Avamanyisi va vʉnuasi
2
1 Lola,
ʉnsɨkɨ ʉpwʉ avanyamalago vaatsovaga amalago,
vaahʉmye avanyamalago va vʉnuasi pagati pa Vaisilahɨli.
Vʉvʉle vʉle avamanyisi va vʉnuasi valahʉmɨla pagati paanyie.
Avaanu avo kɨlʉhala lwa vʉteki,
valamanyiisaaga imanyiiso tsa kʉvajatsɨlɨngʼania nʉ kʉmʼbeela ʉYɨɨsʉ,
ʉNdongotsi ʉNdʉti,
ʉlya ʉvɨ aavagombwe.
Kʉ nzɨla ɨjyo valɨpelela ʉlwongometso lwa veene lʉviitsile ngʼaningʼaani.
2 Ikange avaanu vongosu valɨɨdɨkɨla nʉ kʉkonga ʉvʉpʉmu wa veene ʉwa ʉvʉviivi.
Mu vaanu avo avalɨɨdɨka imanyiiso itso,
avange valaata nʉ kʉdʉkɨla ɨnzɨla jya wajɨlweli.a
3 Pa mwojo gwa veene,
valavakwegaga na mamenyu ga veene ga vʉnuasi pakʉta vatoole isiinu siinyo.
Lɨno ʉkʉhʉma katale ʉNgʉlʉve aamalile ʉkʉvahɨga avo,
nʉ kwongometswa kwa veene kʉlɨ piipi!
4 Ʉnsɨkɨ ʉgwʉ avasuungʼwa vaninie vaavombile imbiivi,
ʉNgʉlʉve naavakolele ɨkɨsa,
apeene aavataagile kʉ ngʼiisi ɨmbaha.
Ʉkwa vakʉngilwe,
vipʉlɨkɨla ɨkɨgono kɨlya ɨkya kʉhɨgwa.
5 Ikange ʉnsɨkɨ gʉlya ʉgwa Nwaka,
ʉNgʉlʉve naavakolele ɨkɨsa avaanu avatava vagolosu,
apeene aaleetile ɨsula jya lwongometso mu kɨlʉnga kɨlya,
avaanu vakaswa.
Napeene,
aampokile ʉNwaka paninie na vaanu avange lekelakʉpamato (7).
Wʉ gakaanale ago ʉkʉvombeka,
ʉNwaka aavalʉmbɨlɨlaga avaanu ʉkʉta vavombage aganogelanie pamiiho ga Ngʉlʉve.b
6 Ikange ʉNgʉlʉve akavapa ʉlʉvʉngʉ avaanu va vʉtsenge wa Sodoma nʉ wa Gomola.
Akavakobosa nʉ mwoto,
akavavɨɨka vave kɨhwananitso kʉ galya ʉgwʉ galavavona avaanu avatava vagolosu va lɨno ʉwʉ navikʉmwɨdɨka ʉNgʉlʉve.
7 Akampoka ʉLoti,
ʉmuunu ʉnʼgolosu,
ʉvɨ avaanu avo avatulanongwa vaampelye ʉlʉsʉsʉvalo mu vʉpʉmu wa veene ʉvʉviivi.
8 ɄLoti aataamile paninie na vaanu avo kʉ sigono syongosu,
ɨnumbula jya mwene jyasʉsʉvye siitso wʉ ipʉlɨka nʉ kʉlola ʉlʉgendo lwa veene ʉlʉviivi.c
9 Kwɨlyo,
ʉNtwa ʉNgʉlʉve alʉmanyile ʉmwʉ jiikʉvapokela mu ngelo avaanu ʉwʉ vikʉmwɨdɨka ʉmwene.
Ikange alʉmanyile ʉmwʉ alavapelela ʉlʉvʉngʉ avatulanongwa pa kɨgono kɨlya ɨkya kʉvahɨga,
10 sitsosiitso valya ʉwʉ vikonga ʉvʉnogwe ʉvʉviivi wa mmana nʉ kʉbeda ʉvʉlongotsi wa Ngʉlʉve.
Avaanu avo vanya lʉkaani ikange valɨ nʉ lwɨginio,
navidwada ʉkʉdʉkɨla amadʉsi isipeliwa sya wɨɨmɨkiwa isya kʉkyanya.
11 Lɨno avasuungʼwa ʉwʉ vanya vʉtavʉlɨlwa na maka amalʉti ʉkʉlʉtɨɨlɨla isipeliwa sya vʉginiwa isyo,
navikʉsihɨlɨka pa vʉhɨgi nʉ kʉsidʉkɨla amadʉsi pamiiho ga Ntwa ʉNgʉlʉve.
12 Avaanu avo vibeda ɨkɨveetsaga kɨlya ɨkyʉ navakɨmanyili.
Vahwaniine ni sikanu isivʉla lʉhala.
