Luuka 5

ɄYɨɨsʉ ikʉvɨɨlanga avakongi avatatsi

(Mataayo 4:18-22; Maliko 1:16-20)

1 Ɨkɨgono kɨpamato ʉYɨɨsʉ ɨɨmile pa lʉkanzi pa nyanza jya Genesaleti, aamanyiisaaga ɨlimenyu lya Ngʉlʉve. Avaanu vongosu vakahegelela kʉ mwene kukʉmpʉlɨhɨtsa, pwʉ vakamʼbanyilitsa. 2 ɄYɨɨsʉ akavʉvona ʉwaato vʉvɨlɨ mu lʉkanzi lwa nyanza. Avalovi va somba, avenenawo ʉwaato ʉwa navaalemwo, ʉlwakʉva vaale kwisuka ɨmisʉngʉlʉ gya veene. 3 ɄYɨɨsʉ akiingila mu waato ʉwʉ waale wa Simoni. Akanʼdoova ʉSimoni ahɨlɨke ʉwaato kʉgati padebe mu nyanza. Pwʉ ʉYɨɨsʉ akataama mu waato, alɨkʉmanyiisa ɨkɨpʉga kya vaanu.

4 Wʉ amalile ʉkʉmanyiisa, akambʉʉla ʉSimoni akata, “Hɨlɨka ʉwaato kʉgati kʉ nyanza. Ʉkwa mukiise ɨmisʉngʉlʉ giinyo, mukalove isomba.” 5 ɄSimoni akamwanda ʉYɨɨsʉ akata, “Gwe Mbaha, tʉvombile ɨmbombo ɨkɨlo jyoni, natʉkavili kɨɨnu. Lɨno, ʉlwakʉva ʉve ʉtsovile ɨlɨ, ʉne ndikiise ɨmisʉngʉlʉ.”

6 ɄSimoni na vanine vakatsikwisa ɨmisʉngʉlʉ gya veene. Wʉ visiitse, isomba nyongosu siitso tsikagwɨla, nagɨ misʉngʉlʉ gɨkatengʉla ʉkʉlegetʉka. 7 Pwʉ vakavɨɨlanga avajyavo ʉwʉ vaale mu waato ʉvʉnge, ʉkʉta viitse kukʉvatanga. Vakiitsa, vakadɨtsa isomba mu waato wooni wʉ vʉvɨlɨ. Isomba tsyale nyongosu siitso pwʉ naweene ʉwaato vʉkava ʉta vudwiviila.

8 ɄSimoni Petulo wʉ agaweene ago, akasugama kwa Yɨɨsʉ akata, “Gwe Ntwa, ndikʉkʉdoova ʉhege paane, ʉlwakʉva ʉne ndɨlɨ ntulanongwa.” 9 ɄSimoni aatsovile ago, ʉlwakʉva ʉmwene na vanine vooni vaadegile siitso pa kulongwi jya somba nyongosu itsʉ vaalovile. 10 ɄYakobo nʉ Yohana, avaana va Zebedayo, ʉwʉ vaavombaga ɨmbombo paninie nʉ Simoni, naveene vakadega siitso. Pwʉ ʉYɨɨsʉ akambʉʉla ʉSimoni akata, “Ʉladwadaga, ʉkʉhʉma lɨno vuveetsaga indovi va vaanu.” 11 Pwʉ vakavʉhɨlɨka ʉwaato wa veene kʉ lʉkanzi lwa nyanza, vakasileka syoni, valɨkʉnkonga ʉYɨɨsʉ.

ɄYɨɨsʉ ikʉmbalatsa ʉmuunu ʉnya bʉʉba

(Mataayo 8:1-4; Maliko 1:40-45)

