ƗLivangɨli
ndʉwʉ lyavɨgilwe nʉ Mataayo
Ɨkɨkolo kya Yɨɨsʉ Kɨlɨsiti
1
1 Aga gwʉ mataawa ga kɨkolo kya Yɨɨsʉ Kɨlɨsitia ʉvɨ aahʉmile mu lʉjungu lwa Davʉdib ʉlwʉ lʉʉlwa lwahʉmile kwa Abulahamu.c
2 ɄAbulahamu aammolile ʉIsaka,
ʉIsaka aammolile ʉYakobo,
ʉYakobo aammolile ʉYuuda na valʉkololwe.
3 ɄYuuda aammolile ʉPelesi nʉ Zela kwa Tamali.
ɄPelesi aammolile ʉHesoloni,
ʉHesoloni aammolile ʉLamu,
4 ʉLamu aammolile ʉAminadabu,
ʉAminadabu aammolile ʉNasoni,
ʉNasoni aammolile ʉSalumoni,
5 ʉSalumoni aammolile ʉBoazi kwa Lahabu,
ʉBoazi aammolile ʉObedi kwa Luti,
ʉObedi aammolile ʉYese,
6 nʉ Yese aammolile ʉnkʉlʉdeeva ʉDavʉdi.
ɄDavʉdi aammolile ʉSolomoni kʉ nʼdala ʉvɨ aale mwehe va Uliya,d
7 ʉSolomoni aammolile ʉLehoboamu,
ʉLehoboamu aammolile ʉAbiya,
ʉAbiya aammolile ʉAsa,
8 ʉAsa aammolile ʉYehoshafati,
ʉYehoshafati aammolile ʉYolamu,
ʉYolamu aammolile ʉUziya,
9 ʉUziya aammolile ʉYotamu,
ʉYotamu aammolile ʉAhazi,
ʉAhazi aammolile ʉHezekiya,
10 ʉHezekiya aammolile ʉManasi,
ʉManasi aammolile ʉAmoni,
nʉ Amoni aammolile ʉYosiya.
11 ɄYosiya aammolile ʉYekoniya na valʉkololwe pa nsɨkɨ ʉpwʉ avaanu va kʉ Babeli vaaviibiite aVaisilahɨli nʉ kʉhɨlɨka kʉ kɨlʉnga kya veene.
12 Ikange,
wʉ vahegile navo ʉkʉ,
ʉYekoniya aammolile ʉSalatieli,
ʉSalatieli aammolile ʉZelubabeli,
13 ʉZelubabeli aammolile ʉAbihudi,
ʉAbihudi aammolile ʉEliyakimu,
ʉEliyakimu aammolile ʉAzoli,
14 ʉAzoli aammolile ʉSadoki,
ʉSadoki aammolile ʉAkimu,
ʉAkimu aammolile ʉEliudi,
15 ʉEliudi aammolile ʉEliyazali,
ʉEliyazali aammolile ʉMatani,
nʉ Matani aammolile ʉYakobo.
16 ɄYakobo aammolile ʉYusufu ʉnʼgoosi va Maliyamu.
ɄMaliyamu vɨ mwene aammolile ʉYɨɨsʉ ʉvɨ ɨlitaawa lya mwene vɨ Kɨlɨsiti.
17 Pwʉ ʉkʉhʉma kwa Abulahamu ʉkʉsika kwa Davʉdi vaalekwo avanyienya va Yɨɨsʉ kɨtsigo na vanni (14),
nʉ kʉhʉma kwa Davʉdi ʉkʉsika pa nsɨkɨ ʉpwʉ avaanu va Babeli vaavahaamiitse aVaisilahɨli mu kɨlʉnga kya veene,
vaalepwo avanyienya va Yɨɨsʉ kɨtsigo na vanni.
Ikange,
ʉkʉhʉma vahaamitswe ʉkʉsika ʉkʉholwa kwa Kɨlɨsiti,
vaalepwo avanyienya va Yɨɨsʉ kɨtsigo na vanni.
Ʉkʉholwa kwa Yɨɨsʉ Kɨlɨsiti
18 Ʉkʉholwa kwa Yɨɨsʉ Kɨlɨsiti kwale ndee,
wʉ ʉvanyina ʉvɨ ɨlitaawa lya mwene vɨ Maliyamu alɨ mu ndagani tsa kʉtoolana nʉ Yusufu,
aavoniike ʉkʉta alɨ nʉ vʉtsito ʉwʉ waamwitsye kʉ nzɨla jya Mepo ʉMbalatse.
19 Lɨno ʉlwakʉva ʉYusufu,
ʉnʼgoosi va mwene aavombaga itsa vʉgolosu pamiiho ga Ngʉlʉve,
naanogwe ʉkʉta ankotse isoni ʉMaliyamu.
Pwʉ akasaaga ʉkʉta andeke kɨtsila kʉvavʉʉla avaanu avange.e
20 Mu nsɨkɨ wʉ isaaga ago,
ʉnsuungʼwa va Ntwa akamwitsila mu magonasivi,
akambʉʉla akata,
“Gwe Yusufu,
vɨ ʉhʉmile mu kɨkolo kya nkʉlʉdeeva ʉDavʉdi,
ʉleke ʉkʉdwada ʉkʉntoola ʉMaliyamu ʉlwakʉva ʉvʉtsito ʉwʉ alɨ nawo vʉmwitsye kʉ maka ga Mepo ʉMbalatse.
21 Jiihola ʉmwana ʉnʼdɨɨmi,
nʉʉve jʉvukʉmpa ɨlitaawa ɨlɨ Yɨɨsʉ,
f ʉlwakʉva jiikʉvapoka avaanu va mwene mu mbiivi tsa veene.”
22 Tsyoni itso tsyavombiike ewo pakʉta ɨlimenyu lɨlya lɨve lɨvombiike ɨlyʉ ʉNtwa aatsovile kʉ nzɨla jya nyamalago va mwene ʉkʉta,
23 “Lola!
Ʉmmɨnza ʉvɨ nammanyili ʉnʼgoosi,
jiiva nʉ vʉtsito.
Ikange jiihola ʉmwana ʉnʼdɨɨmi!
Jiikʉmpa ʉmwana ʉjwa ɨlitaawa ɨlɨ Imanueli.”
g Ʉvʉlʉvʉlʉ wa litaawa ɨlyo kwʉ kʉta,
“ɄNgʉlʉve alɨ paninie nʉʉwe.”