Isyo siholwa,
pakʉta kʉmbele siibatwagwe nʉ kʉhɨnzwa!
Wʉ jɨlɨwo ewo,
ʉNgʉlʉve alavoongometsa avamanyisi avo ava vʉnuasi.
13 Ikange valʉʉpɨlɨla ʉvʉkʉvɨlwa pa vʉkʉvɨlwa ʉwʉ vikʉvapelela avaanu avange.
Lola,
aveene vihovoka ʉkʉvomba pavʉvalasu ʉvʉnogwe wa veene ʉvʉviivi.
Avo vikotsa isoni mu kɨpʉga kiinyo wʉ vihanga nʉʉnyie ʉkʉlya isiinu pa lʉhekelo,
wʉ ʉlʉvasu ʉlʉnge,
vikʉtsihovokela inzɨla tsa veene tsa vʉsyovi.
14 Amiiho ga veene gadɨgile ʉvʉligud nʉ vʉnogwe wa veene wa kʉvomba imbiivi vʉtsila vʉdugo.
Vikʉvasyova avaanu ʉwʉ navadʉlwiki mu lwɨdɨko.
Inumbula tsa veene tsitsoovye ʉkʉva nʉ vʉnogwe wa kyʉma.
Vakootoliiwe nʉ Ngʉlʉve!
15 Vajɨlekile ɨnzɨla ɨngolosu,
vajagile nʉ kʉkonga ɨnzɨla ɨjyʉ aakongile ʉBalamu,
ʉmwana va Beholi.
Ʉmwene aanogilwe ʉkwʉpɨlɨla ɨkyʉma kʉ nzɨla jya kʉvomba imbiivi.
16 Lɨno akatanilwa kʉ nongwa jya mbiivi tsa mwene.
Ɨpunda jɨkatsova kʉ limenyu ʉngata muunu,
jɨkasiga ʉvʉtsimu wa nyamalago ʉjwa.e
17 Avamanyisi va vʉnuasi avo vavyʉta sisima isyʉmile amagasi,
ikange vavyʉta lʉkʉngʉʉgʉ ʉlwʉ ʉnkuluguuto gukʉlʉkulugania kʉnʉ na kʉnʉ.
ɄNgʉlʉve avavɨɨkye apoonu pa kʉtsiiva pa ngʼiisi ɨmbaha.
18 Vitsova amamenyu ga lwɨginio nʉ gwʉ nagitangɨla.
Vikʉvʉvombela ɨmbombo ʉvʉnogwe ʉvʉviivi wa mmana pakʉta,
vavategeeletse mu vʉpʉmu avaanu ʉwʉ vahʉmile pa kwɨdɨka,
avɨlekiilwe ʉkʉvomba ʉgwʉ avanangi vivomba.
19 Vikʉvahʉʉvɨtsa avaanu avo ʉkʉta jʉviiva vavɨɨkilwe mu vʉvopolwa,
wʉ kʉnʉ vaveene,
avamanyisi va vʉnuasi avo,
wʉ vavanda va mbiivi.
Wʉ jɨlɨwo,
manya ʉmuunu iiva mbanda va kɨveetsaga kɨlya ɨkyʉ kikʉndongotsa.
20 Avaanu avakulwike mu mbiivi tsa mu kɨlʉnga,
kʉ nzɨla jya kʉmmanya ʉYɨɨsʉ Kɨlɨsiti,
ʉvɨ ʉmwene vɨ Ntwa ikange vɨ Mpoki viitu,
ɨngave vikwɨdɨka ʉkwibatwa nʉ kʉlongotsiwa ikange ni mbiivi itso,
apo ɨmiveele gya vaanu avo giveetsaga miviivi siitso,
ʉkʉlʉtɨɨlɨla pa vʉtengʉlɨlo.
21 Jɨkaale jiiva hʉba kʉ veene vakaale vave navajɨmanyili lwoni ɨnzɨla ɨjyo ɨjɨnogelanie pamiiho ga Ngʉlʉve,
ʉkʉlɨngʼaania nʉ kʉjɨmanya,
pwʉ vavuje valʉleke ʉlʉlagɨlo ʉlʉvalatse ʉlwʉ vʉʉpɨlye.
22 Kʉlɨ kɨtsovo kya jɨlweli ɨkiita,
“Ɨmbwa jikilivukila ʉkʉlya amadeesi ga jyene,”
f nɨ kɨtsovo ɨkɨnge kiita,
“Ɨngʉbe ɨjyʉ vootsiitse jikilivukila ikange ʉkwɨbɨɨlʉsa mu lʉdaba!”
Wʉ jɨlɨwo kʉ veene ʉnsɨkɨ ʉgʉ.