Lukas 5

Yesusdi, ‘Ne upu peterepkameng’ tenen, gonga kepra er nyapu wepra deipu upu

(Matius 4:18-22; Markus 1:16-20; Yohanes 1:40-42)

Tenpu taruda, Yesus Genesaret mokon, weik mokon dam tekra peterenmaupane, nesala pio weika di, ‘Er upu gekepkup’ tenen, er damai tengyakanmaidi daramdanmaipa, Allah upu peteremaupa gekenmai. 2 Ukunmai taruda, mekina pon nengdi, sun gapung co amokon pirman deipmaidi, sun mekina tep yakra porami alen me kunmaipa, Yesusdi sun gapung co amokon pirman deipmaiya epu. 3 Sun gapung co epu dingeda, Simon er gapung co wekrapudi, Simon moropu pangeda, Simondi gapung co gikra yambul karenai mokon deiki derirbeu. Derirbeupa, Yesusdi agapung co deiki bukra, awekmai neng yuma tep, Allah upu peteremau.

4 Allah upu peteremauanen, konum sengpepkopda, Simon tep aupu pepu. “Simono, kan gapung co dopra, mokon karu neitamai deribememdi, kan mekina yakra pon alenda, mekina wengna tep, mokon pumbon dongopkurume,” pepu. 5 Upepupa, Simondi tamupra pepu. “Naio, alukunda neitamai yumada, ne kayapu cap, pel pio weike donmape dinin, mekina tenpu pe ton pio men wekmasere. Dinino, kandi upepmanerema tep, ne mekina yakra pon alenda, mokon pumbon dongopkune,” pepu. 6 Upepupa, mekina yangna alen mokon pumbon dongopmaiyanen, mekina pio weike wekudi, ikin kupupa, sun mekina yangna alen terakmanto kupu.

7 Ukupu pangeda, sun kayapu, yuk gapung co deiki ortara bukmai neng tep, ‘Yangedi makupsengepa dopropkup’ tenen, “Yaso,” pepra, buru kaipi. Buri kaipipa, aneng yai pangeda, sun yumadi mekina wekmau alen, gapung co deiki butene dongopipa pio dekpepu. Dekpepupa, mekina ikin di gapung co mokon wekmanto kupu. 8 Simon cap, er kayapu neng yuma capdi, amekina weike dopropmaidi lolomai. Lolomaipa, Simon Peterusdi ayuma epka tep, Yesus damai gapung co deiki gutam diprapudi, Yesus tep aupu pepu. “Uo ne deiyo ngebo Yesus. Neda mali kuna ngebo cadi, ne tapra yukai benkurume,” pepu. 9 Aupu pepu ngeda, deiyo ake. Ada er cap, er kayapu neng capdi, mekina pio weik dopropmainge tep, mambul kange doupra lolomaidi, er Simonda, ‘Uo, angebo Yesusda, tek sisi pio telep ngebo,’ tenepudi aupu pepu.

10 Tonda, Zebedeus er nyapu butene Yakobus cap, Yohanes capda, Simon cap, sun mekina pon pel kikiman doramreia tep, sun peda lolomarei. Simon Peterusdi Yesus tep, “Ne tapra yukai berume,” konum pepu pangeda, Yesusdi Simon tep tamupra pepu. “Simono, kan kwar kuna gume. Ataru di dipra ortaru yumada, ‘Allah lyepredi sun dipru talenkamre’ tenen, kandi nesala weike bupra, ne damai duyakankamnerume,” pepu. 11 Konum upepu pangeda, sun gapung co dopmai neng yuma, mokon pirman apu lukra deipidi, akeca yuma acapu tapra, Yesus melipra bei.

Yesusdi kot susu utopu susu pu jeramu ngebo kwetepu upu

(Matius 8:2-4; Markus 1:40-44)

12 Tenpu tumida, Yesusdi nimi ati arum neitamai embanmaupa, ila kot susu utopu susu, er nong bol yuma jeramu ngebo, akunmaua di, Yesus epudi yau. Yesus damai gutam tu dipra bungyaudi, Yesus tep moropu. “Naio, kan kange deipnetumdi, ‘Angebo kwetepkune,’ tenepnetumtoda, ne kot susu adipapu kwetepnetume. Atep, ‘Kwetepnetum’ tenen, moropmakene,” pepra moropu. 13 Angebodi upepra moropu pangeda, Yesusdi angebo er nong deiki buru talepu. Talepudi upepu, “Ne kan tep kange deipra kwetepkukene. Ukuda konum telep kupra kwetepmakene,” pepu. Yesusdi upepu pangeda, adipapu angebo er kot susu utopu jeramnga yumada, gum kupupa teleppu kupu.

