Ʉkʉholwa kwa Yɨɨsʉ Kɨlɨsiti
2
1 Ʉnsɨkɨ gʉlya ʉgwʉ aaholilwe ʉYohana,
ʉKaisalia Agusito ʉva lʉdeeva lwa Kɨloomab aahʉmiitse ʉlʉlagɨlo ʉkʉta,
avaanu vooni va mu silʉnga isyale mu vʉlongotsi wa mwene,
vavalwe.
2 Ʉkʉvalwa ʉkwa kwale kwʉ kʉtatsi,
ʉkwʉ kwavombiike wʉ ʉKileniyoc ilongotsa ʉmpandʉlʉ gwa Siliya.
3 Pwʉ avaanu vooni vakalʉta kuvalwa,
ʉmuunu ʉvaveetsaga alɨkʉlʉta kʉ litsumbe ʉkwʉ kyahʉmile ɨkɨkolo kya mwene.
4 Pwʉ namwene ʉYusufu akahega pa litsumbe lya Nazaleti ɨlyʉ lyale ʉkʉ kʉ mpandʉlʉ gwa Galilaya,
akalʉta kuvalwa kʉ vʉtsenge wa Betelehemu wa Yuuda,
ʉkwʉ aaholeliilwe ʉnkʉlʉdeeva ʉDavʉdi,
ʉlwakʉva ʉYusufu aale va kɨkolo kya Davʉdi.
5 Ʉkʉ aalʉtile paninie nʉ Maliyamu ʉvɨ aale mu ndagani tsa kʉtoolana nave.
Ʉnsɨkɨ ʉgwa ʉMaliyamu aale nʉ vʉtsito.
6 Wʉ valɨ ʉkwa,
ʉMaliyamu gʉkasika ʉnsɨkɨ gwa mwene gwa kʉhola ʉmwana.
7 Akahola ʉmwana ʉmbele ʉnʼdɨɨmi,
akanswalɨtsa ɨmisabwa gya kɨsyele.
Kange akanʼgonia mu litɨɨtsi lya kʉlɨɨla isenga,
ʉlwakʉva napaalepwo apakʉgona aveene,
inyumba tsa vahenza tsyadɨgile avaanu.
Avadɨɨmi va ngʼolo vikwʉpɨlɨla ɨkulongwi jya kʉholwa ʉYɨɨsʉ
8 Ɨkɨlo jɨlya kwalepwo avadɨɨmi va ngʼolo ʉwʉ vaataamaga kʉ lʉdaasi,
pawiipi na kʉ Betelehemu,
vaaloleelaga ingʼolo tsa veene.
9 Baaho ʉnsuungʼwa va Ntwa ʉNgʉlʉve akaviitsila,
nɨ lilangamuli ʉkʉhʉma kʉ Ntwa ʉNgʉlʉve lɨkavamulikila imbasu tsyoni.
Vakatengʉla ʉkʉdwada siitso.
10 Pwʉ ʉnsuungʼwa akavavʉʉla akata,
“Muladwadaga!
Ndolage,
ndɨvagegye ɨkulongwi ɨnonu ɨjyʉ jikʉvapeetsaga avaanu vooni ʉlʉhekelo ʉlʉlʉti.
11 Ɨkulongwi ɨnonu jyʉ ɨjɨ:
Ɨleelo ʉMpoki aholilwe mu vʉtsenge wa Davʉdi pa vʉsumbe wa kʉvapoka ʉnyie,
ʉjwa vɨ Kɨlɨsiti,
ʉNtwa.
12 Ɨkɨmanyilo kwanyie ɨkya kʉmmanya kyʉ ɨkɨ:
Mutsikʉmbona ʉmwana ʉnnyehe,
vanswaliitse ɨmisabwa gya kɨsyele,
agonile mu litɨɨtsi lya kʉlɨɨla isenga.”
