizhyo bizh nle xaa xgab kwaan nzhekla xaa,
nle xaa preb Dios nu naab xaa kwaan nzhekla xaa.
15 Lee xaa mzaa kwaan ngunaab xaa,
per mxaal xaa tub yalyizh lo xaa.
16 Leezha mzo xaa wen pa mbaz xaa,
ngok mbidyos xaa Ches
nu noka Aarón,
xaa nambey ngok lo Xaa Tubka Nak.
17 Kwaanzee mxal yizhyo nu mdeba Datán
nu myaaw yizhyo tich re xaa nzhake tich Abiram.
18 Nu mla bal tich stub naz re xaa
nu noka mzek ki re xaa nakap.a
19 Yi Horeb mdexkwaa re xaa tub la ngoon yeen,
mkich yek re xaa lo maj kwaan nak yiib.
20 Mlaa xaa namlet xaa respet Dios,
zee mbill xaa lo tub maj kwaan nak tub la ngoon ma nzhaw yix.
21 Myenlazh xaa Dios xaa mle yud xaa,
xaa mle re kwaan gro naz Egipto,
22 re kwaan gro kwaan mle xaa yizhyo Cam
nu re kwaan mdedyall re xaa mle xaa Nistoo Naxne.
23 Dios ngunii zee luux xaa xaa,
per namlaat Ches,
xaa mleyy Dios,
ngle xaaya,
mle xaa zee naluuxt xaa xaa lo yalnayii cheen xaa.b
24 Per nanzheklat xaa yo xaa yizhyo wen,
nel namlet xaa krer xtizh Dios.
25 Leen li xaa yoo ler,
nzhedizh nawent xaa Xaa Tubka Nak
nu nambint xaa xtizh xaa.
26 Zee mlep xaa yaa xaa nu nzhé xaa lo re xaa,
zee gut xaa xaa yizhyo bizh,c
27 nu yet re xtii xaa re yezh zit
nu cheech xaa xaa dubse yizhyo.d
28 Sbaa mkasa xaa lo dios Baal Peor,
nu ndaw xaa ma kwaan mted xaa lo dios ngut.
29 Re kwaan nawent kwaan mle xaa,
zee nayii Dios,
zee mxaal xaa yalzi lo xaa.
30 Per tub xaa le Finees ngunaab xkwent xaa,
kwaanzee mlaz yalzi.
31 Kwaane nzeet xaa xaa tub mod nali,
lo tub dii nu lo stub dii.e
32 Noka mle xaa nayii Dios lo nis cheen Meriba;
xkwent re xaa ngunayii Dios ne Ches,
33 per ngok ned xaa
nu namlet Ches xgab re kwaan nzhedizh xaa sbaasa.f
34 Namluuxt xaa re xaa re yezh,
modxa ngunabeyy Xaa Tubka Nak le xaa.
35 Mzhaal xaa kwaan re xaa re yezh
nu mseed xaa re kostumbr cheen xaa.
36 Nzholl xaa lo re xmaj xaa,
kwaan ba nak tramp kwaan mla xaa lo.g
37 Mted xaa re xgann xaa nu re xchaap xaa lo re mbi mal.h
38 Mxo xaa ren cheen re xaa namlet jwalt,
ren cheen re xgann xaa nu cheen re xchaap xaa.i
Mted xaa xinn xaa lo maj cheen Canaán
nu naxinn nguna yizhyo lo ren.
39 Gorna ngulo mle xaa re kwaane,
zee ngok beed xaa lo kwaan mle xaa,
nel sbaa ngok xaa mod me mto cho lo re kwaan mle xaa.
40 Lee yalnayii cheen Xaa Tubka Nak,
mla tich yezh cheen xaa
nu mzere xaa lextoo xaa ne xaa re xinn xaa.
41 Kwaanzee mzaa xaa xaa lo re xaa stub re yezh,
mlake xaa lo yalnabeyy cheen xaa nii nawent xaa.
42 Re xaa nayii ne xaa mtezi xaa,
nel mzaa Dios xaa lo re xaa nayii ne xaa.
43 Zyen doo welt mle Dios yud xaa,
per lee xaa nambint xtizh Dios
nu lo re jwalt cheen xaa mlux xaa.
44 Dios mwii gorna nales nzhak xaa
nu mbin xaa kwaan ngunii xaa;
45 selazh xaa kwaan myaan xaa kwaan re xaa,
nu kwaan yalnkela cheen xaa mkano xaa yalnles.
46 Sbaaka mkano xaa yalnkela lo re xaa,
gorna ngune xaa xomod nayii re xaa ne xaa.j
47 Le yud nu Dios,
Xaa Tubka Nak,
ble zee bare nu lo yezh cheen lu,
zee gool nu lo lu nel nambey nak le lu,
zee gak nix nu gool nu lo lu.
48 ¡Wen doo nak Xaa Tubka Nak,
Dios cheen be,
xaa Israel,
tira nak xaa nu tubka nak xaa!
¡Yé rese be:
“Sbaa naka”!
Gool be lo Xaa Tubka Nak.