ɄYohana ʉMwotsi ilʉmbɨlɨla kʉ lʉkɨnga
3
1 Gwale mwaka gwa kɨtsigo na gɨhaano (15) ʉkʉhʉma ʉKaisali ʉTibeliyo itengʉla ʉkʉlongotsa ʉlʉdeeva lwa Kɨlooma.
Ʉnsɨkɨ ʉgwa ʉPontiyo Pilatoa aalongotsaaga ʉmpandʉlʉ gwa kʉ Yuuda.
ɄHelode aalongotsaaga ʉmpandʉlʉ gwa kʉ Galilaya,
ikange ʉFilipo,
ʉlʉkololwe,
aalongotsaaga ʉmpandʉlʉ gwa Ituleya nʉ gwa Tulakoniti,
namwene ʉLisaniya aale ndongotsi va mpandʉlʉ gwa Abilene.
2 Kange ʉAnasi nʉ Kayafab vaale vateeketsi avavaha.
Ʉnsɨkɨ ʉgwa ɨlimenyu lya Ngʉlʉve lɨkamwitsila ʉYohana ʉmwana va Zakaliya,
kʉ lʉkɨnga ʉkwʉ aataamaga.
3 Pwʉ akava ilʉta imbasu tsyoni itsʉ tsyale pawiipi nʉ lʉgasi lwa Yolodani,
alɨkʉlʉmbɨlɨla ʉkʉta,
avaanu valaatage imbiivi tsa veene nʉ kwotsiwa,
pakʉta ʉNgʉlʉve avasyɨkɨle.
4 Itsi tsʉ tsyene itsʉ tsyavɨgilwe katale mu kɨtabu kya nyamalago ʉYesaya pa kulongwi jya Yohana ʉkʉta,
“Ʉmuunu ikwɨlanga mu lʉkɨnga iita,
‘Munotsaage ɨnzɨla jya Ntwa,
mugolosaage ʉmwakʉlʉta ʉmwene.
5 Isihʉlʉ ni sidugala syoni sive lʉbindi,
ʉpwʉ palɨ sivi paveetsage pagolwike,
ikange mulɨngʼaaniage ʉmudʉndʉvye.
6 Pwʉ avaanu vooni valavʉvona ʉvʉpoki wa Ngʉlʉve.’ ”c
7 Avaanu vongosu valɨkʉlʉta kwa Yohana pakʉta vootsiwe.
Pwʉ ʉmwene alɨkʉvavʉʉla alɨkʉta,
“Ʉnyie nyɨ vaana va nzoka!
Namulaapone ʉvʉhɨgi ʉkʉhʉma kwa Ngʉlʉve mungave mwipela imbiivi kɨvʉnuasi.
8 Lɨno vombagi ʉgwʉ givonia ʉkʉta mupelile imbiivi tsiinyo tsyoni.
Muleke ʉkwɨginia ʉkʉta,
‘Ʉkʉkʉjiitu vɨ Abulahamu!’
Ndikʉvavʉʉla ʉkʉta ʉNgʉlʉve iweesa ʉkʉmpa ʉAbulahamu avaana ʉkʉhʉma mu maganga aga!
9 Lɨno,
ʉvʉhɨgi wa Ngʉlʉve vʉsiike,
ndʉ muunu ʉvɨ ibiite ɨnzuunu,
ɨsaawe ʉkʉdumula amabɨkɨ.
Pwʉ ʉmʼbɨkɨ ʉgwʉ naguhʉʉpa iseke inonu,
gudumulwa nʉ kʉtaagwa mu mwoto.”
10 Pwʉ avaanu valya vakambʉʉtsa vakata,
“Lɨno tʉvombe nyiki?”
11 ɄYohana akavaanda akata,
“Ʉvɨ alɨ nago amagwanda gavɨlɨ anʼgavɨle ʉvɨ alɨ vʉvʉle ɨligwanda,
namwene ʉvɨ alɨ nakyo ɨkyakʉlya ampe ʉntsila kyakʉlya.”
