Maliko 1

ƗLivangɨli

ndʉwʉ lyavɨgilwe nʉ Maliko

ɄYohana inotsa ʉmwa kʉgenda ʉYɨɨsʉ

(Mataayo 3:1-12; Luuka 3:1-18; Yohana 1:19-28)

1 Ʉvʉ wʉ vʉtengʉlɨlo wa Livangɨli lya Yɨɨsʉ Kɨlɨsiti, ʉMwana va Ngʉlʉve. 2 Ɨkulongwi ɨjɨ jyatengwe ndʉwʉ jyavɨgilwe mu kɨtabu ɨkya nyamalago ʉYesaya. ɄNgʉlʉve akata,

“Lola, ndikʉnsuungʼa ʉmbombi vango alongole paave,

ʉjwa vɨ mwene inotsaaga ɨnzɨla jyave.”

3 “Ʉmuunu ikwɨlanga mu lʉkɨnga iita,

‘Munotsaage ɨnzɨla jya Ntwa,

mugolosaage ʉmwakʉlʉta ʉmwene.’ ”

4 Pwʉ kʉmbele akahʉmɨla mu lʉkɨnga ʉmuunu mpamato ʉvɨ ɨlitaawa lya mwene aale vɨ Yohana ʉMwotsi. Alɨkʉlʉmbɨlɨla ʉkʉta avaanu valaatage imbiivi tsa veene nʉ kwotsiwa, pakʉta ʉNgʉlʉve avasyɨkɨle. 5 Avaanu vongosu, ʉkʉhʉma kʉ vʉtsenge wa Yelusalemu nɨ kɨlʉnga kyoni ɨkya Yuuda, valɨkʉlʉta kwa Yohana kukʉmpʉlɨhɨtsa. Valɨkʉpela imbiivi tsa veene. Pwʉ baaho ʉYohana ʉMwotsi alɨkʉvootsa mu lʉgasi ʉlwa Yolodani.

6 ɄYohana aaswalaga ʉnsabwa ʉgʉhonilwe nʉ lwage lwa ngamila nʉ kwɨpinya mu kɨvino ʉnkanda gwa ngwembe. Ɨkyakʉlya kya mwene kyale ɨkɨvale nʉ wʉʉke wa mu nsitu. 7 Akava ilʉmbɨlɨla iita, “Ʉne ndikʉvootsa na magasi, apeene ikwitsa ʉnya maka ʉkʉlʉtɨɨlɨla kwane, ʉvɨ nandɨnogiili nakʉ kʉva mbanda va kʉhʉdʉla ɨmilegehe ɨgya silaatu sya mwene, 8 ʉmwene ʉjwa jiikʉvootsaaga ʉnyie nʉ Mepo ʉMbalatse nʉ mwoto.”

Ʉkwotsiwa nʉ kʉgelwa kwa Yɨɨsʉ

(Mataayo 3:13–4:11; Luuka 3:21-22; 4:1-13)

9 Isigono isyo, ʉYɨɨsʉ akahʉma mu vʉtsenge wa Nazaleti, mu kɨlʉnga ɨkya Galilaya, akiitsa kʉ lʉgasi lwa Yolodani pakʉta ootsiwe nʉ Yohana. 10 ɄYɨɨsʉ wʉ ihʉma mu magasi, akasɨkɨ kaako, akavona kʉkyanya kudɨndʉka, nʉ Mepo ʉMbalatse ikʉmwikila mu kɨhwani kya ngʉndya. 11 Ɨlimenyu lɨkapʉlɨkɨka ʉkʉhʉma kʉkyanya lɨkata, “Ʉve veeve Mwana vango vɨ nʼgane, vɨ vukʉnnyovosa ʉne.”

12 Ʉnsɨkɨ gʉʉgwa, ʉMepo ʉMbalatse akandongotsa ʉYɨɨsʉ ʉkʉbɨha kʉ lʉkɨnga. 13 Ʉkwa akataama isigono isitsigo sinni (40). Mu sigono isyo alɨkʉgelwa nʉ ntavangwa ʉSetano. Ʉkwa kʉ lʉkɨnga aataamaga ni sikanu isya mu lʉkɨnga. Ikange vaalekwo avasuungʼwa va Ngʉlʉve, valɨkʉmbombela.

