Myaan David zo xaa tub mod nali lo Dios
Salm kwaan mkee David.
101
Nzhekla na gol na lo yalnkela cheen lu nu mod wli nak lu;
nzhekla na gol na salm lo lu,
Xaa Tubka Nak.
2 Nzhekla na zo nali na lo xnaz lu.
¿Cho gor yiid lu lo na?
Nzhekla na zo na nali lo lu
nu nali nabeey na yezh cheen na.
3 Nawiit na lo re kwaan naxinn.
Nanyulat na re xaa nanalit nak;
nabiit nik tub re xaa ne lo na.
4 Zit zo na lo re xaa nle xgab kwaan yizhyo;
nayot kwaan nakap lo na.
5 Xaa xlaan nzhedizh lo wechxinn,
tira luux na xaa;
¡nayetla na ne na re xaa gaya nak
nu re xaa nto yalxwa!
6 Nyakla na ne na re xaa nali nak,
xaa nze lo xnaz na;
rese xaa nzhul nak,
xaa ne nak xaa le zhiin lo na.
7 Rese xaa nkayoo kwaan,
nayot garli na;
rese xaa nkade,
nazot lo na.
8 Rese garziil luux na re xaa nakap,
xaa nzho xkizhyo na,
rese xaa kwaan nle kwaan nawent,
ko na xaa lo yezh cheen Xaa Tubka Nak.