Maliko 2

ɄYɨɨsʉ alɨ na maka ga kʉsyɨkɨla imbiivi

(Mataayo 9:1-8; Luuka 5:17-26)

1 Wʉ silʉtile isigono sidebe, ʉYɨɨsʉ akakilivuka kʉ Kapelenaumu. Avaanu vakapʉlɨka ɨkulongwi ʉkʉta asiike alɨ mu nyumba. 2 Pwʉ vakalʉndamana avaanu vongosu siitso vakadɨga mu nyumba nakʉ kʉnzi kʉ ndyango. ɄYɨɨsʉ alɨkʉvalʉmbɨlɨla ɨlimenyu lya Ngʉlʉve. 3 Vakiitsa avaanu avaale nʉ muunu ʉvɨ aasugujwike ʉmmana, apɨmbilwe na vaanu vanni. 4 Wʉ vasiike palya, vakalemwa apakʉlʉta vakammegeletse ʉntamu pavʉlongolo pa Yɨɨsʉ pakʉva avaanu vaadɨgile siitso. Lola, vakatoga kʉ kɨtʉʉvɨlɨ, vakahotola ɨndwelo ʉpwʉ aale ʉYɨɨsʉ, vakamwisa ʉmuunu ʉlya mu liteesu. 5 Namwene ʉYɨɨsʉ wʉ aweene valɨ nʉ lwɨdɨko kʉ mwene, akambʉʉla ʉvɨ asugujwike ʉmmana, akata, “Mwana vango, ʉsyɨkɨliiwe imbiivi tsyako.”

6 Baahalya vaalepwo avamanyisi vaninie va ndagɨlo vaataamile, valɨkʉsaaga mu numbula tsa veene ʉkʉta, 7 “Kɨki ʉjʉ itsova ewo? Lola, ʉmuunu ʉjʉ ikʉnkinila ʉNgʉlʉve! Nalʉmanyili ʉkʉta ʉNgʉlʉve mwene vɨ isyɨkɨla imbiivi?” 8 ɄYɨɨsʉ akagamanya amasaago ga veene, akavavʉʉtsa akata, “Kɨki mulɨ na masaago ago mu numbula tsiinyo? 9 Lyebeepe lɨlɨku ʉkʉmbʉʉla ʉvasugujwike ʉmmana ʉkʉta, ‘Ʉsyɨkɨliiwe imbiivi tsyako,’ nʉ kʉta, ‘Hega, wɨtwɨke ɨliteesu lyako, ʉgendage’? 10 Ndinogwa mulʉmanye ʉkʉta ʉMwana va Muunu alɨ nʉ vʉtavʉlɨlwa pa kɨlʉnga wa kʉsyɨkɨla imbiivi.” Vʉvʉle vʉle akambʉʉla ʉvɨ asugujwike ʉmmana akata, 11 “Ndikʉkʉvʉʉla wɨɨme, toola ɨliteesu lyako, ʉvujage kʉ nyumba!” 12 Ʉmuunu ʉlya akɨɨma, akapɨmba ɨliteesu lya mwene, akagenda, akahega pavʉlongolo pa veene. Avaanu vooni vakadega siitso nʉ kʉnʼginia ʉNgʉlʉve valɨkʉta, “Natʉgelili ʉkʉsivona isidego ndiisi lʉsiku!”

ɄYɨɨsʉ itsile kukʉvɨɨlanga avatulanongwa

(Mataayo 9:9-13; Luuka 5:27-32)

13 Ikange ʉYɨɨsʉ akalʉta mu lʉkanzi lwa nyanza ɨjya Galilaya. Ɨkɨpʉga ɨkɨvaha kya vaanu kɨlɨkʉnkonga, namwene alɨkʉvamanyiisa.

14 Pambele wʉ igenda akambona ʉLawi, ʉmwana va Alufayo, ataamile apoonu ʉpwʉ aasonzaaga ɨsongo. ɄYɨɨsʉ akambʉʉla akata, “Tʉvʉʉke ʉngʼongage.” ɄLawi akahega, alɨkʉnkonga ʉYɨɨsʉ.

