Markus 1

Markus

Markusdi, Yesus er kai telep upu tep, sekeiamu upu

Yesus yankamua tep, Yohanes Pembaptisdi Yesus er bisi ketenem diramunge tep pepu upu

(Matius 3:1-11; Lukas 3:2-16)

Allah er Mi Sisa, Yesus Kristus er upuda, nimi lyemna tep er kai telep upu gonga kemnada, ake. 2 Amenda taru kupkamu keca cap, Allah er upu cap tep lap peramu ngebo, nabi Yesayadi aupu lap pepra sekamu.

Allahdi pepu, “Ne upu kai pedin ngebo menmena dokotepnepa, benmarepane, kan amenda benkamrume. Ne upu kai pedin ngebodi, kan benkamrum bisida, erdi keteneipkamkere. 3 Kan benkamrem bisi keteneipkamre ngeboda, mo cemna cap, nimi kuna cap gumai di, aupu penkamre. Ada, ‘Nun Ila Nimi Deiyo Ngebo, Allah yankamra tep, bisi kwiryepu yapra derinkamrume,’ penkamre.” (Yesaya 40:3)

4 Nabi Yesayadi aupu peramnga utopu Yohanes yau. Yaudi nimi kuna cap, mo cemna cap men kuramu mutu dinin, Yordan me damai dana-dana teka tenena nesala dopra me dongoramu. Tonda, Yohanesdi peteremamu ngeda, ake. “Nesala kange dipru neitamai di mali teneramenge keca cap, mali kuramenge keca cap yuma tapra, amnyo karikrongepa, Allahdi nun mali kunup keca yuma lyemna tep, gum kupra deipredi, kaukepkamsere,” Yohanesdi upepra peteremamudi, teka tenena nesala yuma dopra me dongoramu. 5 Ila ati arum domi mutu, Yerusalem mutu kurami nesala cap, Yudea tara neitamai kurami nesala cap, denge pio weika di Yohanes peteremamngai gekerbarami. Baramidi, sun mali kurami keca yumada, yuk nesala gekenmana neitamai di katuaipu lap perami. “Nun tek sisi mali kuramupke,” pepra, sun mali kurami keca yuma lap pepra tamamipa, Yohanesdi anesala tep, me dongoramu. Ateka tenerami nesala me dongoramu me sida, Yordan me.

6 Yohanesdi unta bisam potong dopra opkal wipra dongoramu. Abisam bolpu deiyoteng deriramu. Tonda, Yohanes er jeramu kecada, mong mokon cap, sul po cappu jepra kuramu. 7 Akuramudi peramu ngeda ake. “Ne menmena yasi ngeboda, puto gum ngebo dinin, amenda taru yankamra deiyo ngeboda, ila puto weik ngebo kurure. Neda mambul gum ngebo kunedi, er amutarapu kununa tep, erda ila mambul ngebo cadi, er yantang deiki kemna keca, er sida sandal, er sandal koudongon tapuda, nedi geipdongopra melipra men loptaptene. Neda mambul gum ngebo kununa tep aupu pepsene. 8 Neda me sisapu dongosenun dinin, angeboda, Allah er Lek Sambala weika di karenkamsere. Kareserepa, sun dipru neitamai wekseredi, dekpepra kunkamsere.” Yohanesdi peramu.

Yohanesdi Yesus me dongopunge cap, Kain Jen Ngebodi, ‘Yesus mali kuptue’ tenen, Yesus kupetepunge cap tep, pepu upu

(Matius 3:13-17; Lukas 3:21-22; Lukas 4:1-13)

