Ɨkalata jya vɨɨlɨ jya
Petulo
Ʉlʉpembetso lwa Petulo
1
1 Ʉne ndɨ Simoni Petulo,
ndɨ ndɨlɨ mbombi kange mpositili va Yɨɨsʉ Kɨlɨsiti,
ndikʉvavɨgɨla ʉnyie nyɨ kʉ vʉgolosu wa mwene ʉYɨɨsʉ Kɨlɨsiti ʉvɨ Ngʉlʉve kange Mpoki viitu,
mwʉpɨlye ʉlwɨdɨko ʉlʉlʉti.
Ʉlwɨdɨko ʉlwa lwʉ lʉninie ʉlwʉ najyʉwe twʉʉpɨlye.
2 ɄNgʉlʉve avoongeletsaage ʉnyie ʉlʉhʉngʉ nʉ lʉnotsehetso mu numbula tsiinyo ʉlwakʉva mukʉmmanya ʉmwene nʉ Yɨɨsʉ ʉNtwa viitu.
Avɨɨdɨki vɨɨlangilwe nʉ kʉhalwa nʉ Ngʉlʉve
3 Kʉ maka ga mwene ga Vʉngʉlʉve,
ʉNgʉlʉve atʉpye syoni isyʉ tʉlɨ nʉ vʉsumbe nasyo pakʉta,
tʉtaamage ʉvʉtaamo wa kʉmwɨmɨka ʉmwene.
ɄNgʉlʉve atʉpye itso kʉ nzɨla jya kʉmmanya ʉmwene.
Atwɨlangile mu wɨɨmɨkiwa na mu wiipa wa mwene jyʉmwene.
4 Kʉ nzɨla ɨjyo,
atʉpye isiinu isivaha kange isinonua isyʉ aatʉhʉʉviitse.
Isiinu isyo sikʉtʉtanga ʉkʉvʉleka ʉvʉnogwe wooni ʉvʉviivi ʉvʉlɨ mu kɨlʉnga,
kange sikʉtʉtanga ʉkʉva nʉ vʉhange nʉ Ngʉlʉve.
5 Kʉ nongwa ɨjyo,
pakyanya pa lwɨdɨko lwinyo mwɨtangage ʉkʉva nʉ lʉgendo ʉlʉnonu,
pakyanya pa lʉgendo ʉlʉnonu lwinyo muveetsage nʉ vʉmanyi.
6 Ikange pa vʉmanyi wiinyo muveetsage vaanu avikɨsiga mu mbiivi,
pa kwɨsiga mu mbiivi mwongeletse ʉlʉsipililo,
pakyanya pa lʉsipililo mwongeletse ʉlwɨmɨko kwa Ngʉlʉve.
7 Pa lwɨmɨko kwa Ngʉlʉve mwongeletse ʉlʉgano kʉ vɨɨdɨkivajiinyo,
pakyanya pa lʉgano kʉ vɨɨdɨkivajiinyo mwongeletse ʉlʉgano kʉ vaanu vooni.
8 Ɨngave mwiva nago ago gooni kʉ wongosu,
ago gikʉvatangaga ʉkʉva vavombi va Ntwa viitu ʉYɨɨsʉ Kɨlɨsiti nʉ kʉva nʉ lʉvʉmbʉlɨlo pa kʉmmanya ʉmwene.
9 Lɨno ʉmuunu ʉvɨ alɨ vʉvʉle ʉlʉgendo ʉlwa,
ʉjwa muunu mʼbosu.
Ilemwa ʉkʉlola,
asaamilwe ʉkʉta ʉNgʉlʉve ambaliitse,
nʉ kʉta ahʉmile mu mbiivi tsa mwene tsa katale.
10 Pwʉ lɨno vɨɨdɨkivajyango,
tiigagi pa kʉvonia ʉkʉta ʉkʉhalwa kwinyo nɨ nyɨlango jiinyo,
kɨve kɨɨnu kya kʉnana.