12 Ɨkɨgono kɨpamato ʉYɨɨsʉ akiingila mu vʉtsenge vʉpamato. Ʉmwa aalemwo ʉmuunu ʉnya bʉʉba ʉmmana gwoni. Ʉmuunu ʉlya wʉ ambwene ʉYɨɨsʉ, akɨgwisa kɨvʉgudamo pa Yɨɨsʉ, akansiima akata, “Gwe Ntwa, ʉngave vunogwa ʉkʉmbalatsa, ndidoova ʉmbalatse!” 13 ɄYɨɨsʉ akagolosa ɨkɨvoko kya mwene, akamwibata akata, “Ndinogwa, ʉvalatsiwe!” Ʉnsɨkɨ gʉʉgwa ɨbʉʉba jɨkahega mu mmana gwa mwene. 14 Akandagɨla ʉmuunu ʉlya akata, “Lola, ʉlambʉʉlaga ʉmuunu ʉvaveetsaga ɨkulongwi ɨjɨ, apeene ʉbɨhe ʉkɨvonie kʉ nteeketsi nʉ kʉhʉmya isyavʉpe sya kʉvonia ʉkʉta ʉvalatsiiwe ndʉwʉ ʉlʉlagɨlo lwa Moose lulagɨla. Ɨkɨ kɨveetsage kɨmanyilo kʉ vaanu kya kʉpona kwave.” 15 Napeene, ikulongwi tsa Yɨɨsʉ tsikoongelela ʉkʉpʉlɨkɨka imbasu tsyoni. Ɨkɨpʉga ɨkɨvaha kya vaanu kɨlɨkʉlʉndamana kukʉmpʉlɨhɨtsa, nʉ kʉponetsiwa isitamu sya veene. 16 Napeene, ʉmwene aalʉtaga ʉkwʉ kʉtsila vaanu, kukɨsaja.

ɄYɨɨsʉ alɨ nawo ʉvʉtavʉlɨlwa wa kʉsyɨkɨla imbiivi tsa vaanu

(Mataayo 9:1-8; Maliko 2:1-12)

17 Ɨkɨgono ɨkɨnge ʉYɨɨsʉ aamanyiisaaga avaanu. Mu vaanu avo vaalemwo aVafalisayo na vamanyisi va ndagɨlo avaahʉmile mu matsumbe gooni ga kʉ Galilaya na ga kʉ Yuuda, na mu vʉtsenge wa Yelusalemu. Amaka ga Ntwa ʉNgʉlʉve gaale nʉ mwene pa kʉponia avatamu.

18 Pwʉ vakiitsa avaanu vampɨmbile mu kɨtanda ʉmuunu ʉvɨ aasugujwike ʉmmana, valɨkʉnogwa ʉkʉmwingitsa mu nyumba pakʉta vambɨɨke ʉpwʉ aale ʉYɨɨsʉ. 19 Napeene, vakalemwa ʉkʉmwingitsa ʉntamu ʉlya pa ndyango, pakʉva avaanu vaadɨgile siitso. Pwʉ vakatoga kʉ kɨtʉʉvɨlɨ, vakahotola ɨndwelo. Apo vakamwisa ʉvasugujwike ʉlya mu liteesu, pagatinagati ʉpwʉ aale ʉYɨɨsʉ.

20 Namwene ʉYɨɨsʉ wʉ aweene valɨ nʉ lwɨdɨko kʉ mwene, akambʉʉla ʉvɨ asugujwike ʉmmana, akata, “Lʉkolo, ʉsyɨkɨliiwe imbiivi tsyako.” 21 Pwʉ avamanyisi va ndagɨlo na Vafalisayo valya vakatengʉla ʉkwɨvʉʉtsa valɨkʉta, “Oogo, vɨ veeni ʉjʉ ʉvɨ idʉkɨla kwa Ngʉlʉve? Nalʉmanyili ʉkʉta ʉNgʉlʉve mwene vɨ isyɨkɨla imbiivi?” 22 ɄYɨɨsʉ akagamanya ago ʉgwʉ vɨɨvʉʉtsaaga. Pwʉ akavavʉʉtsa akata, “Kɨki mulɨ na masaago ago mu numbula tsiinyo? 23 Lɨno! Lyebeepe lɨlɨku, ʉkʉmbʉʉla ʉvasugujwike ʉmmana ʉkʉta, ‘Ʉsyɨkɨliiwe imbiivi tsyako,’ evo ʉkʉta, ‘Ɨma, ʉgendage’? 24 Ndinogwa mulʉmanye ʉkʉta ʉMwana va Muunu alɨ nʉ lʉlagɨlo pa kɨlʉnga ʉlwa kʉsyɨkɨla imbiivi.” Baaho akambʉʉla ʉvɨ asugujwike ʉmmana akata, “Ndikʉkʉvʉʉla wɨɨme, toola ɨliteesu lyako, ʉvujage kʉ nyumba!” 25 Baaho akɨɨma pamiiho ga veene, akapɨmba ɨliteesu lya mwene, akahega alɨkʉvuja kʉ myave kʉnʉ ikʉnʼginia ʉNgʉlʉve. 26 Pwʉ vooni valɨkʉdega nʉ kʉnʼginia ʉNgʉlʉve, vakava nʉ lʉdwado, vakata, “Ɨleelo tʉtsiweene itsa kʉdega.”