9 Yohanes aupu peteremamu taruda, Yesus Galilea tara dinin, Nasaret mutu di, Yohanesdi teka tenena nesala dopra me dongoramngaipu yau. Yesusda, Yordan mekin yaupa, Yohanesdi Yesus me dongopu. 10 Me dongopupa, me pumbon di me wekrapkanen, tengdongou taruda, Allahdi im deiki buplan paktapupa, Yesus dinmaupa, Allah er Lek Sambalada yal ma urasin utopu kuprapudi, Yesus er nong deiki bungyau. 11 Bungyau taruda, Allah im deiki di aupu peipu. “Kanda ne Mi Sisa kurume. Nedi kan tep, pio bicau tenekenedi, ne kange pio derikunune.” Allahdi pepu. 12 Upepupa, adipapu Allah er Lek Sambaladi Yesus tep, me cap, nimi kuna cap gum mutu neitamai doupra beu. 13 Dubeupa, mana denge weik 40 tumi deiki di, Kain Jen Ngebodi, Yesus tep, ‘Mali kuptu’ tenen, pio kurpeteramemeu. Amutu neitamaida nimi yuk neng ton pio men kurami mutu kuramu. Amutu kuramu taruda, tali bura tara gam kuramu kecapu kuramu mutu Yesus er peda akuramu. Ataruda, Yesus jen putaramu dinin, jen men jeramnga cadi, er puto boun kuramupa, Allah er im deiki pel don neng, malaikat-malaikatdi Yesus damai yana kalekra melimami.

Yesusdi er upu gekepra, peterep embankami neng tep, pepu upu

(Matius 4:18-22; Lukas 5:2-11; Yohanes 1:35-42)

14 Yohanes Pembaptis konum tomopidi, ateng koupra wenemna ati dongopi taruda, Yesusda Galilea tara tamupra welepra beu. Welepudi, Allah er kai telep upu, nimi lyemna upu lap peramu. Peramu ngeda ake. 15 “Allahdi weipu taruda konum kupre. Ada, Allahdi nimi tuai neng denge weik, sun dipru talepra kunkamre taruda, konum damai kupmara tep, sun dipru kange mali tenerum keca cap, mali kurum keca yuma cap tapra, amnyo karikromumdi, Allah er kai telep upu, nimi lyemna upupu teka tenenkamrume,” pepra peteremamu.

16 Aupu pepbaramu taru neitamaida, Yesusdi ila pala mokon, er sida Galilea mokon pirman embanmau. Embanmaudi dinmaupa, Simon cap, er weit bo Anderias cap, sunda mekina yangamrei neng kuramrei cadi, ‘Mekina yakra popkamanem’ tenen, mokon pumbon alen utopu keca er sida jala dokotenmareipa epu. 17 Yesus abutene neng epu dingeda, sun tep pepu. “Sunda ne melipra domyanereso. Mekina yakra dororamrumtopu, nimi bulupra doron neng keipkusene. Ukupsenepa ‘Nesala weika di Yesus tep teka tenenkameng’ tenen, ne damai dekankamnerume,” pepu.

18 Yesusdi upepu pangeda, Simon cap, Anderias cap, adipapu sun butene nengda, mekina yakra doron keca, er si jala, acapu taprapreidi, Yesus melipra domyarei. 19 Yesus aupu pepudi, amokon pirmanpu yambulanun ton abanmauanen, butene neng ton, sun sida Yakobus cap, er weit Yohanes cap, ada Zebedeus er nyapu, sun gapung co deiki di mekina yakra poramrei keca ketenem dinmareipa epu. 20 Epu dingeda, adipapu Yesusdi abutene neng tep, pepu. “Ne melipra domyanereso,” pepra kongpepupa, sun butene nengdi sun nai Zebedeus cap, er pel melimna neng cap, gapung co deiki abukmaiyaipu tapra, Yesus melipra domberei.