15 Kʉmbele aataamile pa kʉlya ɨkyakʉlya mu nyumba jya Lawi. Naveene avasangʉtsi va songo vongosu na vatulanongwa avange, vaataamile, valɨkʉlya paninie nʉ Yɨɨsʉ na vakongi va mwene, pakʉva avaanu avalɨ ndaava wʉ vongosu avaankongile. 16 Avamanyisi va ndagɨlo na Vafalisayo, wʉ vambwene ʉYɨɨsʉ iilya paninie navo, vakavavʉʉtsa avakongi va mwene vakata, “Kɨki iilya paninie na vasangʉtsi va songo na vatulanongwa?” 17 ɄYɨɨsʉ wʉ apʉliike, akavavʉʉla akata, “Avatava vatamu navilonda ʉnʼganga, veene avatamu wʉ veene vilonda ʉnʼganga. Nanditsili kukʉvɨɨlanga avikɨvona vagolosu, ndɨviitsye avatulanongwa.”

Ʉkwitsa kwa Yɨɨsʉ wʉ vʉtengʉlɨlo wa kulongwi ɨɨmya

(Mataayo 9:14-17; Luuka 5:33-39)

18 Ʉnsɨkɨ avakongi va Yohana ʉMwotsi na va Vafalisayo vikɨdɨnda ʉkʉlya, avaanu vakiitsa vakambʉʉtsa ʉYɨɨsʉ, vakata, “Kɨki avakongi va Yohana na vakongi va Vafalisayo vikɨdɨnda ʉkʉlya, avaave navikɨdɨnda?” 19 ɄYɨɨsʉ akavaanda akata, “Avaanu ʉwʉ vɨlangilwe viitse kʉ vʉtegʉlanie, ndeeti vɨɨdɨnde ʉkʉlya wʉ ʉntegʉlanʼdala alɨ paninie na veene? Ʉnsɨkɨ gwoni wʉ valɨ nave ʉntegʉlanʼdala navanogiili ʉkwɨdɨnda ʉkʉlya. 20 Lola, gʉliitsa ʉnsɨkɨ ʉgwʉ ʉntegʉlanʼdala alahetsiwa pagati pa veene, apo pwʉ valɨdɨndaga ʉkʉlya.

21 “Nakʉli ʉmuunu ʉvɨ ihonela ɨkɨlaka ɨkɨpya mu nsabwa ʉndaala. Angave ihonela ɨkɨlaka ɨkɨpya, ɨkyo kinanga ʉnsabwa ʉndaala. Vʉvʉle vʉle apakadwemwike pikwongelela ʉkʉdwemuka. 22 Ikange, nakʉli ʉmuunu ʉvɨ iduudila ɨdivai ɨɨmya mu sipako isya ngwembe isilaala. Ɨngave iduudila, ɨdivai ɨjyo ɨɨmya jibatsʉla isipako isyo, pwʉ ɨdivai jiduudika nasyene isipako sya ngwembe sinangɨka. Panogye ʉmuunu aduudilage ɨdivai ɨɨmya mu sipako sya ngwembe isipya.”

ɄYɨɨsʉ iganula ɨkulongwi jya Sabato

(Mataayo 12:1-8; Luuka 6:1-5)

23 Ɨlitsʉva lipamato ɨlya Sabato, ʉYɨɨsʉ na vakongi va mwene vaagendaga mu silɨmɨla isya ngano. Avakongi avo wʉ vigenda, valɨkʉdeenya isootso tsa ngano, valɨkʉsegeja nʉ kʉlya. 24 Pwʉ aVafalisayo vakambʉʉtsa vakata, “Lola, kɨki avakongi vaako vivomba ɨlyʉ mwiko ʉkʉvomba mu kɨgono kya Sabato?” 25 ɄYɨɨsʉ akavaanda akata, “Ndeeti namwɨmbili mu Vʉvɨge ʉVʉvalatse ʉmwʉ aavombye ʉDavʉdi wʉ alɨ nɨ nzala paninie na vanine? 26 Ʉnsɨkɨ ʉgwʉ ʉAbiyatali aale inteeketsi ʉmbaha, ʉDavʉdi iingye mu nyumba jya Ngʉlʉve, akalya ɨmikate ɨgyagavilwe gya mbombo jya Ngʉlʉve, akavapa na vanine. Ɨmikate gɨlya navaatavʉlɨlwe ʉkʉlya lʉsiku avaanu avange, avateeketsi veene wʉ vaalitsaga.” 27 Akavavʉʉla akata, “ƗSabato jyavɨɨkilwe jya kʉvatanga avaanu, avaanu navaapelwe vave vavanda va Sabato. 28 Lola, ʉMwana va Muunu vɨ Mbaha nakʉ kʉ Sabato.”