Luuka 4

ɄYɨɨsʉ igelwa nʉ Setano

(Mataayo 4:1-11; Maliko 1:12-13)

1 ɄYɨɨsʉ akahega pa lʉgasi lwa Yolodani alɨkʉlongotsiwa nʉ Mepo ʉMbalatse. ɄMepo ʉMbalatse akammɨlɨka kʉ lʉkɨnga, 2 ʉkwʉ mu sigono isitsigo sinni (40), ʉYɨɨsʉ alɨkʉgelwa nʉ ntavangwa ʉSetano. Mu sigono isyo syoni naalitsage ɨkɨveetsaga. Pwʉ kʉ vʉsililo, jɨkamwibata ɨnzala.

3 Pwʉ ʉSetano akambʉʉla ʉYɨɨsʉ akata, “Ʉngave ʉve ʉlɨ Mwana va Ngʉlʉve, lɨvʉʉle ɨliganga ɨlɨ lɨhambʉke lɨve nkate.” 4 ɄYɨɨsʉ akamwanda akata, “Mu Vʉvɨge ʉVʉvalatse jɨvɨgilwe ndee, ‘Ʉmuunu niiva nʼgʉge mu kyakʉlya kyene.’”

5 Pwʉ ʉSetano akantotsa ʉYɨɨsʉ apoonu apalɨ kʉkyanya siitso, akambonia indeeva tsa silʉnga syoni kʉ kasɨkɨ kapamato. 6-7 Akata, “Ʉne ndikʉkʉpa ʉvʉtavʉlɨlwa wa ndeeva itsi tsyoni nʉ wɨɨmɨkiwa wa tsyene, ʉngave vusugama nʉ kwɨsaja kwane, ʉlwakʉva isi syoni syango, ikange ʉne ndikʉmpa ʉmuunu ʉvaveetsaga pa vʉnogwe wango.” 8 Ʉmwene ʉYɨɨsʉ akamwanda akata, “Mu Vʉvɨge ʉVʉvalatse jɨvɨgilwe ndee, ‘Wɨsajage kʉ Ntwa ʉNgʉlʉve vaako, ikange ʉmbombelage jyʉjwa mwene.’”

9 ɄSetano akalʉta nave ʉYɨɨsʉ kʉ vʉtsenge ʉvʉvalatse ʉwa Yelusalemu, akatsikwɨma nave pa nnaala gwa tembile, akambʉʉla akata, “Ɨngave ʉlɨ Mwana va Ngʉlʉve, ɨtaage paasi, 10 ʉlwakʉva jɨvɨgilwe ʉkʉta,

‘ɄNgʉlʉve jiikʉkʉsuungʼila avasuungʼwa va mwene,

vakʉloleele.’

11 “Nɨ lya kʉta,

‘Vakʉtape,

sigela isilʉnde syako sikʉvala mu maganga.’ ”

12 ɄYɨɨsʉ akamwanda akata, “Mu Vʉvɨge ʉVʉvalatse jɨvɨgilwe ndee, ‘Kwʉ baako ʉkʉnʼgela ʉNtwa ʉNgʉlʉve vaako.’” 13 ɄSetano wʉ amalile ʉkʉnʼgela ʉYɨɨsʉ kʉ nzɨla tsyoni itso, akandeka kʉ nsɨkɨ.

ɄYɨɨsʉ ibeelwa kʉ Nazaleti

(Mataayo 4:12-17; 13:53-58; Maliko 1:14-15; 6:1-6)

14-15 Pwʉ ʉYɨɨsʉ akavuja ʉkʉ kʉ Galilaya alɨ na maka ga Mepo ʉMbalatse. Alɨkʉvamanyiisa avaanu mu masinagogi ga veene, na vaanu vooni ʉwʉ vaampʉliike valɨkʉnʼginia. Ikulongwi tsa mwene tsikavaala mu kɨlʉnga kɨlya kyoni.

16 Kʉmbele, ʉYɨɨsʉ akasika kʉ Nazaleti, ɨlitsumbe ɨlyʉ aakʉlye. Ɨkɨgono kya Sabato akiingila mu lisinagogi ndʉwʉ lwale lwiho lwa mwene. Akɨɨma pa vʉsumbe wa kwɨmba ʉVʉvɨge ʉVʉvalatse.

