Kwaan gro kwaan mle Xaa Tubka Nak lo Israel
(1 de Cr. 16: 7-22)
105
Zaa be dixkix lo Xaa Tubka Nak,
¡zeet be le xaa!
yé be lo re yezh re kwaan mle xaa.
2 ¡Gool be salm lo xaa!
yé be re kwaan gro kwaan mle xaa.
3 Nix gak lextoo be,
nel nambey nak le xaa;
gak nix lextoo re be,
xaa kwaan nkwaan Xaa Tubka Nak.
4 ¡Kwaan be Xaa Tubka Nak,
nu yalnabeyy cheen xaa;
nu tubka kwaan be xaa!
5 Selazh be re kwaan gro kwaan mle xaa,
naro nak re kwaan mle xaa
nu re kwaan ngunii xaa.
6 Be,
xaa nak dii cheen Abraham,
xaa nak xmos xaa,
re xinn Kob,
xaa mleyy xaa.
7 Xaa Tubka Nak,
nak Xtios be;
dubse yizhyo nzho xtizh xaa.
8 Tubka nselazh xaa kwaan myaan xaa;
wdizh kwaan mxaal xaa nselazh xaa axta lo tub mil lo dii.
9 Nselazh xaa kwaan myaan xaa kwaan Abrahama
nu kwaan mcheroo xaa lo Chak.b
10 Noka mzaa xaaya lo Kob
nu kwaan myaan xaa tira lo Israel,
11 nu nzhé xaa:
“Lo lu za na yizhyo Canaán,
kwaan yizo re gu.”c
12 Gorna nazyent xaa
nu ngok xaa,
xaa zit lo yizhyo,
13 nya xaa tub yezh nu stub yezh,
ngunabeyy xaa tub pa nu stub pa.d
14 Namlaat Dios re xaa
nu mgalno xaa re rey kwent cheen re xaa.e
15 Nu nzhé xaa:
“Nagalt gu re xaa mleey na;
nu nixa nalet gu kwaan nawent lo xaa mxaal na diizh lo.”f
16 Dios mxaal win lo yizhyo
nu mluux xaa rese nzhobxtil.g
17 Mxaal xaa tub xaa le Che lo re xaa,
xaa mdo kwenta tub xaa nke zhiin.h
18 Mkado xaa nii xaa kwaan kaden
nu mlo xaa xaa lozhyib kwaan nak yiib.
19 Baa mzo xaa axta ngok kwaan ngunii xaa,
mer mbizh kwaan mle Xaa Tubka Nak mbarlo xtizh xaa.i
20 Ngunabeyy rey zee msela xaa xaa;
lee re xaa nabeyy yezh mlaa sbaasa nya xaa.j
21 Mzo xaa xaa zee nabeyy xaa garli xaa,
mzaa xaa yalnabeyy lo xaa.k
22 Zee mseed xaa xaa nu mlu xaa yalnzhak
lo rese xaa gol nu lo re xaa non.
23 Zee mzhin Israel Egipto,
nu kwenta xaa zit ngu Kob yizhyo Cam.l
24 Nu Dios mle zyen doo yezh cheen xaa,
masra lo re xaa nayii ne xaa
25 nu lee Dios mchee xgab cheen re xaa Egipto,
zee yii xaa ne xaa re xaa Israel.m
26 Mxaal xaa xmos xaa Ches
nu Aarón xaa mleey xaa.n
27 Nu lee re xaa ne mle kwaan gro
nu re kwaan gro kwaan ngok yizhyo Cam.
28 Mxaal xaa yalnakaw yizhyo nu nguna blana,o
per lee re xaa nambint xtizh xaa.
29 Nu lee nis mle xaa ren,
zee ngut mbal.p
30 Dubse xkizhyo xaa mri ran
nu ngu ma axta paro nzha rey.q
31 Ngunii Dios zee mzhin zyen doo ngruuzh
nu dubse yizhyo cheen xaa nguzhe ngeg.r
32 Kwenta yey msela xaa yuuke,
nu mxaal xaa balngwzi lo yizhyo.
33 Mluuxa re yag ub nu re yag ig,
nu mluuxa re yag kwaan nzeb wen.s
34 Ngunii Dios zee mzhin mbeso,
nu ngu zyen doo ma.
35 Ndaw ma rese yix wen,
nu rese kwaan nzaa yizhyo.t
36 Mbit xaa re xaa Egipto,
xaa ngol yilotlaka.u
37 Mloo xaa re xaa Israel kwaan plat nu kwaan or,
nu nyent cho ngok re dii cheen xaa.
38 Nix doo ngok lextoo re xaa Egipto lee re xaa mroo,
nel mzheb xaa ne xaa re xaa Israel.v
39 Mxaal xaa xkaw lo xaa zee zaaya xkal,
nu lee yaal mzaa bal xni zee nzho mod mze xaa.w
40 Ngunaab xaa kwaan gaw xaa,
nu lee xaa mxaal mtobex;
ndaw re xaa yat kwaan nze naz yiba,
axta paro nguzhe lextoo xaa.x
41 Mxal xaa cho ke lag nu mroo nis
nu mxonn nis lo yizhyo bizh.y
42 Nel mselazh xaa xtizh xaa kwaan nambey,
kwaan mzaa xaa lo xmos xaa Abraham.
43 Kwaan yalnix mroo yezh cheen xaa;
nix doo mroo re xaa mleyy xaa.
44 Dios mzaa xkizhyo re yezh lo xaaz
nu re zhiin kwaan mle re yezh mlake lo xaa.
45 Zee kozhaw xaa xtizh xaa
nu le xaa kwaan nii ley.
¡Gool be lo Xaa Tubka Nak!