Kwaan ngunii tub xaa nales nzhak lo Dios
Kwaan ngunii xaa nales nzhak, gorna nales doo nzhak xaa lo yalne nu ngunii xaa lo Xaa Tubka Nak nu mbinn xaa.
102
Xaa Tubka Nak,
kenzha kwaan naab na lo lu lo yalne cheen na;
zee zhin xtizh na lo lu.
2 Nakaxlaant lu lo na,
mbizh kwaan nales deed na;
kenzha kwaan nii na nu zoza keb lo na.
3 Re mbizh cheen na nlux mod zhen
nu re zhit cheen na nzobxyan lo yalne.
4 Nguguuzh dub na
nu mbizh ren cho na mod ngool yix wen lo neey;
nu axta nyentra gan gaw na.
5 Mbezhyizh doo na
nu neb zhit ngulo ngok na.
6 Nzhak na mod kox,
ma nkanze yizhyo bizh
nu nzhak na mod mdid,
ma nkanze leen re yoo gox.
7 Nanzhaat na,
nak na mod myin,
ma nkanze techo yek yoo.
8 Yizata mbizh nzhak nales lextoo na lo re xaa nayii ne na;
lee xaa nxizhno na nu nxobde xaa le na.
9 Xkade nak kwaan nzhaw na,
nis kwaan nzhon na nak kwaan nzhoo na.
10 Kwaan yalnayii nu yalxyan cheen lu,
mlep lu na nu mlebi lu na.
11 Re mbizh cheen na nak mod yaal kwaan nded
nu mbizh na mod yixwen.
12 Per lee lu,
Xaa Tubka Nak,
nabeyy tira,
lo tub dii nu lo stub dii tubka nselazh lu.
13 Yixso lu nu kano lu yalnles lo Jerusalén,
nel mzhinla mbizh kwaan kano lu yalnles,
nel mzhinla mbizh.
14 Re xmos lu nkela re yoo gox
nu nlesla xaa ne xaa re kwaan mluxla.
15 Kwaanzee re yezh zheb ne le Xaa Tubka Nak,
rese rey yizhyo labeyy Xaa Nabeyy.
16 Lee Xaa Tubka Nak,
dexkwaa Jerusalén stuba,
sbaa luu xaa xni cheen xaa.
17 Zee kenzha xaa xtizh re xaa nales nzhak,
nalet xaa mod xaa nanzhonta.
18 Kwaane nzhaal ke lo yech zee lee dii,
xaa nze gwluzh labeyya
nu re yezh kwaan nze xen gool lo Xaa Tubka Nak.
19 Axta yiba pa nak li xaa kwaan nzhul mwii xaa;
axta yiba mwii Xaa Tubka Nak lo yizhyo.
20 Zee gon xaa xomod mbezh re xaa nzho lozhyib
nu koo xaa re xaa nakladiizh yet;
21 Zee zeet re xaa Jerusalén le Xaa Tubka Nak,
zee gool re xaa Jerusalén lo xaa,
22 gorna lee re yezh nu re rey,
kasa gool lo Xaa Tubka Nak.
23 Lee xaa mkiib yalngezh cheen na rolta naz paro nzhaal ban na;
rolta paro ban na mzaa xaa.
24 Zee nzhé na:
“Xtios na,
naweet lu na rolaka paro ban na.
Lu tubka nak lo tub dii nu lo stub dii.
25 Axta yilo lu mdexkwaa yizhyo nu yiba
nu mdexkwaa luya kwaan yaa lu.
26 Nzho tub mbizh lux rop kwaane,
per lee lu tira naluxt.
Ropse kwaane yex mod nzhex ler;
nu chee luya nu kix luya tub lad.
27 Per lee lu tubka nak;
nu lee yalnaban cheen lu tira naluxt.
28 Lee xinn re xmos lu yo wen
nu re xtii lu yo lo lu.”