14 Yesusdi angebo tep, “Nedi akwetepmaken kecada, yuk neng tep lap men penkamrume,” pepra upu moupra deipu. Tonda, Yesusdi pepu. “Lap men penkurum dinin, kan nong dipterepkerdi, ‘Angeboda, konum teleppu kurure,’ pepkamkera tep, Yahudi yala neng, Allah karena deiyo ngebo damai bena, kan nong peterepkurume. Tonda, pu jeramne nesala pu gum kupnopda, Musa sekamutopu, Allah gispal dona tep, gam kun keca popra karerbangetopu, kan peda karerberume. Ada, Allah karena deiyo ngebodi, kan tep upepkamkere. ‘Allahda pio lek ngebo cadi, kan kot susu jeramkeu taruda, Allah derepserur tenen, nun kikiman men kuramupu dinin, ukuda Allahdi kan kot susu konum kaikmakera tep, ukutaru nun kikiman kuna telepe,’ pepkamkere. Upepkerepa, ‘Yuk nesala gekepmengedi, kael kepkamenga’ tenen, pepkene. Tonda, ‘Allahdi konum kwetepmamere, tenepkamkeng’ tenen, pepmakene,” Yesusdi pepu.

15 Yesusdi akwetepu ngebo tep, upepu dipunen, Yesusdi angebo kwetepu ngeda, yuk nengdi lap pepra baramipa, nimi weik gekerami. Nimi weika di gekeramya tep, ataru gonga keprapudi, dana-dana tara di nesala weike bulupra, ‘Yesus er upu gekepkup’ tenen, tonda, ‘Erdi kweptepkuser’ tenen, Yesus damai yakarami. 16 Nesala weike yakarami dinin, ‘Nimi weik bulupnung’ tenen, Allah morona tep, nimi kuna gumai, bura mutupu, Yesus er yuk Allah moropembaramu.

Yesusdi nong pu jeramupa, men embenmanto ngebo kwetepu upu

(Matius 9:2-8; Markus 2:3-12)

17 Tenpu taru, Yesusdi peteremau taruda, sun Farisi neng cap, Allahdi, ‘Ukunkamrume, ange men kunkamrume,’ peipupa, Musadi sekeiamu upu peteremna deiyo neng cap, Yesus peterepmauai bukra gekenmai. Anengda, dana-dana tara di, Galilea tara cap, Yudea tara cap, ton ila ati arum doamyai Yerusalem mutu cap, amutu-mutu yuma di yanmai. Sun yuma akunmaipa, Yesus peteremau taruda, Allahdi, ‘Yesusda pu jeramu nesala kwetepkur’ tenen, er puto weike Yesus konum karepmaua cadi, keteneipu. Yesus kunmau atida, go meteka ton pio men kupu. Ati buplanda, bura tara pe go men kupupa, yuma dekpepu. Ukupupa, Yesusdi aneng tep, Allah upu peteremau.

18 Yesus akati pum peteremau taruda, dumbari neng pela co deiki di, nong yuma meiyal semu ngebo baya duyai. Ada, ‘Yesusdi nun kabo kweteptue’ tenen, akati wekterepi dinin, nimi weik wekmaiya di, buplan dam dekpepmaua tep, Yesus dam men dubenmanto kupke. 19 Ukupka tep, ban kupra domi ati arum deiki welepidi, Yesus kunmauai dumsisipu, arum sirikrapidi, pela co cap, angebo cap talepra, ati arum deiki di tapnenep-nenep banmaiyanen, Yesus peteremauai apu akati pum deipdongopi.

20 Sunda, ‘Yesusdi angebo kweteptue’ tenen, duyanmanga deiki di, Yesus erda, ‘Ne tep tek sisi teka tenepmanenge,’ tenepudi, angebo kapul men kweteipu taru di, ameiyal semu ngebo tep pepu. “Ne mio, kan mali tenemem keca cap, mali kumem keca cap, gum kupra deipmakendi, kaukepmakene,” pepu.

21 Yesusdi aupu penmau taruda, sun Farisi neng cap, Musa sekeiamu upu peteremna deiyo neng cap, abuka gekenmaidi, sun kange neitamai di tenenmai. ‘Angebo penmarada, warya tep do? Yesus aupu penmaua deiki di, ‘Ne Allah utopu ngebo kunune,’ pepmaua tep, erda pio mali upu penmasere. Allah er dipapu nun mali kupe keca gum kupra deriserura tep, ware ngebodi ton cap apel doptu do?’ tenepidi, Yesus tep yu kupu. 22 Sun dipru neitamai yuma tenepi ngeda, Yesus er kange neitamai konum kael kepudi tenepka tep, erdi sun tep pepu.

