Gool xaa lo Dios, xaa mdexkwaa rese kwaan
104
Gool be lo Xaa Tubka Nak.
Xtios na,
Xaa Tubka Nak,
aka gro nak lu;
nak lu ler kwaan chul nla xni cho.
2 Xni nak kwaan nzhak lu modxa nzhak xaa ler;
mdexkwaa lu yiba modxa nkee xaa lon.
3 Mdexkwaa lu li lu lo nis
nu xkaw nak karet kwaan nya lu lo dil,
lu nze lo mbi.
4 Mbi nak kwaan nzhe xtizh lu
nu lee luzh bal nak kwaan nle zhiin lo lu.
5 Lu mlek yizhyo paro nzob xana
nu baa tira nagunta.
6 Kwaan nistoo msaaw lu yizhyo,
modxa nsaaw ler cho xaa;
lee nis msaaw dubse yek yi.
7 Per lee lu mgalnoya zee nyaya
nu kwaan bi cheen ngwzi zee nyaya.
8 Mla nis yek re yi nu mlaya axta leen yuu
nu nyaya axta leen nistoo paro mle lu xgab kwiya.
9 Mle lu parota nzhaal zhin nistoo zee nyentra mod dedyoya,
zee nadedta yizhyo bizh stuba.
10 Lu nle nzhiib nis re pa,
zee nyaya leen yuu.
11 Nis ba nzho re ma nzho wen;
leeya nsaaw xkizhnzhek re ngwes wen.
12 Roo yuu ndexkwaa re myin xlaaz ma
nu nzholl ma zob ma re ram yag.
13 Nu mzaa lu xkaw zee nzooga re yi;
nu sbaa yizhyo nzaa xle nu chul nzaaya.
14 Lu nle nxen re yixwen nzhaw ngoon
nu re kwaan nzhaan myet,
zee toop xaa kwaan gaw xaa lo yizhyo:
15 xis ub kwaan nle nix lextoo xaa,
nseyt kwaan nle nla xni garlo xaa,
yat kwaan nzaa jwers lo xaa.
16 Re yag cheen Xaa Tubka Nak,
wen doo nyog,
re yag sedr cheen Líbano kwaan mzo xaa.
17 Baa dexkwaa re myin xlaaz ma,
nu lo re yag yech yo re myuz.
18 Yek re yi yo re chib wen
nu leen ke nkaxlaan re konej.
19 Lu mdexkwaa mbee zee gak bey xche mbee
nu lee mbizh nela cho gor nyaaz.
20 Lu nle nla yalnakaw gorna nzhak yaal,
zee nroo re ma wen.
21 Re mbezh yeen mbazhe gorna nlaan ma,
nu naab ma zee zaa Dios kwaan gaw ma.
22 Lee gorna nlen mbizh nya ma
nu nya ma nzha ma leen yeer cheen ma.
23 Zee lee re myet nroo nke zhiin
nu nke xaa zhiin axta mzhel yizhyo.
24 ¡Xaa Tubka Nak,
lakta kwaan mle lu,
mdexkwaa lu reya kwaan yalnzhak;
nguzhe re kwaan mdexkwaa lu lo yizhyo!
25 Baa nzho nistoo kwaan naro nu kwaan naxen,
pa nzhak zyen doo re ma win nu re ma naro,
ma nyent mod koo re xaa kwent.
26 Leen nistoo nze bark
nu noka Leviatána ngit leena.
27 Rese ma nkambaz lu,
zee zaa lu kwaan gaw ma gorna nlaan ma.
28 Lu nzaaya,
lee re ma ntoopa;
nzaa lu kwaan nzhaw ma nu lee ma nzhawa axta paro nyazhe lextoo ma.
29 Chelee lu kaxlaan lu lo ma zee nzheb ma
nu chelee lu kiib lu mbi kwaan mban ma zee yet ma
nu bare ma gak ma yo.
30 Per chelee lu xaal lu Mbi Naban cheen lu zee ban ma,
sbaa gak kub yizhyo.
31 Lee xni cheen Xaa Tubka Nak tira nak.
Lee Xaa Tubka Nak,
nyakla xaa ne xaa re kwaan mdexkwaa xaa.
32 Lee xaa ngwii lo yizhyo nu leeya ngun;
lee gorna ngal xaa yi zee ngooya zhen.
33 Gol na lo Xaa Tubka Nak rese mbizh kwaan mban na;
gol na salm lo Dios gorna mbanaka na.
34 Za na rese xgab cheen na lo xaa,
nel nix nzhak lextoo na ne na Xaa Tubka Nak.
35 Per yetlo re xaa nzeb jwalt lo yizhyo,
nayotra re xaa nakap lo yizhyo.
¡Nii wen na Xaa Tubka Nak!
¡Gol na kwaan le Xaa Tubka Nak!