Ɨngave mutaama ndavʉle,
namulalʉleke ʉlwɨdɨko lʉsiku,
11 manya pa kʉvomba ewo,
ʉNgʉlʉve kʉ wiipa ʉvʉlʉti,
alavatavʉla mwingile mu Lʉdeeva lwa sikutsooni lwa Ntwa ʉMpoki viitu ʉYɨɨsʉ Kɨlɨsiti.
12 Pwʉ lɨno,
ndigendelelaga ʉkʉvakʉmbʉsa gooni aga sikutsooni,
nʉpwʉ jɨngave mulʉmanyile nʉ kʉnywilila mu wajɨlweli ʉwʉ mumanyie.
13 Ndivona ʉkʉta,
ʉnsɨkɨ gwoni ʉgwʉ ʉne nditaama mu kɨlʉnga ʉmʉ,
lʉnonu kwane ndɨve ndikʉvakʉmbʉsa ikulongwi itso.
14 Nditsova ewo ʉlwakʉva ʉNtwa viitu ʉYɨɨsʉ Kɨlɨsiti amboniitse pavʉvalasu ʉkʉta ʉnsɨkɨ gwango gwa kʉhega mu kɨlʉnga ʉmʉ gʉhegelye.
15 Pwʉ lɨno,
ndikɨkupilaga ʉkʉta muve nasyo isyakʉvakʉmbʉhɨtsa,
ʉne wʉ ndɨsue.
Avooleletsi va wɨɨmɨkiwa wa Kɨlɨsiti
16 Ʉnsɨkɨ ʉpwʉ twamanyiisaaga ikulongwi tsa maka ga Ntwa viitu ʉYɨɨsʉ Kɨlɨsiti nʉ kwitsa kwa mwene,
natwahʉʉvɨlage isitsaago isivɨgilwe kɨlʉhala lwa vaanu,
apeene ʉwe twavʉweene ʉwɨɨmɨkiwa wa mwene na miiho giitu jyʉwe.
17-18 Lola,
ʉwe twale paninie nʉ Yɨɨsʉ pakyanya pa kɨdugala kɨlya ɨkɨvalatse,
palya ʉpwʉ ʉʉpɨlye ʉvʉginiwa nʉ wɨɨmɨkiwa ʉvʉlʉti ʉkʉhʉma kwa Ngʉlʉve ʉDaada.
Ʉnsɨkɨ ʉgwa ʉwe jyʉwe twapʉliike ɨlimenyu ʉkʉhʉma kʉkyanya kwa Ngʉlʉve,
ʉnya wɨɨmɨkiwa ʉvʉlʉti lɨkata,
“Ʉjʉ vɨ Mwana vango.
Ndɨnʼganile,
namwene ikʉnnyovosa ʉne.”b
19 Ikange amamenyu ga vanyamalago gikʉtʉvʉʉla ʉwajɨlweli,
nʉʉnyie muvomba vʉnonu ɨngave mukʉgiibata.
Amamenyu ago gavyʉta nyaale ɨjimulika mu ngʼiisi,
ʉkʉsikila ʉnsɨkɨ ʉpwʉ kutandaalʉka nʉ Yɨɨsʉ ʉvɨ ʉmwene vɨ litondwe,
c ikʉvamulikila mu numbula tsiinyo.
20 Lɨno ɨkɨɨnu ɨkɨvaha pa kulongwi itso,
mukʉmbʉkage ʉkʉta nagakʉli amalago ga Vʉvɨge ʉVʉvalatse ʉgwʉ avanyamalago vaaganulaga ʉkʉkongana na masaago ga veene.
21 Ikange nagakʉli amalago agaahʉmile kʉ vʉnogwe wa vaanu,
apeene avaanu vaalongotsiwaagwa nʉ Mepo ʉMbalatse ʉkʉtsova amalago ʉkʉhʉma kwa Ngʉlʉve.