13 Baaho ʉnsuungʼwa ʉlya aale nɨ kɨpʉga ɨkɨvaha kya vasuungʼwa va kʉkyanya,
vakava vikʉnʼginia ʉNgʉlʉve viita,
14 “Aginiwaagwe ʉNgʉlʉve ʉNdʉti va syoni,
nʉ lʉnotsehetso lʉveetsage mu kɨlʉnga,
kʉ vaanu ʉwʉ avɨɨdɨhiitse avape ʉlʉhʉngʉ.”
15 Avasuungʼwa wʉ vahegile ʉkʉbɨha kʉkyanya,
avadɨɨmi va ngʼolo valya vakɨtsosanza vakata,
“Lɨno tʉhege tʉlʉtage kʉ Betelehemu,
tʉkalole ɨlyʉ lɨvombiike,
ɨlyʉ ʉNtwa ʉNgʉlʉve atʉvʉʉlile.”
16 Pwʉ vakalʉta ngʼaningʼaani kʉ Betelehemu.
Wʉ vasiike,
vakavavona ʉMaliyamu nʉ Yusufu,
nʉ mwana ʉnnyehe agonile mu litɨɨtsi lya kʉlɨɨla isenga.
17 Wʉ vambwene ʉmwana ʉlya,
vakavapangɨla avaanu itsʉ ʉnsuungʼwa akavavʉʉlile pa kulongwi jya mwana ʉjwa.
18 Pwʉ vooni ʉwʉ vaapʉliike ɨkulongwi ɨjyʉ vaapangile avadɨɨmi va ngʼolo valya,
vakadega.
19 Ago gooni,
ʉMaliyamu akagavɨɨka mu numbula jya mwene,
akagendelela ʉkʉgasaagɨlɨla.
20 Kʉmbele,
avadɨɨmi va ngʼolo valya vakakilivuka kʉnʉ vikʉmwɨmɨka nʉ kʉnʼginia ʉNgʉlʉve kʉ tsyoni itsʉ ʉnsuungʼwa aavavʉʉlile,
pakʉva vaapʉliike nʉ kʉtsivona ndʉwʉ vaavʉʉlilwe.
Ʉmwana ipeewa ɨlitaawa
21 Wʉ kɨsiike ɨkɨgono ɨkya nnaana (8) ʉkʉhʉma ʉmwana aholwagwe,
vakavomba ʉlwiho lwa kʉtahili,
ʉkʉkongana ni ndagɨlo tsa Ngʉlʉve kʉ Vayahudi.
Vakampa ɨlitaawa ɨlɨ Yɨɨsʉ.
Ɨlitaawa ɨlɨ aapeevilwe nʉ nsuungʼwa,
wʉ ʉvanyina akaanale ʉkʉva nʉ vʉtsito.
ɄYɨɨsʉ igotolwa kʉ Ntwa ʉNgʉlʉve
22 Wʉ gʉsilile ʉnsɨkɨ gwa kʉvalatsiwad ʉYusufu nʉ Maliyamu,
ndʉwʉ ʉNgʉlʉve aalagye mu ndagɨlo tsa Moose,
vakalʉta nʉ mwana kʉ Yelusalemu kukʉnʼgotola kʉ Ntwa ʉNgʉlʉve.
23 (Ʉlʉlagɨlo lwa Ntwa ʉNgʉlʉve lwita,
“Ʉmwana ʉnʼdɨɨmi ʉmbele ʉvaveetsaga,
agotolwe ave imbalatse va Ntwa ʉNgʉlʉve.”)e
24 Ikange vaalʉtile kuhʉmya ɨneekelo kʉ vʉsumbe wa kʉvalatswa,
ndʉwʉ lwale ʉlʉlagɨlo lwa Ntwa ʉNgʉlʉve ʉkʉta,
vahʉmye isipʉngʉjɨla sivɨlɨ evo isyana sivɨlɨ isya ngʉndya.f
25 Ɨmisɨkɨ ɨgyo ʉkʉ kʉ Yelusalemu,
aalekwo ʉmuunu mpamato ʉvɨ aatambʉlwagwa Simioni.
