Ɨkalata jya
Yuuda
Ikulongwi itsilongola
Ɨkalata ɨjɨ jyavɨgilwe nʉ Yuuda. Ikɨtsova jyʉmwene iita ʉmbɨgi vɨ Yuuda, ʉlʉkololwe va Yakobo ikange ʉmbombi va Ntwa ʉYɨɨsʉ Kɨlɨsiti. Avaanu avaavɨgɨlwagwa ɨkalata ɨjɨ navamanyikiiki vaale va mpelela gʉlɨku. Paninie nɨɨlyo ʉkʉkongana na mamenyu mongosu ʉgwʉ ʉmbɨgi aatoolile mu Lwɨdɨngʼano ʉLʉlaala, jivonia ʉkʉta aasumbilwe ʉkʉjɨhɨlɨka taasi kʉ Vayahudi. Ʉmwene ʉYuuda iita ikʉvavɨgɨla avaanu valya ʉwʉ ʉNgʉlʉve ʉDaada amalile ʉkʉvɨɨlanga, ʉwʉ avaganile, ikange ʉwʉ ambɨɨkye ʉYɨɨsʉ Kɨlɨsiti. Jikwɨdɨkiwa ʉkʉta ɨkalata ɨjɨ jyavɨgilwe mu mwaka gwa sitsigo ntanato (60) Waholilwe ʉYɨɨsʉ Kɨlɨsiti.
Ʉvʉsumbe wa mbɨgi va kalata ɨjɨ waale wa kʉvapavɨla aVakɨlɨsiti valeke ʉkʉkonga imanyiiso tsa vamanyisi va vʉnuasi. Pa kʉnywilitsa ʉlʉpavɨlo ʉlwa, ʉYuuda itoola isihwananitso ʉkʉhʉma mu Lwɨdɨngʼano ʉLʉlaala nʉ vʉganulu wa syene. Amasaago mongosu mu kalata ɨjɨ gahwaniine na galya agalɨ mu kalata jya vɨɨlɨ jya Petulo. Mu kalata tsʉ ivɨlɨ aVakɨlɨsiti vipavɨlwa valeke ʉkʉvakonga avamanyisi va vʉnuasi (Yuuda 4, 2 Petulo 2:1). Ikange ʉmwa mwʉtsile ikulongwi itsitoolilwe mu Lwɨdɨngʼano ʉLʉlaala itsa vasuungʼwa ni tsa kwongometswa kwa vaanu va vʉtsenge wa kʉ Sodoma nʉ wa Gomola.