2
1 Pwʉ lɨno,
muvʉleke ʉvʉviivi wooni,
ʉvʉnuasi,
ʉvʉgelʉngʼanie,
ɨkɨvini,
nʉ vʉsongelengʼanie.
2-3 Lɨno mumalile ʉkʉvonza ikange mutengwe ʉkʉlʉmanya ʉkʉta ʉNtwa inʼgolosu.
a Pwʉ,
nda vaana avanyehe ʉwʉ vinogwa ɨliveele lya va vanyinaavo,
najyʉnyie muve nɨ kyʉmɨlwa kya liveele ɨlinonu lya limenyu lya Ngʉlʉve ɨlyʉ munganywe muweesa ʉkʉdʉlʉka nʉ kʉmmanya ʉNgʉlʉve lwoni.
Ɨkɨvʉmbʉkʉ ɨkɨvalatse
4 ɄNtwa ʉYɨɨsʉ vɨ liganga ɨlya wʉʉmi lya kʉtsengela.
Ɨliganga ɨlyo avaanu vaalɨbeelile,
napeene ʉNgʉlʉve aalɨhalile,
ikange lilʉti pamiiho pa mwene.
Lɨno mummegelele ʉYɨɨsʉ,
5 pwʉ najyʉnyie ʉNgʉlʉve ikʉvavombelaga nda maganga ga wʉʉmi pa kʉtsenga ʉmpelela.
Ʉnyie mulɨ vateeketsi avavalatse ʉwʉ vihʉmya isyavʉpe sya Vʉkɨlɨsiti isyʉ sikʉmmovosa ʉNgʉlʉve kʉ maka ga Yɨɨsʉ Kɨlɨsiti.
6 Lola,
ʉVʉvɨge ʉVʉvalatse witsova ikulongwi tsa Yɨɨsʉ Kɨlɨsiti wiita,
“Lolagi,
ʉkwa kʉ vʉtsenge wa Sayuni,
ndɨvɨɨkile ɨliganga lya pa nguto,
b
ɨlyʉ liganga ɨlihalwa ikange lyɨmɨkiwa.
Ʉmuunu ʉvaveetsaga ʉvɨ ikʉmwɨdɨka ʉjwa ʉvɨ vɨ liganga ɨlyo,
nalasʉʉke lʉsiku!”c
7 Ɨliganga ɨlɨ lya wɨɨmɨkiwa kwanyie ʉnyie nyɨ mukʉmwɨdɨka ʉYɨɨsʉ Kɨlɨsiti.
Lɨno kʉ valya ʉwʉ navikʉmwɨdɨka,
“Ɨliganga ɨlyʉ avatsenganyumba vaalɨbeelile,
ɨlyo lyʉ lɨvye liganga ɨlivaha lya kwibata ɨnyumba,
pa nguto jya waalo wa jyene.”d
8 Ikange,
“Ɨlɨ lyʉ liganga ɨlyʉ avaanu jʉvikɨkʉvɨtsaaga,
lyʉ liganga ɨlyʉ likʉvapelelaga avaanu vagwitsage.”
e
Vikʉvalaga ʉlwakʉva navalyɨdiiki ɨlimenyu lya Ngʉlʉve, ewo wʉ vaavɨɨkɨliiwe nʉ Ngʉlʉve ʉkʉhʉma katale.
9 Lɨno ʉnyie ʉNgʉlʉve avahalile muve vaanu va mwene.
Ʉnyie mulɨ vateeketsi va Lʉdeeva,
ikange kyʉ kɨvʉmbʉkʉ ɨkɨvalatse kya mwene ʉNgʉlʉve,
mulɨ Lʉdeeva lwa mwene.
Mwomoliiwe muve valʉmbɨlɨli va mbombo inonu tsa Ngʉlʉve,
aavɨɨlangile muhʉme mu ngʼiisi pakʉta muve va mwene mu lʉmuli ʉlʉnonu.f
10 Ʉnsɨkɨ gwa kʉnsana ʉkwa namwale vɨɨdɨki va Ngʉlʉve,
lɨno ʉnsɨkɨ ʉgʉ mulɨ vɨɨdɨki va mwene.
Ikange namwʉpɨlɨle ɨkɨsa kya Ngʉlʉve,
lɨno ʉnsɨkɨ ʉgʉ mwʉpɨlye.
Ʉkʉvapʉlɨka avalongotsi vooni
11 Vagane vango,
ndikʉvadoova siitso,
ʉlwakʉva mulɨ vahenza ikange valʉtanzɨla,
pagagi ʉvʉnogwe ʉvʉviivi wa mmana ʉwiilwa ɨligoha mu numbula tsiinyo.
12 Muveetsage nʉ lʉgendo ʉlʉnonu pavʉlongolo pa vaanu ʉwʉ navikʉmwɨdɨka ʉNgʉlʉve.
Lɨno ɨngave vitsova ʉvʉnuasi ʉkʉta muvomba imbiivi,
vatsivonage imbombo tsiinyo inonu.