Yesusdi nimi dipruai isok taleamnga dokotepu upu

(Lukas 4:31-37)

21 Yesusdi ukupu dopropu neng cap, Yesus cap tenpu ila ati arum doramyai, er sida Kapernaum mutu welepi. Welepidi akunmaipane, Yahudi yala neng, sun Allah upu wengami tumi er sida Sabat tumi konum kupkopda, Yesusdi Yahudi yala nesala Allah si eremamidi, Allah upu peteremna ati wekapudi, peteremau. 22 Yesusdi aupu peteremaupa, abulupmai neng yuma gekepidi, ‘Uo’ tenen, mambul kange doupra lolomai. Ada, Musa sekeiamu upu peteremna nengdi, peteremamitopu gum dinin, ‘Yesusda, yuk nengdi peteremamingepu peterepkune,’ tenena gum dipapu, ila kael deiki cap, puto capdi peterenmaua tep, amutu neng gekepidi lolomai. 23 Aneng lolomai atida, Yahudi yala nesala sun Allah er upu peteremna ati pumbon neitamaida, isok taleamu ngebo bukmaua di, upu ila di pepu. Angeboda, isokdi talepnuruamnga deiki di pepu. 24 “Yesus Nasaret mutu kuramum ngebo, kanda ware keca putanmakerpa yanmaserem do? Kandi, ‘Amutu isok-isok yuma poptapkune’ tenen, yanmaserem do? Ne kael kepmakene. Kanda Allahdi weiamkeupa, Pio Dumsisi Ngebo kurume,” pepu. 25 Isokdi upepupa, Yesus er yu weik kupupa, er upu puto di, “Kan upu dimpepra, angebo dipru neitamai talepmumada tapra beo,” pepra wenepu.

26 Yesusdi upepra wenepupa, aisokdi taleamu ngebo ila di talepra longdinmauanen, er dipru cap, er nong pumbon di gupsakapudi ngolokra beu. 27 Yesus ukupu pangeda, abulupra wekmai neng yumadi, lolopra mali penmaidi asimdanmai. “Uo, akupmaser ngeda, ware keca do? Yuk nengdi nun tep peteremamsei upu utopunge gume. Erda ila puto cap, ila kael cap deiki di peteremasere. Isok-isok pape, Yesusdi ‘Ukuprume, ukuprume,’ peprengepu gekepra banunge,” penmai. 28 Ange tep nengeda, anengdi Yesus kupunge tep, kai doupra lap perbaramipa, Galilea tara neitamai kurami nesala denge pio weika di gekerami.

Yesusdi pu jeramu nesala kweteramu upu

(Matius 8:14-17; Lukas 4:38-41)

29 Atumida, Yahudi yala neng Allah upu peteremna ati tapra beidi, Yesus cap, Simon cap, Anderias cap, Yakobus cap, Yohanes cap, sun yumada, Simon cap, Anderias cap sun ati bei. Bei dingeda, aneng ati bena weki. 30 Simon er yamal ner nong bupu pu jeramnga tep, akati mapmauaida, Yesus tep lap pepi. 31 Atep, Yesusdi aner mapmauai di, aner er buru talepra tekra deipu. Tekra deipu pangeda, aner nong bupu pu jeramu ngeda, adipapu dimpepupa, anerdi aneng sun jen keca karepu. 32 Atumipu dinin, keteng konum weku taruda, amutu nesaladi pu jeramu nesala cap, isok taleramu nesala cap, weike dopra Yesus damai duyakanmai.

33 Duyakanmaipa, Kapernaum mutu ati arum domyai kurami neng, Simon ati buplan dam, weika di bulupra wengyai. 34 Bulupra wengmaipa, Yesusdi, aneng sun pu jeramunge, pu yala weik kwetepu. Tonda, Yesusdi isok-isok weike nesala taleamngada, aisok yuma enepra dokotepu dinin, aisok yumada, er Yesus konum kael keami. Atep, Yesusda, ‘Aisokdi ne kune keca katuai lap pepnenunge,’ tenepu. Tonda, sundi, ‘Yesusda, Allah er Mi Sisa akonum yanmare,’ pepra, ‘Katuai di pepnenung,’ tenepu. Utenepka cadi, Yesusdi aisok-isok yuma tep, “Sun upu dimpepso,” pepupa, aisok yumadi upu men pepmanto kupi.