Ʉmuunu ʉjwa aale inʼgolosu,
aamwɨdɨkaga ʉNgʉlʉve isigono syoni.
Aahʉʉvɨlaga ʉkwitsa kwa Kɨlɨsiti,
ʉvɨ alavatseesa aVaisilahɨli.
Kange aalongotsiwaagwa nʉ Mepo ʉMbalatse.
26 ɄMepo ʉMbalatse aatalile akambʉʉla ʉkʉta nalaaswe ʉkʉsika ʉpwʉ ikʉmbona ʉKɨlɨsiti va Ntwa ʉNgʉlʉve.
27 Apo,
ʉMepo ʉMbalatse akandongolela ʉSimioni ʉkʉbɨha kʉ tembile.
g Namwene ʉYusufu nʉ Maliyamu vakammɨlɨka ʉYɨɨsʉ kʉ tembile,
kuhʉmya ɨneekelo nʉ kʉnʼgotola kʉ Ntwa ʉNgʉlʉve,
ndʉwʉ jyatsovilwe mu ndagɨlo.
28 ɄSimioni akantoola ʉmwana ʉlya,
akampagata,
akanʼginia ʉNgʉlʉve akata,
29 “Lɨno gwe Ntwa Ngʉlʉve,
ɨlyane lɨsilile,
ʉnnavʉle ʉne ndɨ mbanda vaako ndɨlʉtage nʉ lʉnotsehetso,
pakʉva ʉvombile ʉgwʉ waatsovile.
30 Amiiho gaane gambwene ʉMpoki,
31 ʉvɨ ʉmmalile ave Mpoki va sivʉmbʉkʉ syoni.
32 Ʉjʉ jiiva lʉmuli lwa kʉmbonia ʉNgʉlʉve kʉ vaanu avatava Vayahudi,
ikange jiikʉvagegela ʉwɨɨmɨkiwa avaanu vaako aVaisilahɨli.”
33 Ʉdadaaje nʉ vanyina va mwene ʉYɨɨsʉ vakava videga ʉgwʉ ʉSimioni aatsovaga pa kulongwi jya mwana va veene.
34 Kʉmbele,
ʉSimioni akavasaja.
Pwʉ akambʉʉla ʉMaliyamu akata,
“Ʉmwana ʉjʉ avɨɨkilwe nʉ Ngʉlʉve kʉ nongwa jya vaanu vongosu mu kɨlʉnga kya Isilahɨli,
pakʉta,
ʉwʉ jʉvikʉmʼbeela jʉviiva vajagile,
apeene ʉwʉ jʉvikʉmwɨdɨka avo jʉvipokwa.
Jiivʉngaga vongosu napeene aveene jʉvibeelaga,
35 apo agalɨ mu nʼgati mu numbula tsa veene jʉgiiva pavʉvalasu.
Najyʉve,
ʉkʉbeelwa kwa mwene kukʉkʉpelelaga ʉkʉva nʉ lʉvavo ʉlʉlʉti ʉta ʉhomilwe ʉmmaage.”
36 Ikange aalepwo ʉnyamalago ʉnʼdala ʉvɨ aale nʼgogolo,
ʉvaatambʉlwagwa Ana.
Ʉjʉ aale mwalɨve va Fanueli ʉkʉhʉma mu kɨvʉmbʉkʉ kya Asheli.
Wʉ vataamile ɨmyaka lekelakʉpamato (7) ʉkʉhʉma vitoolana,
ʉnʼgoosi va mwene akaswa.
37 Akatsiga inswɨle ʉkʉsika wʉ gisila ɨmyaka isitsigo innaana na gɨnni (84).
Ʉnsɨkɨ gwoni ʉgwa aaveetsaga kʉ tembile.
