Ʉvʉtaamo ʉvʉnogelanie wa muunu nʉ nʼdala va mwene
3
1-2 Lɨno ʉnyie nyɨ vadala nyɨ muvʉʉkile,
muvapʉlɨkage avagoosi viinyo.
Kʉ nzɨla ɨjyo,
avagoosi ʉwʉ navikonga imanyiiso tsa Yɨɨsʉ,
vikeelaga ʉlʉgendo lwinyo lwa vʉvalatse nʉ lʉdwado.
Pwʉ avagoosi viinyo visikilaga ʉkʉmwɨdɨka ʉNgʉlʉve kɨtsila kʉvavʉʉla ɨlimenyu ɨlɨveetsaga.
3 Mulagelaga ʉkʉva vaanu ʉwʉ vikɨtondovola kʉnzi,
ndʉ kʉtiva inzwɨlɨ,
ʉkʉswala isahabu nɨ misabwa gya lʉtogo,a
4 apeene ʉvʉnonu wiinyo vʉtengʉlɨle mu nʼgati mu numbula tsiinyo.
Ʉvʉnonu ʉwʉ navunangɨka evo kʉnyakasʉka wʉ vʉlya ʉwa kʉva nʼdeke ikange nantsosi.
Ʉvʉ wʉ vʉnonu wa kɨgelelo kya pakyanya pavʉlongolo pa Ngʉlʉve.
5 Ewo wʉ katale avadala ʉwʉ vaammʉʉvɨlaga ʉNgʉlʉve nʉ kʉmwɨdɨka,
wʉ vɨɨtondovolaga kʉ lʉgendo ʉlʉnonu lwa kʉpʉlɨka kʉ vagoosi va veene.
6 Ʉnʼdala mpamato ʉvɨ aavombile ndavʉle vɨ Sala,
ʉnʼdala va Abulahamu.
Ʉjʉ aampʉlɨkaga vʉnonu ʉnʼgoosi va mwene nʉ kʉmwɨmɨka,
aamwɨlangaga alɨkʉta,
“Ntwa vango.”
b Najyʉnyie,
ɨngave muvomba ʉgwʉ ganogelanie kɨtsila kʉdwada ɨkɨveetsaga,
mwiva ʉta vaana va mwene ʉSala.
7 Nʉʉnyie nyɨ vagoosi nyɨ mutoolile,
pavanogye ʉkʉtaama vʉnonu na vadala viinyo ʉlwakʉva mulʉmanyile ʉkʉta vavʉla maka nda gaanyie.
Ikange muvaloleelage kʉ wɨɨmɨkiwa ʉlwakʉva ʉNgʉlʉve,
kʉ kɨsa kya mwene,
aavahʉʉviitse ʉnyie nyɨ vooni ʉkʉvapa ʉwʉʉmi wa sikutsooni,
nyɨ vagoosi na vadala.
Pwʉ lɨno,
muvombage ndavʉle,
pakʉta inyɨsajo tsiinyo tsipʉlɨkwe nʉ Ngʉlʉve.
Ʉkʉkʉvɨlwa pa kulongwi jya kʉvomba inonu
8 Ndimalɨhɨtsa ʉkʉvavʉʉla nyɨ vooni ʉkʉta,
muveetsage nɨ numbula mamato,
na masaago mapamato nyɨ vooni,
ikange mulolanage nʉ kʉtangana.
Mugananage kɨlʉkolo,
muveetsage vadeke nʉ lwɨjiso.
9 Mulekage ʉkʉtavʉla ʉvʉviivi kʉ vaanu avikʉvavombela imbiivi,
evo amadʉsi kʉ madʉsi,
apeene muvavombelage inonu.
Ewo wʉ ʉNgʉlʉve inogwa muvombage,
pakʉta avasaje ʉnyie.
10 Aga galɨ ndʉwʉ ʉVʉvɨge ʉVʉvalatse witsova ʉkʉta,
“Ʉvaveetsaga ʉvɨ inogwa ʉkʉtaama vʉnonu,
nʉ kʉva nʉ lʉsajo,
anogye ɨlekelwe ʉkʉheeha avaanu,
nʉ kʉtsova ʉvʉnuasi.
11 Anogye ɨlekelwe ʉkʉvomba imbiivi,
apeene avombage inonu.
Ave itaama mu lʉnotsehetso na vanine,
alʉlondage siitso.