Yesusdi nimi men kuramyai bena, Allah moropu upu

(Lukas 4:42-43)

35 Sun mapmaiyanen, men berekmau taru di, tupa kunukapupapu, Yesus bukrapudi, akati tapra bura tara nimi men kuramyai beudi, Allah moropu. 36 Allah moronmau taruda, Simon cap, er kayapu neng cap, ‘Yesus dan do?’ tenen, epembanmai. 37 Epra embanmaiyanen, Yesus konum epi dingeda, yuprapidi upu weika di pepi. “Amutu nesala yumadi, ‘Nun ton melipra kwetepsetua’ tenen, kan tep enmakenge,” pepi. 38 Upepipa, Yesusdi tamupra pepu. “Gume, ‘Nesala weike peterepkamne’ tenen, yanamsa tep, amutu damai dinin, yuk mutu ila ati arum dopra kungai cap, yambul ati arum doramengai cap, benkupe,” pepu. 39 Upeputopu, Galilea tara neitamai yuma, embaramudi, Yahudi yala neng sun Allah upu peteremna ati wekra peteremamudi, nesala taleamne isok yuma enepra dokoteramu.

Yesusdi kot susu utopu susu jeramu ngebo kwetepu upu

(Matius 8:2-4; Lukas 5:12-14)

40 Tenpu tumida, ila kot susu utopu susu, er nong bol yuma jeramu ngebo, Yesus damai gutam tu dipra bungyaudi, Yesus tep moropu. “Naio, ‘Angebo kwetepkune,’ tenepnetumtoda, adipapu kwetepnetume. Atep, ‘Kwetepkunerem’ tenen, moropmakene,” pepu. 41 Angebodi upepra moropu pangeda, Yesusdi er tep, pio bicau tenepka tep, angebo er nong deiki Yesus buru talepu. Talepudi upepu, “Nedi kan tep kange deipra kweteipkukene. Ukuda konum telep kupra kwetepmakene,” pepu.

42 Yesusdi upepu pangeda, adipapu er kot susu utopu jeramnga sakropupa, er nong bol yuma kange di ton cap teleppu kupu. 43 Yesusdi angebo tep, “Nedi akwetepmaken ngeda, yuk neng gekenai ton lap men penkamrume,” pepra upu moupra deipu. 44 Tonda, Yesusdi pepu. “Yuk neng gekenai lap men penkurum dinin, kan nong dipterepkamkera tep, Yahudi yala neng, sun Allah karena deiyo ngebo damai bena lap pepmemdi, er dina tep kan nong peterepkurume. Bena peterepmempa, dipetepkeredi upepkamkere. ‘Allahda pio Lek ngebo cadi, kan kot susu jeramkeu taruda, ‘Allah derepserur’ tenen, nun kikiman men kuramupu.

Akati, Allah er si eremna ati men wekmanto kuramum dinino, ukuda kot susu konum kaikmakera tep, akati wengna cap, nun cap kikiman kuna peda telepe,’ pepkamkere. Tonda, pu jeramne nesala pu dimpepnopda, Musa sekamutopu Allah gispal dona tep, gam kun keca popra karerbaramengtopu, kan peda karerberume. Ada, ‘Allahdi konum kwetepmamere tenepkamkeng’ tenen, pepmakene,” Yesusdi pepu.

45 Yesusdi akwetepu ngebo tep, upepu dinin, apeipunge taprapudi, Yesusdi kwetepungepu lap pepembaramupa, nimi weik gekerami. Nimi weika di gekeramya tep, ataru di gonga keprapudi, Yesusda nimi ati arum doramyai tali lupra katuai men embaramu. ‘Ada, nimi weik bulumnung’ tenen, nimi kuna gumai, inipra bura mutupu bena kuramu. Bura mutupu kuramu dinino, dana-dana tara di nesala weik bulupra, Yesus damai yakarami.