12 Avasangʉtsi va songo ʉwʉ vaalʉtile pakʉta vootsiwe,
naveene vakambʉʉtsa ʉYohana vakata,
“IMmanyisi,
najyʉwe tʉvombe nyiki?”
13 Akavaanda akata,
“Mwɨlekelwe ʉkʉsonza ɨsongo ʉkʉlʉtɨɨlɨla ɨkɨgelelo ɨkyʉ kɨvɨɨkilwe.”
14 Naveene avasikali vakambʉʉtsa vakata,
“Najyʉwe tʉvombe nyiki?”
Akavavʉʉla akata,
“Mwɨlekelwe ʉkʉtoola indalama tsa vaanu kʉ maka,
evo kʉ nzɨla jya vʉsyovi.
Apeene ʉnyie mukwɨlanile nʉ lʉhombo lwa mbombo jiinyo.”
15 Ɨmisɨkɨ ɨgyo avaanu vaahʉʉvɨlaga ʉkwitsa kwa Kɨlɨsiti.
Avo valɨkʉsaaga valɨkʉta ipange ʉYohana vɨ Kɨlɨsiti.
16 Pwʉ ʉYohana akavavʉʉla vooni akata,
“Ʉne ndikʉvootsa na magasi,
apeene ikwitsa ʉnya maka ʉkʉlʉtɨɨlɨla kwane,
ʉvɨ nandɨnogiili nakʉ kʉva mbanda va kʉhʉdʉla ɨmilegehe ɨgya silaatu sya mwene,
d ʉmwene ʉjwa jiikʉvootsaaga ʉnyie nʉ Mepo ʉMbalatse nʉ mwoto.
17 Lɨno ibiite ʉlʉhelo pakʉta apeete ɨngano pa kɨkʉvatɨlo.
Ɨngano jiilʉndamania ivɨɨka mu kɨbaana kya mwene,
ʉmweleelo jiinyianya mu mwoto ʉgwʉ nagwitsima lʉsiku.”
18 Kʉ nzɨla jya mamenyu ago na gange mongosu ʉYohana alɨkʉvavʉnga avaanu,
wʉ ilʉmbɨlɨla ɨLivangɨli.
19 Kʉmbele,
ʉYohana akantanila ʉnkʉlʉdeeva ʉHelode pakʉva aantoolile ʉHelodiya,
ʉvɨ pa vʉtengʉlɨlo aale nʼdala va nnunaave ʉFilipo,
na pa mbiivi nyongosu itsʉ aavombile.
20 Pwʉ ʉHelode akoongeletsa ʉvʉviivi ʉvʉnge pa kʉnʼdɨndɨla ʉYohana mu kɨkʉngwa.
ɄYɨɨsʉ ikwotsiwa
21 ɄYohana wʉ akaanale ʉkʉdɨndɨlwa mu kɨkʉngwa,
ʉnsɨkɨ gʉlya ʉgwʉ aavootsaaga avaanu vongosu,
namwene ʉYɨɨsʉ akootsiwa.
Pwʉ ʉYɨɨsʉ wʉ ikɨsaja,
kʉkyanya kʉkadɨndʉka,
22 ʉMepo ʉMbalatse mu kɨhwani kya ngʉndya akiika pa mwene.
Pwʉ ɨlimenyu lya Ngʉlʉve lɨkapʉlɨkɨka ʉkʉhʉma kʉkyanya lɨkata,
“Ʉve veeve Mwana vango,
vɨ nʼgane,
vɨ vukʉnnyovosa ʉne.”
Ɨkɨvʉmbʉkʉ kya Yɨɨsʉ
23 ɄYɨɨsʉ wʉ itengʉla ɨmbombo jya mwene,
aale nɨ myaka isitsigo sidatu (30) ndee.