17 Akapeewa ɨkɨtabu kya nyamalago ʉYesaya, akadɨndʉla pa vʉvɨge ʉwiita,

18 “ɄMepo va Ntwa ʉNgʉlʉve alɨ nʉʉne,

ʉlwakʉva ʉNgʉlʉve annyalile ʉne ndɨvalʉmbɨlɨlage avagatsu ɨLivangɨli.

Ansuungʼile kukʉvavʉʉla ʉwʉ valɨ mu kɨkʉngwa,

ɨkulongwi jya kʉvopolwa kwa veene,

naveene avabosu ɨkulongwi jya kʉlola ikange.

Ansuungʼile kukʉvapoka ʉwʉ vabanyilitsiiwe,

19 na kukʉvalʉmbɨlɨla avaanu ʉkʉta,

ʉnsɨkɨ gʉsiike ʉgwʉ ʉNtwa ʉNgʉlʉve ikʉvasaja avaanu va mwene.”

20 Wʉ ɨmbile, akadɨnda ɨkɨtabu kɨlya, akankilivulila ʉmbombi va lisinagogi, akataama, akatengʉle ʉkʉmanyiisa. Avaanu vooni ʉwʉ vaalemwo mu nyumba jɨlya valɨkʉndola. 21 Pwʉ akavavʉʉla akata, “ɄVʉvɨge ʉVʉvalatse ʉvʉ ʉwʉ mupʉliike wʉ ndikwɨmba, ɨleelo vʉvombiike.” 22 Vooni vakanʼginia siitso, vakadega amamenyu amanonu ʉgwʉ aatsovile, vakata, “Ʉjʉ navɨ mwene ʉmwana va Yusufu?”

23 Pwʉ namwene akavavʉʉla akata, “Ndɨlʉmanyile, mulotsa kwitsova ɨkɨtsovo ɨkɨ, ‘Ʉve vɨ nʼganga, ɨponie jyʉve! Imbombo itsʉ tʉpʉliike ʉvombile mu litsumbe lya Kapelenaumu, lɨno ʉvombe na baaha apa pa litsumbe lyako jyʉve.’ ” 24 Akoongeletsa ʉkʉvavʉʉla akata, “Tsa jɨlweli ndikʉvavʉʉla ʉkʉta, nakʉli ʉnyamalago ʉvɨ ikwɨdɨkiwa na vaanu va kʉ myave. 25 Isigono sya nyamalago ʉEliya, ɨsula najyatime ɨmyaka gɨdatu nɨ myetsi ntanato (6), ɨnzala ɨmbaha siitso jɨkahʉmɨla mu kɨlʉnga kyoni kya Isilahɨli. Tsa jɨlweli ndikʉvavʉʉla, ʉnsɨkɨ ʉgwa kwalepwo avadala avaswɨle vongosu mu kɨlʉnga ɨkɨ. 26 Napeene, ʉEliya naasuungʼwe kʉ mpamato pagati pa vadala avaswɨle valya va mu kɨlʉnga kya Isilahɨli, apeene aasuungʼilwe kʉ nʼdala ʉnswɨle va mu kɨlʉnga kya Sidoni mu litsumbe lya Saleputa. 27 Ikange isigono sya nyamalago ʉElisha mu kɨlʉnga kya Isilahɨli, kwalepwo avaanu vongosu avanya bʉʉba. Napeene, naalepwo nʉ mpamato ʉvɨ aavalatsiiwe, apeene mwene ʉNahamani ʉvaahʉmile mu kɨlʉnga kya Siliya.”

28 Pwʉ avaanu vooni ʉwʉ vaale mu lisinagogi, wʉ vapʉliike amamenyu ago, vakaviipa siitso. 29 Baaho vakɨɨma, vakammʉmya ʉYɨɨsʉ mu litsumbe lya veene ɨlyʉ lyale pakyanya pa kɨdugala. Vakammɨlɨka pa lʉgenge, vakanogwa ʉkʉnkulugitsa mu lʉgenge. 30 Napeene, ʉmwene akagalamuka, akagenda pagatinagati pa veene, akalʉta.

