Ɨkalata jya vɨɨlɨ jya
Petulo
Ikulongwi itsilongola
Ɨkalata ɨjɨ ɨjya vɨɨlɨ, kalata ɨjyʉ ʉmpositili ʉPetulo aavɨgile jɨbɨhage jikwɨmbwa mu mipelela ɨgɨ nɨɨgɨ (1:1). Avɨmbi vikwɨdɨngʼana ʉkʉta ɨkalata ɨjɨ jyavɨgilwe mu mwaka inninie mu myaka gya sitsigo ntanato na gɨhaano (65) ʉkʉsika kʉ sitsigo ntanato na budikakʉpamato (69) Waholilwe ʉYɨɨsʉ Kɨlɨsiti. Ʉvʉsumbe wa mwene waale ʉkʉbeetsa imanyiiso tsa vʉnuasi tsa vaanu vaninie itsʉ tsyasʉpɨngʼanaga nʉ wajɨlweli wa Livangɨli. Ikangatsa iita, ʉwajɨlweli ʉwa wʉ vʉlya ʉwʉʉpɨliilwe na vaanu valya avaambwene ʉYɨɨsʉ Kɨlɨsiti na miiho ga veene ikange vaapʉliike tsilya itsʉ aamanyiisaaga (1:16-18).
ɄPetulo isimiilitsa iita avaanu vaveetsage nʉ lʉgendo lwa Kɨkɨlɨsiti, ikange vaveetsage vahʉʉgʉ mu mbombo jya Ngʉlʉve. Ibeetsa lwoni ɨmbombo nʉ lʉgendo lwa vaanu avaviivi avivaalɨsa imanyiiso tsa vʉnuasi.
Ikange ilʉvʉla vʉnonu ʉkʉta avaanu avo avaviivi vikʉvakotsa isoni avaanu avipʉlɨkɨla ʉkʉkilivuka kwa Yɨɨsʉ Kɨlɨsiti ʉlwa vɨɨlɨ. Avaanu avo vinwangʼa viita ʉYɨɨsʉ nalakilivuke, manya aalʉtye ngʼaani. ɄPetulo ikʉvaanda kʉ nzɨla jya kʉsimiilitsa iita, ʉkʉkeeletsa ʉkwitsa ʉlwa vɨɨlɨ kwa Yɨɨsʉ Kɨlɨsiti, kʉhʉmiine nʉ lʉsipililo lwa Ngʉlʉve. ɄNgʉlʉve inogwa ʉkʉpʉlɨkɨla siitso avaanu vongosu vamwɨdɨke nʉ kʉpokwa.