Aataamaga ikɨsaja nʉ kwɨdɨnda ʉkʉlya kʉ nongwa jya kʉnʼdoova ʉNgʉlʉve pakɨlo na pamuunyi.
38 Ʉnsɨkɨ gʉʉgwa ʉSimioni wʉ itsova nʉ Yusufu nʉ Maliyamu,
ʉnyamalago ʉjwa akalʉta pa veene.
Pwʉ akatengʉla ʉkʉnsaana ʉNgʉlʉve nʉ kʉvavʉʉla avaanu vooni avaapʉlɨkɨlaga ʉkwitsa kwa Kɨlɨsiti,
ɨkulongwi jya mwana ʉjwa ʉvɨ jiikʉvavopola aVaisilahɨli.h
39 ɄYusufu nʉ Maliyamu wʉ vamalile ʉkʉvomba itsyalagɨliilwe tsyoni ndʉwʉ tsyale mu ndagɨlo tsa Ntwa ʉNgʉlʉve,
vakakilivuka mu litsumbe lya veene ɨlya Nazaleti ɨlyʉ lyale kʉ Galilaya.
40 Ʉkwa ʉmwana ʉlya akakʉla,
akoongelela amaka nʉ lʉhala,
ʉlʉhʉngʉ lwa Ngʉlʉve lʉkava nʉ mwene.
ɄYɨɨsʉ kʉ tembile
41 Ɨmyaka gyoni avahotsi va mwene ʉYɨɨsʉ vaalʉtaga kʉ Yelusalemu ʉnsɨkɨ gwa kyaka kya Pasaka.i
42 ɄYɨɨsʉ wʉ alɨ nɨ myaka kɨtsigo na gɨvɨlɨ (12),
aalʉtile na vahotsi va mwene ʉkʉ kʉ Yelusalemu kʉ kyaka kya Pasaka,
ndʉwʉ lwale lwiho lwa veene.
43 Isigono sya kyaka kya Pasaka wʉ sisilile,
avahotsi va mwene vakahega ʉkʉvuja kʉ nyumba kɨtsila kʉlʉmanya ʉkʉta,
ʉmwana ʉYɨɨsʉ asigye ʉkʉ kʉ Yelusalemu.
44 Wʉ vivuja kʉ nyumba,
vaalʉmanyile ʉkʉta,
valɨ paninie nʉ Yɨɨsʉ mu kɨpʉga,
vakagenda ʉlʉgendo lwa kɨgono kɨpamato.
Kʉmbele,
vakatengʉla ʉkʉndonda mu nʼgati mu vankɨkolo na vamanyaani,
45 navaambone.
Pwʉ vakakilivuka ʉkʉ kʉ Yelusalemu kʉnʉ vikʉndonda.
46 Wʉ silʉtɨngʼiinie isigono sidatu,
vakambona kʉ tembile,
ataamile na vamanyisi va ndagɨlo,
ikʉvapʉlɨhɨtsa nʉ kʉvavʉʉtsa.
47 Vooni ʉwʉ vaampʉlɨhɨtsaaga,
vaadegaga siitso ʉvʉmanyi wa mwene ni nyandɨle tsa mwene.
48 Avahotsi va mwene wʉ vambwene,
vakadega siitso.
Pwʉ ʉvanyina akambʉʉla akata,
“Mwana vango,
kɨki ʉtʉvombye ewo?
Lola!
Ʉne nʉ dadaajo tʉhangajiike siitso ʉkʉkʉlonda.”
49 ɄYɨɨsʉ akavaanda akata,
“Kɨki mulɨkʉndonda?
Namulʉmanyili ʉkʉta wɨgane wa Ngʉlʉve ʉne ndɨve mu nyumba jya Daada?”
50 Napeene,
ʉgwʉ aavavʉʉlile avahotsi va mwene navaagamanye.