ɄYɨɨsʉ ikʉvɨɨlanga avakongi vanni avatatsi

(Mataayo 4:12-22; Luuka 4:14-15; 5:1-11)

14 Kʉmbele, ʉYohana ʉMwotsi akakʉngwa mu kɨkʉngwa. Ʉnsɨkɨ ʉgwa wʉ akʉngilwe, ʉYɨɨsʉ akabɨha kʉ Galilaya, akatengʉla ʉkʉlʉmbɨlɨla ɨLivangɨli ʉkʉhʉma kwa Ngʉlʉve, alɨkʉta, 15 “Ʉnsɨkɨ ʉgwapʉlɨkɨlwagwa gʉsiike, ʉLʉdeeva lwa Ngʉlʉve lʉhegelye. Laatagi imbiivi tsiinyo nʉ kʉlyɨdɨka ɨLivangɨli.”

16 Ɨkɨgono kɨpamato, wʉ igenda kʉ lʉkanzimbale lwa nyanza ɨjya Galilaya akavavona avanamuunu vavɨlɨ: ʉSimoni nʉ nnunaave ʉAndeleya. Aveene avo vaategaga ɨmisʉngʉlʉ mu nyanza, manya vaale valovi va somba. 17 Pwʉ ʉYɨɨsʉ akavavʉʉla akata, “Itsagi mungʼongage! Ʉne ndikʉvavɨɨka ʉnyie muve valovi va vaanu.” 18 Ʉnsɨkɨ gʉʉgwa vakagɨleka ɨmisʉngʉlʉ gya veene, valɨkʉnkonga ʉYɨɨsʉ. 19 Wʉ alʉtile pavʉlongolo padebe, akavavona ʉYakobo nʉ nnunaave ʉYohana, avaana va Zebedayo. Naveene ava vaale mu waato wa veene valɨkʉtetengʼania ɨmisʉngʉlʉ gya veene. 20 ɄYɨɨsʉ akavɨɨlanga vave vakongi va mwene. Vakandeka ʉdadajyavo ʉZebedayo paninie na vavombi va mwene mu waato, valɨkʉnkonga ʉYɨɨsʉ.

ɄYɨɨsʉ alɨ na maka ʉkʉhʉmya imepo imbiivi

(Luuka 4:31-37)

21 ɄYɨɨsʉ na vakongi va mwene avo vakalʉta kʉ Kapelenaumu. Wʉ kɨsiike ɨkɨgono ɨkya Sabato, ʉYɨɨsʉ akiingila mu nyumba ɨjya kwɨsajɨla ɨjyatambʉlwagwa lisinagogi, akamanyiisa. 22 Pwʉ avaanu vooni avaampʉlɨhiitse vakadega siitso kʉ manyiiso tsa mwene, manya aamanyiisaaga ndʉ muunu ʉnya vʉtavʉlɨlwa, natsyale manyiiso ndi tsa vamanyisi va ndagɨlo va veene.

23 Lola, mu nʼgati mu lisinagogi, aalemwo ʉmuunu ʉnya mepo imbiivi. Akakoola, 24 akata, “Tʉtulile kɨki ʉwe kwave, vɨ Yɨɨsʉ va kʉ Nazaleti? Ndeeti, witsile kukʉtwongometsa? Tʉkʉmanyile ʉkʉta veeve veeni. Ʉve veeve Mbalatse va Ngʉlʉve!” 25 ɄYɨɨsʉ akatsitanila akata, “Nuunali! Hʉmi mu muunu ʉjʉ.” 26 Pwʉ imepo imbiivi tsikanʼgwisa ɨligotsi, tsikalɨla nʉ kʉkoola, tsikahʉma. 27 Avaanu vooni vakadega, nʉ kʉvʉʉtsania vakata, “Ɨkɨ kyʉ kɨɨnu kɨki? Ʉlʉ lʉmanyiiso lʉpya ikange imanyiisa kʉ vʉtavʉlɨlwa! Lola, ʉmuunu ʉjʉ alɨ na maka amalʉti na ga kʉhetsa imepo imbiivi, natsyene tsikʉmpʉlɨka.” 28 Ikulongwi itso itsa Yɨɨsʉ tsikavaala ngʼaningʼaani mu kɨlʉnga kyoni ɨkya Galilaya.