“Aupu sun kange dipru neitamai tenipmarumada, warya tep do? 23 Ne kanam di, ameiyal semupa, men benmanto ngebo tep, ‘Kan mali kumem keca yuma gum kupra deipkene,’ tali peptaptene do? Agum dingeda, kanam dipu, ‘Tekromemdi, kan ason dopra bankurume,’ tali peptaptene do? Tali upu deiki dipu ange yuma peptaptene dinino, sunda, ‘Apelda tek sisi pel doptu do, men pel doptu do?’ tenepneruma tep, menmenada, angebo kweteipkune. Ada sundi ne tep, ‘Yesusda, nimi tuai kunge nesala mali kunge kecada, gum kupra derina deiyo ngebo tek sisi kurure, tenepkunerum’ tenen, angebo kweteipkune. Atep, aupu ton pepkune. Ameiyal semupa, men benmanto ngebo tep, ‘Tekmemdi, yan yanipra berume,’ pepkene,” Yesusdi pepu.

24 Upepudi, aupu ton dukdongopra pepu. “Dinino, neda Nimi Mi Sisa Utopu Ngebo, ne puto deiki di, tuai nesala sun mali kuramenge keca yumada, ‘Tek sisi gum kupra deipsetue,’ tenen, kael kepkuneruma tep, ameiyal semu ngebo tep, kwetepkune,” pepu. Upepudi, meiyal semupa, men benmanto ngebo tep aupu pepu. “Kanda, tekromemdi, kan ason dopra, kan ati tamupra berume pepkene,” pepu.

25 Upepu pangeda, adipapu meiyal semupa, men benmanto ngebo telep kupupa, tekrapudi, er ason dopra, awekmai neng yuma, sun adinmaipapu, ati pum di bura tara bena, er pe ati tamupra beu. Er ati banmau taruda, Allah tep, “Uo, ne nai Allah, kanda pio telepe,” pepra, Allah si eremaudi beu. 26 Yesus ukupka deiki di awekmai neng yuma, uo tenepra lolomaidi, Allah er si eremai. Tonda, “Akupmarada, nimi men kupmanto keca epmape. Akeca utopu keca ton men diramupke,” pepra mali pepi.

Yesusdi, ‘Angebo ne upu peterembenkamre’ tenen, Lewi dopropu upu

(Matius 9:9-13; Markus 2:14-17)

27 Yesus amutu tapu di, yukai banmau. Banmauanen, tenpu ngebo er sida, Lewi epu. Lewida, Roma mutu ila nimi deiyo neng karena tep, amutu neng yumadi karepnepa, pajak co bo dopra derina ati bukmau. Aco bo derina ati, akati pum bukmaupane, Yesus yaudi Lewi epu. Epudi, Lewi tep, “Kanda ne melipnemempa, ne cap tonpa benkuneme,” pepu. 28 Yesus upepupa, Lewi adipapu er keca yuma acapu taprapudi, tekra Yesus melipra dombeu.

29 Banmareiyanen, Lewi er ati sisa wekrorei. Ada, Lewidi, ‘Yesus gispal dopkun’ tenen, ila kalemna kaleprapudi, er kayapu neng weik kongpepu. Lewidi upupu neng ada, amutu taleami neng, Roma mutu neng tep, pajak co bo bulupra kareami neng upupupa er ati wekra kunmai. Tonda yuk neng dinin, mankau di mali-mali kurami neng cap, weika di yana wekra, sun yuma kikiman jen jenmai.

30 Jenmaipane, Musa sekeiamu upu peteremami neng dinin, sun Farisi neng cap tapakra kurami neng cap, tonda Farisi neng sisa cap, Roma mutu deiyo neng karena tep, pajak co bo bulupra derina deiyo neng cap, tonda yuk mali-mali kurami neng cap, Yesus cap, akati wekra kikiman jen jenmai. Jen keca jenmai taruda, sun Farisi nengdi epi dingeda, Yesus er melimna neng tep asipetepi. “Yesusda, co bo bulupra derina deiyo nengda, sunda upula doron neng kununga cadi, aneng cap, mali-mali kunge neng cap, Yesusdi, aneng cap kikiman jenmarada, warya tep do? Ada malipu kunmare,” pepra wenepi. 31 Upepra wenepipa, Yesusdi aupu gekepudi, aneng tep pepu.

