Ɨkɨgono kya kwitsa ʉNtwa ʉYɨɨsʉ
3
1 Vagane vango,
ɨjɨ kalata jyango jya vɨɨlɨ ɨjyʉ ndikʉvavɨgɨla.
Mu kalata tsyoni itsi ivɨlɨ,
ndikʉvakʉmbʉhɨtsa ʉnyie ikulongwi tsa siinu isyʉ musimanyile,
pakʉta tsivatangage ʉkʉsaaga vʉnonu ikulongwi tsa siinu isi.
2 Ndinogwa mukʉmbʉke amamenyu ʉgwʉ vaatsovile katale avanyamalago va Ngʉlʉve,
nʉ lʉlagɨlo lwa Ntwa ʉMpoki viitu ʉlwʉ avapositili va mwene vaavapye ʉnyie.
3 Ɨkɨɨnu ɨkɨvaha ndinogwa mulʉmanye ʉkʉta kʉ sigono sya kʉ vʉsililo valiitsa avaanu avanya nyovelo,
ʉwʉ valakongaga ʉvʉnogwe wa veene veene.
Valavahovelaga ʉnyie
4 valateetsaga,
“ɄKɨlɨsiti aavahʉʉviitse ʉkʉta aliitsa!
Ndeeti,
lɨno alɨ ndaku?
Ikulongwi tsilɨ tsiitsi ʉkʉhʉma kʉ vanyienya viitu.
Isiinu sivoneka silɨ vʉle vʉle ʉmwʉ syaveelye ʉkʉhʉma pa vʉtengʉlɨlo wa kɨlʉnga!”
5 Avaanu avo,
vikɨvɨɨka ʉta vasaamilwe ʉkʉta katale ʉNgʉlʉve aatsovile ɨlimenyu lyene,
kʉkyanya nɨ kɨlʉnga sikapelwa.
Aapelile ɨkɨlʉnga ʉkʉhʉma mu magasi ikange akakɨtsʉngʉtɨtsa amagasi.
6 Kʉmbele kʉ nzɨla jya magasi ago,
ɨkɨlʉnga kya nsɨkɨ gʉlya kɨkoongometswa.a
7 Ikange kʉ limenyu lɨɨlyo ʉNgʉlʉve avɨɨkile kʉkyanya nɨ kɨlʉnga kya nsɨkɨ ʉgʉ sive sya kʉnyianywa nʉ mwoto.
Asivɨɨkile kʉ vʉsumbe wa kʉsinyianya pa kɨgono kɨlya ɨkyʉ alavahɨga avaanu avatava vagolosu nʉ kʉvoongometsa.
8 Lɨno,
vagane vango,
muleke ʉkʉsaamwa ʉkʉta kʉ Ntwa ʉNgʉlʉve,
ɨkɨgono kɨpamato kɨlɨ ndɨ myaka elufu (1,000),
ikange ɨmyaka elufu gɨlɨ ndɨ kɨgono kɨpamato.b
9 Avaanu avange visaaga viita ʉNtwa ʉNgʉlʉve jiilɨndɨla ʉkʉvomba galya ʉgwʉ aavahʉʉviitse,
lɨno nakalɨndɨle.
Ʉmwene nya lʉsipililo pa kulongwi tsyanyie,
ninogwa ʉmuunu ʉvaveetsaga ajage,
apeene inogwa ʉkʉta vooni vapele imbiivi tsa veene.
10 Ɨkɨgono kya kʉkilivuka ʉNtwa ʉYɨɨsʉ mu kɨlʉnga kɨliitsa mu lʉkenyemuko ʉngata ndyasi.
Mu kɨgono ɨkyo,
kʉkyanya kʉlajaganika kʉ lwoveelo ʉlʉvaha,
isiinu isilɨmwo ʉmwa silanyianywa nʉ mwoto,
nakyene ɨkɨlʉnga kɨloongometswa paninie ni siinu syoni isilɨmwo ʉmwa.
11 Lɨno,
ʉlwakʉva alavejanga isiinu syoni kʉ nzɨla ɨjyo,
ndeeti,
ʉnyie pavanogye ʉkʉva vaanu avalɨ ndeeti?
Pavanogye ʉkʉtaama mu vʉvalatse nʉ kʉmwɨmɨka ʉNgʉlʉve.
12 Mupʉlɨkɨlage ɨkɨgono kɨlya ɨkya Ngʉlʉve nʉ kʉlonda ʉkʉta kiitse ngʼaningʼaani.
Ɨkɨgono ɨkyo ʉNgʉlʉve alanyianya kʉkyanya nʉ mwoto nʉ kʉnanga,
isiinu isilɨmwo silengʉka mu lʉlimbo lwa mwoto ʉgwa.
13 Lɨno ʉwe tupʉlɨkɨla ʉvʉtandaatse ʉvʉpya nɨ kɨlʉnga ɨkɨpya ʉmwʉ vʉdɨgile ʉvʉgolosu,
ndʉwʉ aatʉhʉʉviitse.
14 Pwʉ lɨno vagane vango,
wʉ mupʉlɨkɨla ɨkɨgono kɨlya,
gimbagi ʉkʉtaama mu vʉgolosu pakʉta muve kɨtsila vʉviivi pamiiho ga Ngʉlʉve,
kange muve nʉ lʉnotsehetso.
15 Mukʉmbʉkage ʉkʉta ʉNtwa nya lʉsipililo ʉlwakʉva inogwa avaanu vapokwe.
Vʉvʉle vʉle najyʉ mwɨdɨkinʼjiitu ʉPaulo ʉnʼgane aavavɨgye kʉ vʉmanyi ndʉwʉ ʉNgʉlʉve aampye.
16 Ago gwʉ itsova mu kalata tsa mwene tsyoni.
Kwʉgale ʉgwʉ mapala ʉkʉgamanya mu kalata tsa mwene itso.
Amamenyu ago,
avaanu avatsimu,
ʉwʉ vavʉla wajɨlweli mu lwɨdɨko,
vikʉgajatsɨlɨngʼania,
ndʉwʉ vijatsɨlɨngʼania ʉVʉvɨge ʉVʉvalatse ʉvʉnge.
Pa kʉvomba ewo,
vipela ʉlwongometso lwitse kʉ veene.
Amamenyu ga vʉmalɨlo
17 Mwe vagane vango,
lɨno mutsimanyile ikulongwi tsa vamanyisi va vʉnuasi avo.
Pwʉ lɨno,
muveetsage miiho,
muleke ʉkʉjatsiwa mu vʉsyovi wa vavombambiivi avo avinogwa mugwe,
mulʉleke ʉlwɨdɨko lwinyo lwa jɨlweli.
18 Apeene mugendelelage ʉkʉtaama mu lʉhʉngʉ na mu vʉmanyi wa Yɨɨsʉ Kɨlɨsiti ʉvɨ ʉmwene vɨ Ntwa ikange vɨ Mpoki viitu.
Ʉwɨɨmɨkiwa vʉveetsage kʉ mwene,
ʉnsɨkɨ gwa lɨno na sikutsooni!
Ameni.