Ʉvʉtaamo ʉvukʉmmovosa ʉNgʉlʉve
4
1 Ndʉwʉ ʉKɨlɨsiti aakʉviilwe mu mmana gwa mwene,
ʉnyie najyʉnyie muveetsage ni nyɨsaagɨlo itso ndʉ mwene.
Lola,
ʉmuunu angakʉvɨlwe mu mmana gwa mwene naliitse alongotswe ikange ni mbiivi.
2 Kʉ nzɨla ɨjɨ,
mu vʉtaamo wa mwene wooni,
itaamaga ikonga ndʉwʉ inogwa ʉNgʉlʉve,
nakataamage ikange ikonga ʉvʉnogwe wa mmana.
3 Kʉnsana ʉkwa mwakongaga ʉvʉnogwe wiinyo ʉvʉviivi wa kʉvanogwa avadala evo avagoosi vongosu nʉ vʉgaatsi.
Ikange mwanogwagwa inyekelo inya vʉgaatsi nʉ kʉnema ɨmikino gya vʉligu,
nʉ kwɨsaja kʉ mingʉlʉve,
ɨkɨɨnu ɨkyʉ kikʉmbipitsa siitso ʉNgʉlʉve.
Mulʉmanye ʉkʉta lwakwɨlye ʉlwʉ mwakongile ʉvʉtaamo wa vanyapanzi.
Lɨno,
najɨnogiili ʉkʉta mukilivuke nʉ kʉvomba ewo.
4 Ʉnsɨkɨ ʉgʉ mudʉkwa na vaanu avo ʉwʉ navanʼganili ʉNgʉlʉve.
Vivomba itso ʉlwakʉva navalʉmanyili kɨki namukongana navo ikange videga ʉkʉta namuvomba ago amaviivi ʉgwʉ aveene vivomba.
5 Pa kulongwi tsa vʉviivi wa veene ʉwa valiitsa vinaka vaveene pavʉlongolo pa Ngʉlʉve.
Manya ʉmwene ʉjwa ɨsaawe ʉkʉhɨga avaanu vooni,
avʉʉmi nava vaswe.
6 Lola,
ɨkɨ kyʉ mene avaanu avaasue vaalʉmbɨliilwe ɨLivangɨli wʉ vapitsiige vʉʉmi,
pakʉta ndajɨve ʉNgʉlʉve aavahɨgile vakaswa,
ndʉwʉ ʉmuunu nʉ muunu ivombelwa,
inumbula tsa veene tsive kʉ wʉʉmi paninie nʉ mwene.
7 Ʉvʉsililo wa siinu syoni vʉlɨ piipi,
pwʉ lɨno muve nʉ kwɨsiga nʉ kwɨlolela mu gooni ʉgwʉ muvomba,
pakʉta mutaamage mukɨsaja.
8 Ʉkʉlʉtɨɨlɨla kʉ gooni,
mugimbage siitso ʉkʉganana,
ʉlwakʉva vɨ muunu ʉnganʼgane ʉnnino ndavʉle jʉwiiva wɨsaawe ʉkʉnsyɨkɨla nʉpwʉ angave ikʉkʉnangɨla kavɨlɨ kavɨlɨ.a
9 Muvambɨlɨlage kɨtsila kwɨsyona avaanu avikwitsa kwanyie.
10 ɄNgʉlʉve vɨ ikʉvapa nyɨ vɨɨdɨki isikʉngɨlwa isilɨ pongosu.
Pwʉ lɨno,
ʉmuunu nʉ muunu aloleelage vʉnonu ɨkɨkʉngɨlwa kya mwene nʉ kʉkɨvombela kʉ lʉvʉmbʉlɨlo lwa vaanu vooni.
11 Ʉmuunu ʉvaveetsaga ʉvitsova,
vɨ atsovage ndʉ muunu ʉvasuungʼilwe nʉ Ngʉlʉve.
Namwene ʉvikʉvavombela avanine,
avavombelage kʉ maka ndʉwʉ apeevilwe nʉ Ngʉlʉve.
Kʉ nzɨla ɨjɨ ʉNgʉlʉve iweesa ʉkʉginiwa mu gooni kʉ nongwa jya Yɨɨsʉ Kɨlɨsiti ʉvɨ alɨ nʉ wɨɨmɨkiwa na maka sikutsooni na sikutsooni.
Ameni.
Ʉkʉkʉvɨlwa pa kulongwi jya Yɨɨsʉ
12 Vagane vango,
ʉvʉkʉvɨlwa ʉvʉlʉti ʉvʉvaweene ʉwa kʉgela ʉlwɨdɨko lwinyo,
nakɨɨnu ɨkyʉ mutsoovye.
Pwʉ lɨno mulekage ʉkʉva ndʉwʉ navikʉlʉmanyingʼania kɨki mukʉvɨlwa.
13 Apeene hekelagi ʉlwakʉva mukʉvɨlwa ndʉwʉ ʉKɨlɨsiti aakʉviilwe,
pakʉta mwitse muveetsage nʉ lʉhekelo ʉlʉlʉti,
ʉnsɨkɨ ʉpwʉ ʉwɨɨmɨkiwa wa Kɨlɨsiti vʉlavoneka pavʉvalasu.
14 Ɨngave mudʉkwa ʉlwakʉva mulɨ vakongi va Kɨlɨsiti,
mulʉmanye ʉkʉta musajiwa,
manya ʉMepo va wɨɨmɨkiwa va Ngʉlʉve alɨ paninie nʉʉnyie.
15 Ɨngave mukʉvɨlwa,
ʉvʉkʉvɨlwa ʉwa vʉleke ʉkʉhʉmana nʉ kʉva ʉnyie mulɨ vabudi,
evo valyasi,
evo vasongelengʼanie,
evo vavombambiivi itsinge.
16 Ʉnyie mungakʉvɨlwagwe ʉlwakʉva mulɨ Vakɨlɨsiti,
muleke ʉkʉvona soni,
apeene munʼginiage ʉNgʉlʉve ʉkʉta mukwɨlangwa kʉ litaawa lya Yɨɨsʉ.
17 Ʉnsɨkɨ gwa vʉhɨgi gʉlaava gʉsiike,
ʉNgʉlʉve alatengʉla ʉkʉhɨga avaanu va mwene.
Lɨno ɨngave ʉvʉhɨgi vʉlatengʉlɨla kwawe twɨ vaanu va mwene jyʉmwene,
pwʉ musaagage ʉmwʉ vʉlaveela vʉpala kʉ vaanu valya ʉwʉ navikwɨdɨka ɨLivangɨli ʉkʉhʉma kwa Ngʉlʉve.
18 Aga galɨngʼiine nʉ Vʉvɨge ʉVʉvalatse ʉwiita,
“Ɨngave aveene avagolosu valapokwa ʉkʉgendela mu vʉpala,
pwʉ jɨlaava ndeeti kʉ vanangi ʉwʉ navammanyili ʉNgʉlʉve?”b
19 Pwʉ lɨno,
ʉwʉ vikʉvɨlwa ʉlwakʉva ʉNgʉlʉve aavɨɨkile tsive ewo,
vagendelelage ʉkʉvomba inonu nʉ kʉmwɨdɨka ʉNgʉlʉve ʉMpeli va veene,
ʉmmʉʉgʉ.