Markus
Markusdi, Yesus er kai telep upu tep, sekeiamu upu
Abuku sekamnga deiyo ngeboda, Markus kuramu. Markusda, Yesusdi wepra deiamu neng, sun 12 neng kan-kan ton men kuramu dinin, erda Yesus teka teneramu ngebo kuramu. Paulus cap, Barnabas cap, Yesus er upu peterep embaramrei taruda, Markus cap melipra embaramu. Sun kikiman barami. Amenda taruda, Markusdi sun butene tapra (Rasul 13:13) er yuk beu dinin, yuk taruda kange di ton cap Barnabas cap kikiman pel doramrei. Paulus depkamu taru di Markus tep, “Erda telep ngebo,” pepu (2 Timotius 4:11). Peterusdi Yesus er upu peteremamupa, Markus gekepudi abuku neitamai telep kupra lelepra seku.
Markusdi abuku sekamunge deiyoda, ‘Yahudi yala gum nesala peda, Yesus er kai telep upu, nimi lyemna upuda gekeptengedi, Yesus tep teka tenenkameng’ tenen, abuku Injil Markus sekamu. Markusdi, ‘Yesus er upu peteramunge cap, nimi men kupmanto keca, kunupsek pen pel weik doramunge cap, teka tenenkameng’ tenen, abuku sekamudi Roma mutu nesala cap, yuk Yunani nesala cap tep dokotepu. Markusdi sekamu buku, abuku Injil Markusda, ada menmena taru di. Sun yuk Injil sengaminge yumada, amenda tarupu sekami. Erda, menmena taru sekamu.