Avaanu vaalʉmanyile ʉkʉta ʉYɨɨsʉ aale mwana va Yusufu.
ɄYusufu ʉjʉ aale mwana va Eli,
24 ʉEli aale mwana va Matati,
ʉMatati aale mwana va Lawi,
ʉLawi aale mwana va Meleki,
ʉMeleki aale mwana va Yanai,
ʉYanai aale mwana va Yusufu,
25 ʉYusufu aale mwana va Matatiya,
ʉMatatiya aale mwana va Amosi,
ʉAmosi aale mwana va Nahumu,
ʉNahumu aale mwana va Esili,
ʉEsili aale mwana va Nagai,
26 ʉNagai aale mwana va Maati,
ʉMaati aale mwana va Matatiya,
ʉMatatiya aale mwana va Semei,
ʉSemei aale mwana va Yoseki,
ʉYoseki aale mwana va Yoda,
27 ʉYoda aale mwana va Yoanani,
ʉYoanani aale mwana va Lesa,
ʉLesa aale mwana va Zelubabeli,
ʉZelubabeli aale mwana va Salatieli,
ʉSalatieli aale mwana va Neeli,
28 ʉNeeli aale mwana va Meleki,
ʉMeleki aale mwana va Adi,
ʉAdi aale mwana va Kosamu,
ʉKosamu aale mwana va Elimadamu,
ʉElimadamu aale mwana va Eli,
29 ʉEli aale mwana va Yoshua,
ʉYoshua aale mwana va Eliezeli,
ʉEliezeli aale mwana va Yolimu,
ʉYolimu aale mwana va Matati,
ʉMatati aale mwana va Lawi,
30 ʉLawi aale mwana va Simioni,
ʉSimioni aale mwana va Yuuda,
ʉYuuda aale mwana va Yusufu,
ʉYusufu aale mwana va Yonamu,
ʉYonamu aale mwana va Eliyakimu,
ʉEliyakimu aale mwana va Meleya,
31 ʉMeleya aale mwana va Mena,
ʉMena aale mwana va Matata,
ʉMatata aale mwana va Natani,
ʉNatani aale mwana va Davʉdi,
32 ʉDavʉdi aale mwana va Yese,
ʉYese aale mwana va Obedi,
ʉObedi aale mwana va Boazi,
ʉBoazi aale mwana va Salumoni,
ʉSalumoni aale mwana va Nasoni,
33 ʉNasoni aale mwana va Aminadabu,
ʉAminadabu aale mwana va Adimini,
ʉAdimini aale mwana va Lamu,
e
ʉLamu aale mwana va Hesoloni,
ʉHesoloni aale mwana va Pelesi,
ʉPelesi aale mwana va Yuuda.
34 ɄYuuda aale mwana va Yakobo,
ʉYakobo aale mwana va Isaka,
ʉIsaka aale mwana va Abulahamu,
ʉAbulahamu aale mwana va Tela,
ʉTela aale mwana va Naholi,
35 ʉNaholi aale mwana va Selugi,
ʉSelugi aale mwana va Legau,
ʉLegau aale mwana va Pelegi,
ʉPelegi aale mwana va Hebeli,
ʉHebeli aale mwana va Sala,
36 ʉSala aale mwana va Kenani,
ʉKenani aale mwana va Alufakisadi,
ʉAlufakisadi aale mwana va Shemu,
ʉShemu aale mwana va Nwaka,
ʉNwaka aale mwana va Lameki,
37 ʉLameki aale mwana va Metusela,
ʉMetusela aale mwana va Enoki,
ʉEnoki aale mwana va Yaledi,
ʉYaledi aale mwana va Mahalaleli,
ʉMahalaleli aale mwana va Kenani,
38 ʉKenani aale mwana va Enosi,
ʉEnosi aale mwana va Seti,
ʉSeti aale mwana va Adamu.
Namwene ʉAdamu aale mwana va Ngʉlʉve.