Ʉkʉdɨɨma ɨkɨpʉga kya Ngʉlʉve
5
1 Lɨno nditsova nʉʉnyie nyɨ vandyakoni,
ʉne ndɨ ndyakoninʼjiinyo,
ikange ndɨ ndɨlɨ mwoleletsi va vʉkʉvɨlwa wa Yɨɨsʉ Kɨlɨsiti.
Ʉne ndihʉʉvɨla ʉkwʉpɨlɨla ʉwɨɨmɨkiwa paninie nʉ mwene,
ʉnsɨkɨ ʉpwʉ vʉlavoneka.
Pwʉ lɨno ndisimiilitsa kwanyie ndiita,
2 muveetsage vadɨɨmi vanonu va kɨpʉga ɨkyʉ ʉNgʉlʉve avapye.
Mudɨɨmage ɨkɨpʉga ɨkyo kʉ numbula ɨjɨhowiike ndʉwʉ ʉNgʉlʉve inogwa,
mudɨɨmage kɨtsila kwʉmɨɨlɨtswa.
Mulekage ʉkʉvomba ɨmbombo jiinyo kʉ vʉsumbe wa kʉkava ɨkyʉma kʉ mwojo,
apeene mwɨhʉmyage kʉ numbula ɨjɨhowiike.
3 Mulekage ʉkʉva vakali kʉ vaanu ʉwʉ mukʉvalongotsa,
apeene ʉlʉgendo lwinyo lʉve kɨhwananitso kɨnonu kʉ veene.
4 ɄYɨɨsʉ vɨ Nʼdɨɨmi ʉNdʉti va vaanu va mwene.
Ʉnsɨkɨ alaava ivoneka,
mulʉʉpɨlɨla ʉwɨɨmɨkiwa wa sikutsooni.
5 Najyʉnyie nyɨ mulongotswa,
a vapʉlɨkagi avandyakoni viinyo.
Nyɨ vandyakoni nyɨ vooni na nyɨ mulongotswa,
muveetsage vaanu vadeke ʉnsɨkɨ wʉ mutangana ʉnyie kwa jyʉnyie,
ʉlwakʉva ʉVʉvɨge ʉVʉvalatse wiita,
“ɄNgʉlʉve ikʉvasiga avikɨjɨmɨka,
apeene ikʉvapa ʉlʉhʉngʉ avikɨjisa.”b
6 Pwʉ mwɨjisaage paasi pamiiho ga Ntwa ʉNgʉlʉve ʉnya maka ga kʉvaloleela,
pakʉta ʉmwene iitse avɨɨmɨke ʉnsɨkɨ gʉlaava gukwitsa ʉgwʉ avɨɨkile jyʉmwene.
7 Mundekelage ʉNgʉlʉve ʉvʉkʉvɨlwa wiinyo wooni,
ʉlwakʉva ʉmwene vɨ ikʉvadɨɨma.
8 Muveetsage nʉ kwɨsiga nʉ kʉva miiho ʉnsɨkɨ gwoni.
Ʉndʉgʉ viinyo ʉSetano ilonda ʉmuunu va kʉmʼbuda mu lwɨdɨko,
ndɨ ngalamu ɨjyʉ jikuluma,
jilonda ʉmuunu pakʉta jɨndye.
9 Lɨno munsige ʉjwa ʉSetano kʉ nzɨla jya kwɨnywilitsa mu lwɨdɨko.
Ndʉwʉ mulʉmanyile,
avɨɨdɨkivajiinyo,
isilʉnga syoni,
vikʉvɨlwa ndʉʉnyie.
10 Mulʉmanye ʉkʉta wʉ mumalile ʉkʉkʉvɨlwa kʉ nsɨkɨ nsupi,
ʉNgʉlʉve alavanywilitsa,
alavatseesa,
alavapa amaka ga kʉtaama mu lwɨdɨko.
Ʉmwene ʉNgʉlʉve va lʉhʉngʉ lwoni vɨ aavɨɨlangile mwʉpɨlɨle ʉwɨɨmɨkiwa wa mwene mwa Kɨlɨsiti sikutsooni.
11 ɄNgʉlʉve vɨ ilongotsa sikutsooni!
Wʉ jɨveetsage.
Ʉkwɨlaga
12 ɄSilwani,
c ʉmwɨdɨkinʼjiitu,
ʉvɨ muunu mmʉʉgʉ ndʉwʉ ndilola,
vɨ annangile ʉne ʉkʉvɨga ɨkalata ɨsupi ɨjɨ.
Ndinogwa ʉkʉvapa amaka nʉ kʉvalagɨla ʉkʉta,
itsivɨgilwe mu kalata ɨjɨ,
tsivonia ʉlʉhʉngʉ lwa jɨlweli lwa Ngʉlʉve.
Lɨno mwɨme na maka ʉkʉmwɨdɨka ʉlwakʉva mutsimanyile ikulongwi itso.
13 Ɨkɨpʉga kya Vakɨlɨsitivajiinyo,
va vʉtsenge ʉvʉ ʉwa Babeli,
d ʉwʉ vomwilwe nʉ Ngʉlʉve,
vikʉvasaamusa.
Ikange namwene ʉmwana vango mu lwɨdɨko,
ʉvɨ itambʉlwa Maliko,
ikʉvasaamusa.
14 Musaamusanie pa kɨpambaga.
Ndikʉvadoovela nyɨ vooni nyɨ vakongi va Kɨlɨsiti ʉkʉta muve nʉ lʉnotsehetso.