Pwʉ jʉvalanʼginiaga ʉNgʉlʉve pa kulongwi jyanyie pa kɨgono ɨkyʉ alaava ikwitsa.
13 Ʉnyie ʉlwakʉva mulɨ vaanu ʉwʉ vikʉnkonga ʉNtwa ʉYɨɨsʉ,
pwʉ mutsikongage natsi ndagɨlo tsa kɨlʉnga kiinyo.
Mumwɨdɨkɨlage ʉmbaha viinyo va kɨlʉnga,
ʉlwakʉva ʉmwene vɨ ndamutsi ʉmbaha va vaanu vooni.
14 Ikange muvɨɨdɨkɨlage avalongotsi va mipandʉlʉ ʉwʉ ʉmbaha va kɨlʉnga avahalile.
Wʉ muvombage ewo ʉlwakʉva aveene vavɨɨkilwe ʉkʉta vavʉngage avaanu ʉwʉ vivomba imbiivi nʉ kʉvaginia valya ʉwʉ vivomba inonu.
15 Nditsova ewo ʉlwakʉva ʉNgʉlʉve inogwa mugendelelage ʉkʉvomba inonu pakʉta valya ʉwʉ vavʉla vʉmanyi valeke ʉkʉva nɨ kɨveetsaga kya kʉvatsova sivi ʉnyie.
16 Nʉpwʉ jɨngave ʉnyie mulɨ vaanu vavopolwa,
mulagelaga ʉkʉvɨɨka ʉvʉvopolwa wiinyo ʉkʉva nzɨla jya kʉvomba imbiivi,
apeene mutaamage ndʉwʉ avavombi va Ngʉlʉve vanogye ʉkʉtaama.
17 Muvɨɨmɨkage avaanu vooni nʉ kʉvagana avajiinyo aVakɨlɨsiti.
Muveetsage nʉ lʉdwado kwa Ngʉlʉve,
ikange mumwɨmɨkage ʉmbaha viinyo.
Avɨɨdɨki pavanogye vasipage ndʉwʉ ʉYɨɨsʉ aasipile
18 Ʉnyie vavanda,
vapʉlɨkagi avatwa viinyo,
ikange muvɨɨmɨkage,
nakwʉ kʉta veene valya ʉwʉ vikʉvavombela inonu na vadeke,
apeene na valya ʉwʉ vakali.
19 ɄNgʉlʉve jiikʉvasaja ʉnyie,
ɨngave mwisipa ʉvʉkʉvɨlwa ʉwʉ namunogiili,
ʉlwakʉva mulʉmanyile ʉkʉta ʉNgʉlʉve wʉ inogwa.
20 Namuweesi ʉkʉmmovosa ʉNgʉlʉve kʉ nzɨla jya kʉsipa ɨngave vikʉvavʉnga pa kulongwi jya mbiivi tsiinyo.
Apeene ɨngave mwisipa ʉvʉkʉvɨlwa ʉlwakʉva muvombile inonu,
pwʉ ʉNgʉlʉve ikʉvahovokela.
21 Munogye ʉkʉsipa ndavʉle,
ʉlwakʉva ʉKɨlɨsiti jyʉmwene aakʉviilwe pa kulongwi jyanyie.
Ikange akavalekela ɨkɨhwananitso,
ʉkʉta mwɨgage ʉkʉvomba ʉgwʉ aavombile.
22 “Ʉmwene naavombe imbiivi,
evo ʉkʉva nʉ vʉnuasi ʉvʉveetsaga.”g
23 Ʉnsɨkɨ vikʉnʼdʉka nakilivulage ɨlimenyu ɨlɨveetsaga ɨlya kʉdʉkɨla,
ʉnsɨkɨ vikʉmpelela ʉvʉkʉvɨlwa,
naagele ʉkwɨtavʉlɨla ɨkɨveetsaga ɨkya kʉvadwatsa,
apeene gooni aandekye ʉNgʉlʉve ʉvɨ ihɨga avaanu kʉ vʉgolosu.
24 ɄKɨlɨsiti jyʉmwene aapɨmbile ʉvʉtulanongwa wiitu mu mmana gwa mwene pa kɨdamingʼanie.
Aavombile ewo pakʉta ʉwe tʉleke ʉkʉlongotsiwa ikange ni mbiivi,
apeene tʉve nʉ vʉtaamo wa vʉgolosu.
Ʉmwene vaandemiitse,
pakʉta ʉnyie mupone.
25 Mwale ʉta ngʼolo itsijagile,
lɨno ʉnsɨkɨ ʉgʉ munkilivukye ʉNtwa ʉYɨɨsʉ,
ʉNʼdɨɨmi ikange ʉNdoleeli va numbula tsiinyo.