Ɨkalata ɨnatsi jya
Petulo
Ʉlʉpembetso lwa Petulo
1
1 Ɨkalata ɨjɨ ndɨvɨgile ʉne ndɨ Simoni Petulo,
ndɨ mpositili va Yɨɨsʉ Kɨlɨsiti.
Ndikʉvavɨgɨla ʉnyie nyɨ vahalwa va Ngʉlʉve,
nyɨ muhambile nʉ kʉva vahenza mu kɨlʉnga,
mulɨ kʉ Ponto,
kʉ Galatiya,
kʉ Kapadokiya,
kʉ Asiya na kʉ Bitiniya.
2 Ʉnyie muvye vɨɨdɨki va Ngʉlʉve ndʉwʉ aatalile ʉkʉvamanya ʉkʉhʉma katale,
nʉ kʉvavalatsa kʉ nzɨla jya Mepo va mwene.
Aga gaavombiike pakʉta muve vɨɨdɨhɨtsi kwa Yɨɨsʉ Kɨlɨsiti,
ikange pakʉta ʉmwene avamiitsile ʉnkisa gwa mwene.
a ɄNgʉlʉve avoongeletsaage ʉnyie ʉlʉhʉngʉ nʉ lʉnotsehetso kʉ wongosu.
Ʉlʉhʉʉvɨlo lwa wʉʉmi
3 Tʉnʼginie ʉNgʉlʉve ʉDadaaje va Ntwa viitu ʉYɨɨsʉ Kɨlɨsiti!
Kʉ kɨsa kya mwene ɨkɨvaha aatʉvɨɨkile ʉkʉta tʉholwe ʉlwa vɨɨlɨ,
ʉlwakʉva aantsʉʉsiitse ʉYɨɨsʉ Kɨlɨsiti ʉkʉhʉma kʉ vaswe.
Aavombile ewo pakʉta tʉve nʉ lʉhʉʉvɨlo lwa wʉʉmi,
ʉkʉta
4 tʉkʉʉpɨlɨle isajo itsʉ ʉNgʉlʉve avavɨɨkye avaanu va mwene kʉkyanya ʉkwʉ nakɨkʉli ɨkɨveetsaga ɨkinangɨka,
evo ɨkivola evo ɨkinyakasʉka.
5 Isajo itso tsyanyie ʉnyie nyɨ kʉ nzɨla jya lwɨdɨko,
muloleelwa na maka ga Ngʉlʉve.
Muloleelwa ʉkʉsikila ʉpwʉ mwikava ʉvʉpoki ʉwʉ vʉlavoneka mu kɨgono kya kʉ vʉsililo.
6 Lɨno hovokelagi isajo itso itsʉ ʉNgʉlʉve aalamwe ʉkʉvapa ʉnyie,
nʉpwʉ jɨngave ʉnsɨkɨ ʉgʉ panogye muve nʉ lʉsʉsʉvalo kʉ nsɨkɨ nsupi kʉ nongwa jya ngelo itsi niitsi.
7 Ʉkʉsipa mu ngelo itsi kuvonia ʉkʉta,
ʉlwɨdɨko lwinyo lwa lweli.
Lugelwa ndʉwʉ vigela isahabu kʉ nzɨla jya kʉnyianya nʉ mwoto.
Ʉkʉmwɨdɨka ʉNgʉlʉve kʉnonu siitso ʉkʉlʉtɨɨlɨla ɨsahabu,
manya ɨsahabu jinangɨka.
Pwʉ lɨno,
mulʉʉpɨlɨla ʉlʉginio,
ʉvʉdwadwa nʉ wɨɨmɨkiwa ʉnsɨkɨ ʉgwʉ ʉYɨɨsʉ Kɨlɨsiti aliitsa ʉlwa vɨɨlɨ nʉ kwɨvonia pavʉvalasu.
8-9 Nʉpwʉ jɨngave namumbweni,
munʼganile,
ikange mukʉmwɨdɨka.
Muhekela ʉlʉhekelo ʉlʉlʉti ʉlwʉ ʉmpangɨlwa niikya,
ʉlwakʉva mwʉpɨlye ʉvʉsumbe wa lwɨdɨko lwinyo ʉlwʉ kwʉ kʉpokwa kwa numbula tsiinyo.
10 Pa kulongwi jya vʉpoki wiinyo ʉwa,
avanyamalago vaalolengʼiinie siitso pakʉta vavʉmanye.
Vaatsovile amalago ga lʉhʉngʉ lwa Ngʉlʉve ʉlwavavɨɨkye ʉnyie.
11 ɄMepo va Kɨlɨsitib ʉvɨ aale mu nʼgati mu veene aatsovile akata ʉKɨlɨsiti alakʉvɨlwa,
kʉmbele alaava nʉ wɨɨmɨkiwa.
Avanyamalago avo vaalondile siitso ʉkʉta vatsimanye ikulongwi itsi tsilaava jʉndali ikange tsikwaganilaga nʉ veeni.
12 ɄNgʉlʉve aavavʉʉlile avanyamalago avo ʉkʉta ikulongwi itsʉ vaatsovaga natsyavavʉmbʉlɨle aveene,
apeene tsyale tsa kʉvavʉmbʉlɨla ʉnyie.