ɄYɨɨsʉ iswɨma imepo imbiivi kʉ Kapelenaumu

(Maliko 1:21-28)

31 Kʉmbele, ʉYɨɨsʉ akalʉta kʉ vʉtsenge wa Kapelenaumu, ʉwʉ waale mu mpandʉlʉ gwa Galilaya. Ɨkɨgono kya Sabato, akiingila mu lisinagogi, akatengʉla ʉkʉmanyiisa avaanu. 32 Avaanu vakadega siitso kʉ manyiiso tsa mwene, ʉlwakʉva tsyale manyiiso inya vʉtavʉlɨlwa. 33 Ikange mu lisinagogi ɨlyo, aalemwo ʉmuunu ʉnya mepo imbiivi. Ʉmuunu ʉjwa akooveela siitso, 34 akata, “Ʉve Yɨɨsʉ va kʉ Nazaleti, ʉsumbilwe kɨki kwawe? Witsile kukʉtwongometsa? Tʉkʉmanyile ʉkʉta ʉve ʉlɨ Mbalatse va Ngʉlʉve!” 35 ɄYɨɨsʉ akatsitanila akata, “Nuunali! Hʉmi mu muunu ʉjʉ!” Pwʉ imepo imbiivi tsilya tsikanʼgwisa pagatinagati pa veene, tsikahʉma kɨtsila kʉndematsa. 36 Avaanu vooni vakadega siitso, vakɨtsosanza vaveene vakata, “Itsi tsa kʉdega siitso! Ʉmuunu ʉjʉ iswɨma imepo imbiivi kʉ maka nʉ vʉtavʉlɨlwa, natsyene tsihʉma!” 37 Ikulongwi tsa Yɨɨsʉ tsikavaala mu kɨlʉnga kɨlya kyoni.

ɄYɨɨsʉ iponia avatamu

(Mataayo 8:14-17; Maliko 1:29-39)

38 ɄYɨɨsʉ akahʉma mu lisinagogi lɨlya, akalʉta mu nyumba jya Simoni. Wʉ asiike, akambona ʉvanyina va nʼdala va Simoni ibiitwe siitso nɨ mʉngʉ, vakanʼdoova ʉYɨɨsʉ amponie. 39 Pwʉ akɨɨma pawiipi nʉ ntamu, akajɨtanila ɨmʉngʉ jɨlya, baaho ʉntamu akapona, akɨɨma nʉ kʉtengʉla ʉkʉvavombela.

40 Ɨlitsʉva wʉ liseema, avaanu vooni ʉwʉ vaale na vatamu avanya sitamu isi niisi, valɨkʉmmɨlɨkɨla ʉYɨɨsʉ avatamu va veene. Ʉmwene alɨkʉvaabaasa vooni, alɨkʉvaponia. 41 Ikange alɨkʉswɨma imepo imbiivi. Pwʉ itsyene tsilɨkʉhʉma mu vaanu vongosu, kʉnʉ tsikwoveela tsiita, “Ʉve ʉlɨ Mwana va Ngʉlʉve!” Tsilɨkʉtsova ewo ʉlwakʉva tsyammanyile ʉkʉta vɨ Kɨlɨsiti. Napeene, ʉYɨɨsʉ alɨkʉtsitanila nʉ kʉtsibeetsa tsileke ʉkʉtsova limenyu.

42 Ɨkɨgono ɨkya vɨɨlɨ wʉ kʉkie, ʉYɨɨsʉ akahʉma mu vʉtsenge vʉlya, akalʉta apoonu apatsila vaanu. Ɨkɨpʉga ɨkɨvaha kya vaanu kɨkatengʉla ʉkʉndonda, kʉmbele vakatsisika ʉpwʉ aale. Wʉ vambwene, vakagela ʉkʉnsiga ʉkʉta aleke ʉkʉhega kʉ veene. 43 Ʉmwene akavavʉʉla akata, “Wɨgane wa Ngʉlʉve ʉkʉta ndɨvalʉmbɨlɨlage avaanu ɨLivangɨli lya Lʉdeeva lwa Ngʉlʉve mu vʉtsenge ʉvʉ nʉʉvʉ, ʉlwakʉva ɨjyo jyʉ mbombo ɨjyʉ ndyasuungʼilwe kuvomba.” 44 Pwʉ ʉYɨɨsʉ akalʉta mu vʉtsenge wongosu wa kʉ Galilaya, alɨkʉlʉmbɨlɨla mu masinagogi ga veene.