Yuuda 1

Ɨkalata jya

Yuuda

1 Ɨkalata ɨjɨ jɨhʉmile kwane ndɨ Yuuda, ndɨ ndɨlɨ mbanda va Yɨɨsʉ Kɨlɨsiti, ikange neene lʉkololwe va Yakobo. Ndikʉvavɨgɨla ʉnyie nyɨ ʉNgʉlʉve ʉDaada amalile ʉkʉvɨɨlanga, avaganile, ikange nyɨ ambɨɨkye ʉYɨɨsʉ Kɨlɨsiti. 2 ɄNgʉlʉve avapeetsage kʉ wongosu ɨkɨsa, ʉlʉnotsehetso nʉ lʉgano.

Agalahʉmɨla kʉ vaanu ʉwʉ navikʉnʼdwada ʉNgʉlʉve

3 Mwe vagane vango, nʉpwʉ jɨngave ndɨkanogilwe siitso ʉkʉvavɨgɨla ɨkalata ɨjitsova ikulongwi tsa vʉpoki ʉwʉ tʉlɨ nawo twɨ vooni, lɨno ndɨweene pannogye taasi ndɨvavɨgɨle ikulongwi tsa kʉvanywilitsa pakʉta mulwɨmɨlage ʉlwɨdɨko ʉlwʉ ʉNgʉlʉve aavapye avaanu va mwene. Ʉlwɨdɨko ʉlwa nalukwandʉka lʉsiku, lwitsiga vʉle vʉle sikutsooni.

4 Ndivɨga itsi ʉlwakʉva pwʉvale avaanu avatava vagolosu avɨnyemeliitse vingye pagati paanyie. ɄVʉvɨge ʉVʉvalatse ʉwaavɨgilwe ʉkʉhʉma katale, vuvonia ʉvʉhɨgi ʉvʉviitsye avaanu avo. Aveene avo navikʉnʼdwada ʉNgʉlʉve, vijatsɨlɨngʼania ʉwajɨlweli wa lʉmanyiiso lwa lʉhʉngʉ lwa Ngʉlʉve viitu, pakʉta vajɨvone ɨnzɨla jya kʉgendelela nʉ vʉpʉmu wa veene wa vʉligu. Kange vikʉmʼbeela ʉYɨɨsʉ Kɨlɨsiti ʉvɨ jyʉjwa mwene vɨ Ndongotsi ikange vɨ Ntwa viitu.

5 Lɨno, nʉpwʉ jɨngave mumalile ʉkʉgamanya aga gooni, ndinogwa ʉkʉvakʉmbʉsa ʉkʉta, ʉNtwa wʉ amalile ʉkʉvapoka aVaisilahɨli ʉkʉhʉma mu kɨlʉnga kya Misili, kʉmbele aavoongomiitse valya avaabeelile ʉkʉmwɨdɨka.

6 Ikange, mukʉmbʉkage ʉkʉta naveene avasuungʼwa ʉwʉ vaabedile ʉwɨɨmɨɨlɨtsi ʉwʉ ʉNgʉlʉve aavapye, vakahega, vakavʉleka ʉvʉtaamo wa veene, ʉNgʉlʉve avakʉngile ni pɨngo mu ngʼiisi isigono syoni, wʉ vipʉlɨkɨla ɨkɨgono ɨkɨvaha kya vʉhɨgi.

7 Ikange, mukʉmbʉkage naveene avaanu va mu vʉtsenge wa Sodoma nʉ wa Gomola, nava mu vʉtsenge ʉvʉnge wa mu lʉvasumbale. Avo naveene vaale valigu ikange vaavombaga imbombo tsa soni, manya avagoosi vaavombaga ʉvʉligu na vagoosivajyavo. Itso tsikavapelela ʉkwingila mu lʉvʉngʉ lwa mwoto gwa sikutsooni, pakʉta avaanu valolage ʉkwa ɨkɨhwananitso.

8 Wʉ valɨwo naveene avagalo avo. Amagonasivi ga veene gikʉvalongotsa mu kwɨkolelania mu vʉligu, vibeda ʉvʉlongotsi wa Ngʉlʉve nʉ kʉdʉkɨla amadʉsi isipeliwa isyɨmɨkɨwa sya mwene. 9 Lola, ʉMikaɨli, ʉnsuungʼwa ʉmbaha, ʉpwʉ aakaningʼanaga nʉ Setano kʉ nongwa jya nsimba gwa Moose, naagele ʉkʉvomba ɨlya kʉmmɨga ʉSetano kʉ madʉsi, apeene aatsovile lyene ɨlya kʉta, “ɄNtwa ʉNgʉlʉve vɨ akʉhɨge!”

10 Lɨno avaanu avagalo avo, vidʉkɨla amadʉsi tsilya itsʉ navatsimanyili. Natsyene itsʉ vatsimanyile, vatsimanyile kʉ lʉhala ndʉ lwa sikanu isyʉ nasisaaga. Itso tsʉ tsyene tsikʉvananga.

11 Vasue vʉvʉle, manya ʉlʉgendo lwa veene lwa vʉtulanongwa lʉhwaniine nʉ lwa Kaini. Avaanu avo, pa mwojo gwa veene gwa kʉkava ɨkyʉma vikɨjingitsa mu vʉtulanongwa vʉvʉninie ʉwa Balamu. Kange vilotsa kʉ lwongometso pa nongwa jya kʉhambʉka ndʉwʉ ʉKola namwene oongomiitswe pa nongwa ɨjyo.

