Gol na lo Dios
Salm kwaan mkee David.
103
Gol na lo Xaa Tubka Nak,
kwaan dub lextoo na ni wen na le xaa,
nel nambey nak xaa.
2 Gol na lo Xaa Tubka Nak
nu nayenlazht na re kwaan mle xaa lo na.
3 Lee xaa nak xaa nche re jwalt cheen na
nu nsekwen xaa rese yalyizh kwaan nkano na,
4 lee xaa mloo yalnaban cheen na leen baa
nu mlu xaa yalnkela nu yalnles lo na,
5 lee xaa nzaa kwaan nyazhe lextoo na
nu nye gak na mod tub xaa mad nu mod tub msi ndok.
6 Lee Xaa Tubka Nak nle re kwaan wli
nu nle xaa yud re xaa nales nzhak.
7 Mlu xaa xnaz xaa lo Ches
nu mlu xaa kwaan gro lo xaa Israel.
8 Wen nak Xaa Tubka Nak,
nu nkano xaa yalnles;
nen doo nayii xaa nu gro doo nak yalnkela cheen xaa.
9 Nanayiit xaa tira,
nixa nanyut xyan lextoo xaa tira.
10 Nanaabt xaa kwent mod nak jwalt cheen be
nu nixa nateedt xaa be bid mod nak jwalt cheen be.
11 Modxa zit doo nzhi yiba lo yizhyo,
sbaaka gro doo nak yalnkela cheen xaa lo re xaa nzheb ne xaa.
12 Mkiib xaa jwalt cheen be nu zit doo mlaa xaaya,
mas zit mlaa xaaya pa nlen mbizh nu pa nyaaz mbizh.
13 Modxa nlesla xuz mad ne mad,
sbaaka nlesla Xaa Tubka Nak,
ne rese xaa nzheb ne xaa.
14 Nela xaa xomod nak be;
ne xaa lee be nak nebse yide.
15 Mod yixwen nak be
nu nak be mod yeey kwaan nzeb wen;
16 leezha nkaan mbiya zee nluxa
nu nyentra cho ne loya.
17 Per lee yalnkela cheen Xaa Tubka Nak,
tira nak,
tubka nzhoya lo re xaa nzheb ne xaa,
nu nlu xaa kwaan nali lo xinn xaa nu lo xos xaa,
18 lo re xaa ngozhaw kwaan myaan xaa,
lo re xaa nselazh xley xaa,
zee le xaaya.
19 Lee Xaa Tubka Nak,
nzob nabeyy naz leen yiba
nu nabeyy xaa lo rese kwaan.
20 Rese gu xmandad Xaa Tubka Nak,
bill gu lo xaa,
rese gu xaa ngezh,
xaa nle xchinn xaa,
gu xaa tubka nzhon xtizh xaa.
21 Rese gu xsoldad xaa bil gu lo Xaa Tubka Nak,
rese gu xaa nak xmos xaa,
xaa nzhon xtizh xaa.
22 Rese gu kwaan mdexkwaa Xaa Tubka Nak,
bill gu lo xaa,
dubse pa nabeyy xaa.
¡Kwaan dub lextoo na gol na lo Xaa Tubka Nak!