12 Ewo wʉ jɨlɨwo,
ʉlwakʉva ʉNtwa ʉNgʉlʉve ikʉvaloleela vʉnonu avagolosu,
ikange ipʉlɨka inyɨsajo tsa veene.
Lɨno ʉwʉ vivomba imbiivi,
ʉNgʉlʉve ikʉvaleka.”c
13 Veeni ʉvɨ iweesa ʉkʉvananga ʉnyie ɨngave mukɨhʉmya ʉkʉvomba inonu?
14 Lɨno nʉpwʉ jɨngave mukʉvɨlwa pa kulongwi jya kʉvomba itsa vʉgolosu,
ʉnyie mulɨ vagatalʉsu.
Pwʉ lɨno,
muleke ʉkʉtʉngʉtsiima evo ʉkʉvadwada avikʉvapelela ʉvʉkʉvɨlwa pange kʉhangajɨka,
15 apeene munʼginiage ʉKɨlɨsiti mu numbula tsiinyo ʉlwakʉva vɨ Ntwa.
Mutaamage mwɨsaawe ʉnsɨkɨ gwoni ʉkʉmwanda ʉvaveetsaga ʉvɨ ivʉʉtsa ikulongwi tsa lʉhʉʉvɨlo lwinyo.
16 Napeene,
muvombage ewo kʉ vʉdeke nʉ vʉdwadwa.
Muve nɨ numbula ɨnonu ʉlwakʉva ʉnyie mulɨ vakongi va Kɨlɨsiti,
pakʉta avo ʉwʉ vikʉvatsova ʉvʉnuasi kʉ nongwa jya lʉgendo lwinyo,
vavone soni.
17 Nditsova ewo ʉlwakʉva ɨngave ʉNgʉlʉve inogwa ʉkʉvɨlwe,
lʉnonu ʉkʉvɨlwe kʉ nongwa jya kʉvomba inonu ʉkʉlɨngʼaania nʉ kʉkʉvɨlwa kʉ nongwa jya kʉvomba imbiivi.
18 Namwene ʉKɨlɨsiti aakʉviilwe,
akaswa kapamato vʉvʉle kʉ nongwa jya vʉtulanongwa wiitu,
kwʉ kʉta ʉmuunu ʉnʼgolosu aasue pa kulongwi jya vaanu avatava vagolosu,
pakʉta atʉsajanie nʉ Ngʉlʉve.
Vaamʼbudile wʉ alɨ nʉ mmana gwa vʉmuunu,
napeene kʉ maka ga Mepo ʉMbalatse akatsʉʉka.
19 Kʉ maka ga Mepo ʉjwa,
akalʉta kʉ vaswe,
akavalʉmbɨlɨla ɨkulongwi jya Ngʉlʉve.
20 Avaswe avo wʉ katale vaabeelile ʉkʉmwɨdɨkɨla ʉNgʉlʉve,
ʉnsɨkɨ wʉ ʉNwaka itsenga ɨsafina.
ɄNgʉlʉve aasipile imbiivi tsa veene ʉkʉsikila ʉnsɨkɨ ɨsafina jisila ʉkʉnotsiwa.
Lɨno kʉ vʉmalɨlo avaanu vadebe,
kwʉ kʉta avaanu innaana (8) vʉvʉle wʉ ʉNgʉlʉve aavapokile,
navaaswe mu magasi.
21 Ago amagasi kɨhwananitso kya lwotso lwinyo lwa sigono sya nsɨkɨ ʉgʉ.
Ʉlwakʉva ʉnsɨkɨ mukwotsiwa jivoneka ʉkʉta ʉNgʉlʉve avapokile kʉ maka ga kʉtsʉʉka kwa Yɨɨsʉ Kɨlɨsiti.
Pwʉ lɨno,
ʉlwotso nalʉviili kwoga kʉ vʉsumbe wa kʉhetsa ɨliku lya mmana,
apeene kwʉ kwɨhʉmya kwa Ngʉlʉve kʉ numbula ɨnonu.
22 Ʉjwa ʉKɨlɨsiti alʉtile kʉkyanya,
ʉnsɨkɨ ʉgʉ ataamile ɨkɨvoko kya kʉndyo kya Ngʉlʉve,
apoonu pa wɨɨmɨkiwa ʉvʉlʉti.
Ilongotsa avasuungʼwa,
isipeliwa sya vʉtavʉlɨlwa na maka.