ɄYɨɨsʉ ikʉmwɨlanga ʉLawi

(Mataayo 9:9-13; Maliko 2:13-17)

27 Kʉmbele, ʉYɨɨsʉ akahʉma mu nyumba jɨlya, akambona ʉnsangʉtsi va songo mpamato, ʉvɨ aatambʉlwagwa Lawi, ataamile apoonu ʉpwʉ aasonzaaga ɨsongo. ɄYɨɨsʉ akambʉʉla akata, “Tʉvʉʉke ʉngʼongage.” 28 Palya ʉLawi akasileka syoni, akahega, alɨkʉnkonga ʉYɨɨsʉ.

29 Kʉmbele, ʉLawi akannotsehetsa ʉYɨɨsʉ ɨkyakʉlya kya lʉhekelo mu nyumba jya mwene. Ikange kyalepwo ɨkɨpʉga ɨkɨvaha kya vasangʉtsi va songo na vaanu avange avaataamile valɨkʉlya paninie nave. 30 Pwʉ aVafalisayo na vamanyisi va ndagɨlo ʉwʉ naveene vaale Vafalisayo, vakatengʉla ʉkwɨlwenga kʉ vakongi va Yɨɨsʉ valɨkʉta, “Kɨki mwilya nʉ kʉnywa paninie na vasangʉtsi va songo na vatulanongwa?” 31 ɄYɨɨsʉ akavaanda akata, “Avatava vatamu navilonda ʉnʼganga, veene avatamu wʉ veene vilonda ʉnʼganga. 32 Nanditsili kukʉvɨɨlanga avikɨvona vagolosu, ndɨviitsye avatulanongwa, pakʉta vapelage imbiivi tsa veene.”

Ɨkulongwi jya kwɨdɨnda ʉkʉlya

(Mataayo 9:14-17; Maliko 2:18-22)

33 Avaanu valya vakata kwa Yɨɨsʉ, “Avakongi va Yohana na vakongi va Vafalisayo, kakongosu, valɨ nalwo ʉlwiho lwa kwɨdɨnda ʉkʉlya, pa vʉsumbe wa kwɨvɨɨka mu nyɨsajo. Kɨki avakongi vaako viilya nʉ kʉnywa isigono syoni!” 34 ɄYɨɨsʉ akavaanda akata, “Avaanu ʉwʉ vɨlangilwe viitse kʉ vʉtegʉlanie, wʉ valɨ paninie nʉ ntegʉlanʼdala, namukagele ʉkʉvasiga ʉkʉlya. 35 Lola, gʉliitsa ʉnsɨkɨ ʉgwʉ ʉntegʉlanʼdala alahetsiwa pagati pa veene, apo pwʉ valɨdɨndaga ʉkʉlya.” 36 Akavavʉʉla ɨkɨtsovo akata, “Nakʉli ʉmuunu ʉvɨ igɨda ɨkɨlaka mu nsabwa ʉmpya, pa vʉsumbe wa kʉhonela mu nsabwa ʉndaala. Angave ivomba ɨlyo, jiiva aagɨdile ʉnsabwa ʉmpya, ikange ɨkɨlaka ɨkyo nakɨkahwanane nʉ nsabwa ʉndaala. 37 Ikange, nakʉli ʉmuunu ʉvɨ iduudila ɨdivai ɨɨmya mu sipako isya ngwembe isilaala. Ɨngave iduudila, ɨdivai ɨjyo ɨɨmya jibatsʉla isipako isyo, pwʉ ɨdivai jiduudika nasyene isipako sya ngwembe sinangɨka. 38 Panogye ʉmuunu aduudilage ɨdivai ɨɨmya mu sipako sya ngwembe isipya. 39 Ikange nakʉli ʉmuunu ʉvɨ inogwa ʉkʉnywa ɨdivai ɨɨmya, wʉ anyue ɨndaala, manya iita, ‘Ɨdivai ɨndaala jyʉ jɨlʉtɨɨlye ʉvʉnonu.’ ”