12 Wʉ mulʉndamiine pa kʉlya ɨkyakʉlya kya lʉgano, avaanu avo viiva ʉta madeeha amaviivi pagati paanyie. Itsa kʉdega tsʉ itsi, nʉpwʉ jɨngave valɨ nʉ lʉgendo ʉlʉviivi, viiva paninie nʉʉnyie. Viilya nʉ kwiguta kɨtsila soni. Vatsila lʉvʉmbʉlɨlo kɨɨnu, vahwaniine na mavɨngo agihɨlɨkwa ʉkwa nʉʉkwa kɨtsila kʉpela ɨsula. Kange vahwaniine nɨ mibɨkɨ ɨgɨtsila seke, ɨgɨkungʼuniike amaani, ɨgyʉmile lwoni nʉ kʉngʼongʼovolwa. 13 Vivomba imbombo tsa soni pavʉvalasu ʉngata majɨga amavaha ga mbelo agihʉmya amahuuve mu nyanza. Vahwaniine ndi nondwe itsivoneka nʉ kʉjaganika mu ngʼiisi. Wʉ jɨlɨwo naveene avaanu avo, ʉNgʉlʉve avavɨɨkye apoonu pa kʉtaama sikutsooni mu ngʼiisi ɨmbaha.

14 ɄEnoki, ʉkʉkʉjiitu va lekelakʉpamato (7) ʉkʉhʉma kwa Adamu, aamalile ʉkʉtsova amalago pa kulongwi jya vaanu avatulanongwa ava aatye, “Lola! ɄNtwa aliitsa paninie na vavalatse va mwene amaelufu na maelufu. 15 Aliitsa kwihɨga avaanu vooni. Pwʉ avatava vagolosu vooni alavahɨga kʉ nongwa jya mbiivi itsʉ vaavombile na mamenyu amaviivi ʉgwʉ vaantsovile ʉmwene.” 16 Avaanu avo vanya lwɨngʼuulo, ikange vikʉvatsova sivi avaanu avange. Mu mitaamile gya veene vinogwa ʉkʉvomba itsa vʉnogwe ʉvʉviivi ʉkʉkongana na masaago ga veene. Wʉ valɨ pa mbombo jya kʉganula ikulongwi kʉ vaanu, vikɨginia vaveene nʉ kʉvaginia avange pa vʉsumbe wa kʉkava sininie.

Ɨlivʉngʉ lya kʉgendelela ʉkʉnywilila mu lwɨdɨko

17 Lɨno, mwe vagane vango, mukʉmbʉkage amamenyu ʉgwʉ vaagendelelaga ʉkʉvavʉʉla avapositili va Ntwa viitu ʉYɨɨsʉ Kɨlɨsiti. 18 Avo vaateetsaga, “Kʉ sigono sya kʉ vʉsililo, valiitsa avaanu avanya nyovelo. Avaanu avo valavombaga itsa vʉnogwe wa veene ʉvʉviivi.” 19 Avo lɨno wʉ valɨ pagati paanyie vikʉvasongelengʼania ʉnyie mulekengʼane. Avaanu avo vibiitwe ni tsa mu kɨlʉnga, manya valɨ vʉvʉle ʉMepo ʉMbalatse.

20 Lɨno ʉnyie nyɨ vagane vango, mugendelelage ʉkʉnywilitsania mu manyiiso itsʉ ʉNgʉlʉve avapye, ikange munʼdoovage ʉNgʉlʉve mu vʉlongotsi wa Mepo ʉMbalatse. 21 Mugendelelage ʉkʉtaama mu lʉgano lwa Ngʉlʉve wʉ mukʉmpʉlɨkɨla ʉNtwa viitu ʉYɨɨsʉ Kɨlɨsiti iitse avape ʉwʉʉmi wa sikutsooni kʉ lʉhʉngʉ lwa mwene.

22 Muvakolelage ɨkɨsa valya avisinaana mu lwɨdɨko. 23 Ʉwʉ vilotsa kʉ mwoto gwa sikutsooni muvanyagage ngʼaningʼaani nʉ kʉvapoka. Napeene, kwʉvale avaanu avange ʉwʉ lwiva lʉnonu ʉkʉvakolela ɨkɨsa kʉnʉ mukɨdwatsa ʉkwambʉhɨtswa imbiivi tsa veene. Mugɨsʉʉlage nagɨ misabwa ɨgyʉ valamiitse mu mbombo tsa veene itsa soni.

Ʉlʉginio kwa Ngʉlʉve

24 Lɨno aginiwaagwe ʉNgʉlʉve, manya vɨ iweesa ʉkʉvaloleela pakʉta muleke ʉkwingila mu mbiivi. Ʉjwa vɨ mwene alaviingitsa ʉnyie kʉ mwene mu wɨɨmɨkiwa wʉ mutsila vʉviivi. Kange mulaava vavalatse wʉ mulɨ mu lʉhekelo ʉlʉlʉti. 25 ɄNgʉlʉve viitu vɨ va jɨlweli mwene, ikange vɨ Mpoki viitu kʉ nzɨla jya Ntwa viitu ʉYɨɨsʉ Kɨlɨsiti. Ʉlwɨmɨko, ʉvʉtwa, amaka nʉ vʉtavʉlɨlwa silɨ nʉ mwene, ndʉwʉ jyale ʉkʉhʉma katale, wʉ jɨveetsage nalɨ lɨno na sikutsooni! Ameni!