“Pu jenmarpane, ange moupra tenena gum nengda, ‘Nimi kwetena ngebo dokter dan do?’ tenen, men enunge. Agum dinin, ‘Uo, pu jenmaserpa, nun mali kunmape’ tenen, ange moupra tenedange nesalada, nimi kwetena ngebo dokter tep putaprepa, enunge. Angetopu, neda mali kun neng, telep kudina tep yasi. 32 Ange utopu, yambul kwiryepu kuramenge dinin, sun dipru neitamai mali keca tupa kwapmarpapu, ange tenena gum di, ‘Nunda telep nengpu kunupe,’ tenenge nesala tep, ‘Lyepkamne’ tenen, men yasi. Ada sun Farisi nengda, ‘Nunda telep neng pua,’ tenedaruma cadi, pu kwetena neng men putarepa, men enung neng utopu nesala kuruma tep, ‘Sun mali kumum keca tapra, amnyo karikra, Allah er tara keproso’ pepra, ‘Lyepkamne’ tenen, men yasi. Dinino, sun mali kungedi, ‘Uo, angeda nun mali kunupe,’ tenengedi, mali kange doupra kunge nesalada, ‘Sun mali kuramenge keca tapmengopda, autopu nesala dopra, lyepkamne’ tenen, yasi,” Yesusdi pepu.

Allah er gispal dona tep, jen jena gum, si tepra kuna tep, asipetepi upu

(Matius 9:14-17; Markus 2:18-22)

33 Yohanes Pembaptis, erdi peteremamu upu gekeramidi, melipra embarami neng cap, sun Farisi nengdi pepnepa, gekerami neng capdi, sun mali kuramne keca tep, ‘Allah moropkup’ tenen, jen jena gum si tepra, Allah mororamya cadi, sun Farisi nengdi Yesus tep pepi. “Yohanes er upu gekengedi melipra embange neng cap, nun Farisi neng, nun upu pepnepa gekepra embange neng cap, aneng yumadi, ‘Allah gispal dona cap, Allah morona cap kunkupe’ tenen, jen jena gum, si tepra Allah moronunge. Sun anengda ukunung dinin, Yesus kan nyapuda, akungetopu men kununge. Sunda jen keca cap, jen me cap, tali lupra jenapu kununge. Ukunungada, warya tep do?” pepra asipetepidi wenepi.

34 Aupu asipetepra wenepi pangeda, Yesusdi aneng, domona upu deiki di tamupra pepu. “Ner don ngebo dopkure taruda, er kayapu cap, er melimna neng capda, kalemna keca kalepra kikiman men jenung do? Ikin kange doupra, engenapu kunung do? Gume, sun kap, er ner don taruda, kange deipmanunga cadi, kalepra kikiman jenunge. Ange utopu, neda ner don ngeboto kununa tep, ne nyapuda kange mun kurepa, jen si tepra men kununge. 35 Dinino, ne talepra gipdaro benkamneng taruda, sun kange ikin kuprepa, jen jena gum di, jen si tepra kunkamenge,” Yesusdi ayana asimai neng tep pepu.

36 Aupu pepu dingeda, Yesusdi, ‘Allah upu sekaminge teleppu kurur dinin, sun Farisi neng cap, sun apu yapu capdi, sun pedi teneramidi, tali tapakra peteremamenge mem kecada, mali, kael kepkameng’ tenen, awekmai neng yuma tep, domon upu butene pepu. Tonda Yesusdi, ‘Ne peteremne keca cap, ne kune keca cap deiki di, kange tenena ukupunge kael kepkameng’ tenen, awekmai neng yuma tep, aupu butene pepu. Yesusdi pepu upu ake.

“Ware ngebo do yuma, pumun opkal bon dakre pangeda, aopkal lepsikra wina tep, ukupu opkal gweleptapmengedi, pumun nge deiki deipmengedi, men winunge. Ange utopu kupmengopda, ukupu wipmenge nge er urasin yuk, pumun opkal er urasin yuk kuprura tep, ange men kununge. Tonda, aopkal me kupmengedi, kalaipmengepa, konum kalapyopda, pumun opkal gwelerure. Ada, ukupu opkal wipmengedi kurura tep, pumun opkal cap, ukupu opkal cap, wisipra men winunge.” Yesusdi pepu.

37 Ton ngeda aupu pepu. “Ange utopu ton, nesala domba bol dopra, potong lyektapmengedi, dana-dana tara yuma wipmengopda, pumbonda anggur me gwepra dikdongopra derinunge. Ukununga tep, nimidi purupra, ukupu gwerameng anggur meda, pumun domba bol pumbon men dikdongopra derinunge. Ukupu anggur me gwepra pumun domba bol pumbon dikdongoptenge dinin, anggur me puto di nepredi, domba bol bongoprepa, me embarure. Bongopredi embaryopda, anggur me cap, domba bol cap, gum kupra mali kurure.

38 Ange tep nengeda, ukupu anggur meda, ukupu domba bol pumbonpu dikdongoptenge. 39 Tonda, ware nesala do yuma, pumun anggur nimi kange yawaramne me konum jepmengopda, er puto cap, taue cap, pio telep cadi, amendada anggur me ukupunge men putaprepa, men jenunge. Pumun ngeda, pio telep tau me cadi, ukupu ngeda, men putarepa men jenunge.” Yesusdi pepu.