Ɨkalata jya daatu jya
Yohana
1
1 Ɨkalata ɨjɨ jɨhʉmile kwane ʉne ndɨ ndyakoni mu mpelela,
ndikʉkʉvɨgɨla ʉve Gayo vɨ nʼgane vango,
vɨ ndɨkʉganile nɨ numbula jyoni.
2 Inʼgane vango,
ndikʉkʉdoovela kwa Ngʉlʉve ʉgendelelage vʉnonu mu gooni mu wʉʉmi waako.
Ndikʉkʉdoovela ʉkʉta ʉmmana gwako gʉveetsage inʼdʉlʉsʉ,
ndʉwʉ ɨnumbula jyako jigendelela vʉnonu mu kʉva nʉ vʉhange nʉ Ngʉlʉve.
3 Ndyahekye siitso,
palya ʉpwʉ avɨɨdɨkivajiitu vatʉnga,
viitsile nʉ kwoleletsa ʉkʉta ʉve vugendelela ʉkʉkonga ʉwajɨlweli,
nʉ kʉtaama mu wajɨlweli.a
4 Nakɨkʉli ɨkɨɨnu ɨkyʉ kikʉmmelela ʉlʉhekelo ʉlʉlʉti ndʉ kʉpʉlɨka ʉkʉta avaana vango vigendelela ʉkʉtaama mu wajɨlweli.
Ʉvʉhʉʉgʉ wa Gayo
5 Inʼgane vango,
ʉve ʉlɨ mmʉʉgʉ kʉ wiipa ʉwʉ vukʉvavombela avɨɨdɨkivajiitu,
nʉpwʉ jɨngave vaanu vahenza kwave.
6 Avahenza avo voleliitse kʉ vampelela vaapa ʉlʉgano lwako ʉmwʉ lʉveelye lʉnonu.
Pwʉ lɨno ndisimiilitsa kwave ndiita,
ʉgendelelage vʉle vʉle ʉkʉvatanga nʉ kʉvapa ɨmbopo jya pa nzɨla avaanu avo ndʉwʉ ʉNgʉlʉve inogwa.
7 Avaanu avo vigenda mukʉmbombela ʉNtwa ʉYɨɨsʉ.
Mu kʉgenda ʉmwa,
navikwʉpɨlɨla ɨkɨveetsaga ɨkya kʉvatanga ʉkʉhʉma kʉ vaanu ʉwʉ navɨɨdɨki.
8 Pwʉ lɨno,
ʉwe patʉnogye ʉkʉvatanga avaanu ndaavo,
pakʉta tʉve najyʉwe tuvomba paninie na veene wʉ vikwolosa ʉwajɨlweli.
ɄDiotulefe nʉ Demetuliyo
9 Ndyavavɨgye avampelela ɨkalata,
lɨno ʉDiotulefe ʉvikɨjɨmɨka mbʉlongolo ʉta vɨ mbaha va veene,
nivɨɨkɨla ʉntɨma ʉgwʉ ndyavavɨgye.
10 Pwʉ lɨno,
ndɨlaava ndikwitsa ʉkwa,
ndɨlagaanika pavʉvalasu gooni ʉgwʉ ivomba,
aga vʉheesi nʉ vʉnuasi ʉwʉ ikʉtʉnwangʼila.
Nagalɨ gaago geene,
apeene ʉmwene iita ʉkʉbeela ʉkʉvʉʉpɨlɨla nava vɨɨdɨkivajiitu ʉwʉ vigendela ʉkwa.
Ikange ikʉvabeetsa avaanu avange ʉwʉ vinogwa ʉkʉvʉʉpɨlɨla,
nʉ kʉvaswɨma mu mpelela.
11 Inʼgane vango,
ʉleke ʉkwɨga ʉkʉvomba imbiivi,
apeene ʉvombage inonu.
Ʉmuunu ʉvaveetsaga ʉvɨ ivomba inonu,
ʉjwa vɨ muunu va Ngʉlʉve.
Lɨno ʉmuunu ʉvaveetsaga ʉvɨ ivomba imbiivi,
ʉjwa nammanyili ʉkʉta ʉNgʉlʉve veeni.
12 Avaanu vooni vikwolela ʉkʉta ʉDemetuliyo muunu innonu,
ikange imbombo tsa mwene tsa vʉgolosu tsivonia ʉkʉta muunu ʉvikonga ɨlweli.
Ʉwe najyʉwe,
tukwolela ʉkʉta muunu nʼgolosu,
nʉʉve ʉlʉmanyile ʉkʉta ʉwooleletsi wiitu wa lweli.
Amamenyu ga vʉmalɨlo
13 Ndɨlɨ nago amamenyu mongosu ʉgwʉ ndɨkanogwagwa ʉkʉvavɨgɨla,
lɨno nandinogwa ʉkʉvɨga ago nʉ wiino mu likalataasi.
14 Apeene,
ndihʉʉvɨla ʉkʉta ndɨpikwitsa kwave kɨtsila kʉsuvalɨla pakʉta twitse tʉtsove wʉ twagiine.
15 Ʉlʉnotsehetso lʉve paninie nʉʉve.
Avamanyaani viitu vaapa vikʉkʉsaamusa.
Najyʉve,
ʉtʉsaamusihiitse ʉkwa avamanyaani viitu nʉ jyʉnge mu litaawa lya mwene.