Ago gwʉ mwalʉmbɨliilwe na valya avaalʉmbɨlye ɨLivangɨli lya Yɨɨsʉ Kɨlɨsiti.
Naveene vaavalʉmbɨlye kʉ maka ga Mepo ʉMbalatse ʉvɨ ʉNgʉlʉve aansuungʼile ʉkʉhʉma kʉkyanya.
Ikulongwi itso tsʉ naveene avasuungʼwa vinogwa siitso ʉkʉtsimanya.
Avɨɨdɨki vaveetsage nʉ lʉgendo ʉlʉvʉla vʉviivi
13 Pwʉ lɨno,
mwɨsaavʉle nʉ kʉva vaanu va kwɨsiga,
muvɨɨke ʉlʉhʉʉvɨlo lwinyo lwoni mu lʉhʉngʉ ʉlwʉ mulʉʉpɨlɨla ʉnsɨkɨ ʉgwʉ ʉYɨɨsʉ Kɨlɨsiti alavoneka.
14 Muveetsage vaana va Ngʉlʉve avanya wɨɨdɨhɨtsi.
Mulagelaga ikange ʉkʉkonga ʉvʉnogwe wiinyo ʉvʉviivi ʉwʉ mwale nawo ʉnsɨkɨ wʉ mukaanale ʉkʉjɨmanya ɨlweli jya Ngʉlʉve.
15 Apeene,
ndʉwʉ ʉNgʉlʉve ʉvɨ avɨɨlangile imbalatse,
najyʉnyie muve vavalatse kʉ lɨveetsaga ɨlyʉ muvomba.
16 Ʉlwakʉva mu Vʉvɨge ʉVʉvalatse ʉNgʉlʉve iita,
“Muveetsage vavalatse,
ʉlwakʉva ʉne ndɨlɨ mbalatse.”c
17 ɄNgʉlʉve ʉvɨ mwita,
“Gwe Daada,”
mu nyɨsajo tsiinyo,
vɨ ihɨga avaanu vooni ʉkʉta viingile kʉ wʉʉmi wa sikutsooni evo vataagwe kʉ mwoto ʉkʉkongana ni mbombo tsa veene kɨtsila kʉtengelela vaninie.
Pwʉ lɨno,
munʼdwadage siitso mu nsɨkɨ ʉgʉ ʉgwʉ mutaama mu kɨlʉnga ʉmʉ nda vahenza.
18 Nditsova ewo ʉlwakʉva mulʉmanyile ʉkʉta ʉNgʉlʉve aavapokile pakʉta mulekage ʉkʉva nʉ lʉgendo ʉlwʉ nalʉnogiili ʉlwʉ mwʉʉpɨlye kʉ vanyienya viinyo.
Manya naavagombole ni siinu isyʉ sinangɨka ndi ndalama ni sahabu,
19 apeene aavagombwe nʉ nkisa ʉndʉti gwa Kɨlɨsiti.
Ʉmwene aale ʉta kakolo akatsila vʉviivi evo lideeha.
20 Ʉmwene aamanyikiike wʉ nakɨ kɨlʉnga kɨkaanale ʉkʉpelwa.
Napeene,
ʉNgʉlʉve akapʉlɨkɨla ʉkʉsikila ʉnsɨkɨ ʉgʉ gwa vʉsililo,
pwʉ andeetile nʉ kʉmbonia pavʉvalasu kʉ vʉsumbe waanyie.
21 Ʉmwene iitsile pakʉta avalongotse mumwɨdɨke ʉNgʉlʉve ʉvɨ aantsʉʉsiitse ʉYɨɨsʉ nʉ kʉmpa ʉwɨɨmɨkiwa,
pakʉta mumwɨdɨke nʉ kʉmmʉʉvɨla ʉNgʉlʉve.
22 Ʉlwakʉva mutaama ʉkʉkongana ni manyiiso tsa lweli itsa Yɨɨsʉ Kɨlɨsiti,
inumbula tsiinyo tsivalatsiiwe pakʉta muweese ʉkʉvagana avajiinyo mu wajɨlweli.
Lɨno mugananage kʉ numbula ɨmbalasu,
23 ʉlwakʉva muholilwe ʉlwa vɨɨlɨ.
Ʉkʉholwa kʉnʉ nakʉviili ndʉ kʉholwa na vahotsi va mmana,
ʉlwakʉva ʉvʉtaamo wa mmana,
kʉ vʉmalɨlo vʉswe.
Apeene muholilwe pakʉta muve nʉ wʉʉmi wa sikutsooni ʉwihʉma mu limenyu lya Ngʉlʉve.
Ɨlimenyu ɨlyo lɨnya wʉʉmi ikange lya sikutsooni.
24 ɄVʉvɨge ʉVʉvalatse wiita,
“Avaanu vooni valɨ ndʉ lʉhamba,
nʉ vʉnonu wa lwene vʉlɨ ndʉ vʉlʉva wa mwinyasi.
Ʉlʉhamba nʉ vʉlʉva siniala,
25 lɨno ɨLimenyu lya Ntwa ʉNgʉlʉve lya jɨlweli sikutsooni.”
d
Ɨlimenyu ɨlyo lyʉ Livangɨli ɨlyʉ mwalʉmbɨliilwe ɨlya Yɨɨsʉ Kɨlɨsiti.