ɄYɨɨsʉ iponia avaanu vongosu

(Mataayo 8:14-17; Luuka 4:38-41)

29 Wʉ vahʉmile mu lisinagogi, ʉYɨɨsʉ aale paninie na vakongi va mwene: ʉSimoni, ʉAndeleya, ʉYakobo nʉ Yohana. Ava vooni vakalʉtania paninie kʉ nyumba jya Simoni nʉ Andeleya. 30 Ʉnsɨkɨ ʉgwa ʉvanyina va nʼdala va Simoni aale intamu, ɨmʉngʉ jyamwibiite siitso, akava agonile pa kɨtanda. ɄYɨɨsʉ wʉ asiike vakambʉʉla ɨkulongwi ɨjɨ. 31 Pwʉ ʉYɨɨsʉ akabɨha ʉpwʉ aale ʉntamu, akamwibata ɨkɨvoko, akamwinamula. Ʉnsɨkɨ gʉʉgwa ʉntamu akapona, akatengʉla ʉkʉvavombela.

32 Wʉ vʉhue, avaanu valɨkʉmmɨlɨkɨla avatamu vooni na vanya mepo imbiivi. 33 Avaanu avaahʉmile mu vʉtsenge wooni vakalʉndamana kʉnzi pa ndyango. 34 Pwʉ ʉYɨɨsʉ akavaponia vongosu avaale nʉ vʉtamu ʉvʉveetsaga. Akaswɨma imepo imbiivi nyongosu, ikange naatsitavʉle ʉkʉta tsintsovage, pakʉva tsyammanyile ʉkʉta ʉmwene veeni.

ɄYɨɨsʉ ilʉmbɨlɨla kʉ Galilaya

(Luuka 4:42-44)

35 Ɨkɨgono ɨkyakongile pavʉsiku jyɨkɨlo ʉYɨɨsʉ akahega, akabɨha apoonu apatsila vaanu, akatengʉla ʉkwɨsaja. 36 Pwʉ ʉSimoni na vakongivanine vakabɨha kukʉndonda ʉYɨɨsʉ. 37 Vaavye vambwene vakambʉʉla vakata, “Avaanu vooni vikʉkʉlonda.” 38 ɄYɨɨsʉ akavavʉʉla akata, “Tʉleke ʉkʉkilivuka ʉkwʉ tʉhʉmile, tʉbɨhage ʉkwonu ʉkʉnge, kʉ vʉtsenge ʉvʉlɨ mu wiipi, ndɨkalʉmbɨlɨle nakwene. Ɨkɨ kyʉ kɨɨnu ɨkyambɨɨkile ndiitse.” 39 Pwʉ alɨkʉgenda mu kɨlʉnga kyoni ɨkya Galilaya, alɨkʉlʉmbɨlɨla mu masinagogi ga veene nʉ kʉswɨma imepo imbiivi mu vaanu.

ɄYɨɨsʉ ikʉmponia ʉmuunu ʉnya bʉʉba

(Mataayo 8:1-4; Luuka 5:12-16)

40 Ɨkɨgono kɨpamato ʉmuunu ʉnya bʉʉba akamʼbɨhɨla ʉYɨɨsʉ, akasugama, akanʼdoova akata, “Gwe Ntwa, ʉngave vunogwa ʉkʉmbalatsa, ndidoova ʉmbalatse!” 41 ɄYɨɨsʉ akankolela ɨkɨsa, akamwibata akata, “Ndinogwa, ʉvalatsiwe!” 42 Akavalɨlo kaako ɨbʉʉba jɨkandeka ʉmuunu ʉjwa, akapona lwoni. 43 Baahalya palya ʉYɨɨsʉ akantavʉla alʉtage, ikange akandagɨla akata, 44 “Lola, ʉlambʉʉlaga ʉmuunu ʉvaveetsaga ɨkulongwi ɨjɨ, apeene ʉbɨhe ʉkɨvonie kʉ nteeketsi nʉ kʉhʉmya isyavʉpe sya kʉvonia ʉkʉta ʉvalatsiiwe ndʉwʉ ʉlʉlagɨlo lwa Moose lulagɨla. Ɨkɨ kɨveetsage kɨmanyilo kʉ vaanu kya kʉpona kwave.” 45 Ʉmwene naanuunale, akabɨha kwitsova ɨkulongwi ɨjyo kʉ vaanu vooni. Kʉ nongwa ɨjɨ ʉYɨɨsʉ naagele ikange ʉkwingila pavʉvalasu mu vʉtsenge ʉwaveetsaga, akɨpʉga, akava apoonu apavʉla vaanu. Napeene, avaanu valɨkʉmwitsila ʉkʉhʉma imbasu tsyoni.