Yohanes 1

Yohanes

Nimi lyemna tep, Yohanesdi, Yesus er kai telep upu seku

Upu kuramnganen, amenda taru nimi nong utopu daudi, tuai mutu yaua tep, pepu upu

Akeca-keca kapul men kwamu taruda, Upu konum kuramu. Upu kuramudi, Upu cap, Allah cap kikiman kuramrei. Upu cap, Allah cap, sun tonpua. Upuda, Allah kurure. 2 Allahdi, akeca-keca kapul men ketekepra deiamu taruda, Upu penup ngebo Yesus cap, Allah cap kikiman kuramreianen, ataru neitamaida, Upu penup ngebodi akeca-keca yuma ketekepra deiamu. 3 Upu penup ngebo, erdi, akeca-keca yuma ketekepra deipu. Ware keca do yuma, Allahdi ketekepra deipu keca yumada, Upu penup ngebo, er pel dopka deiki di akeca-keca yuma ketekepra deipu. Akwamre keca yala-yala yumada, Upu penup ngebo er yuk dipapu akeca-keca yuma ketekepra deipu. Yuk ngebo dipapu tenpu keca peda men ketekepra deipu. 4 Upu ngebo, er kuramnga neitamaida, gam kuna deiyo keca kurure. Er neitamai kwamu gam kuna deiyo keca deiki di, tuai nesala sun kunungna kuramya neitamaipu, Upu ngebodi nimi dipru pumbon dirine deipu. Dipru dirine kareserur ngeboda, er Upu tenpu pua. 5 Tuai nesala yumada, dipru kunungnaipu kuramengepa, aneitamaida adirin deiyo ngebodi dirin deriserur dinin, tuai nesala yumada, sun dipru neitamai, kunungnapu kurura cadi, sun yumadi, ‘Dirin deiyo keca kareserur deiyo ngeboda, ake’ tenen, er tep moupra men kael kemnunge.

6 Pumun taru di, Allah dokotepu ngebo nun damai yaue. Angebo er sida Yohanes kuramu. 7 Yohanes yaua deiyoda, Allahdi, ‘Dipru Dirin Deiyo ngebo tep, Yohanesdi lap pepra peteremrepa, nesala ban-ban yuma gekepmengedi, adirin deiyo ngebo teka tenepmenga deiki di, gam pio kunkameng,’ tenen, dokotepupa, Yohanes yaue. 8 Yohanesda, nimi dipru neitamai dirin deiyo keca karerur deiyo ngebo men kuramu dinino, adirin karena deiyo ngebo tep, ‘Dipru kange neitamai dirin karerur deiyo ngebo epnedi, er tep lap pepra peteremkamne’ tenen, Yohanes yau. 9 Nesala ban-ban yuma sun makuna tep, dirin deiyo keca karena deiyo ngebo, Tek Sisi Dirin Deiyo Ngebo yankamua cadi, Yohanesda, ketenem dina cap, lap pena cap tep yaue.

10 Nimi Dipru Dirin Karena Deiyo Ngeboda, tuai mutu neitamai yana kuramu. Dipru Dirin Deiyo Ngebodi, tuai kure keca yumada, er pel dopka deiki dipu ketekepra deiamu dinin, teka tenena gum, tali tuai mutu nesaladi, ‘E, angebo ake’ tenen, moupra men kael keami. 11 Dipru Dirin Karena Deiyo ngebodi, ‘Anesala ne mawa nesala kunkameng,’ teneamu Israel nesala sun damai yana kuramu dinin, anesaladi kange deipra er tep teka tenepra men dororami. Er tep, ‘Nun song’ tenen, tamnapu kurami. 12 Dinino, ware mutu nesala do yuma, Dipru Dirin Deiyo Ngebo, er si Yesus cap tep, teka tenepra, kange deipra dororami nesala yuma tep nengeda, ila mambul keca kareamu. Ada, Allah er nyapu sisa kemdina deiyo keca kareamnga deiki di, er tep teka tenerami nesala yuma, Allah er nyapu sisa kemdiramupa, Allahdi anesala lyeproamu. 13 Allah er nyapu kemdiramseu pepmasenada, tali nimidi deipmengepa, dadeipdanen yakarameng nesala utopu tep gume. Tonda, nimi sun kange dipu, ‘Nyapu deipkupe,’ tenerameng utopu kuna deiki di gume. Tonda nimidi, ‘Nun nerapudi nyapu derinkamseng,’ teneramenga utopu tep men pepne. Ange yuma gum dinin, anesala yumada, Allahdi sun tep, ‘Ne nyapu kunkamenge,’ tenen, wepra deiamseua deiki di, Allah er nyapu sisa kemdiramseu.

14 Upu penup ngeboda, nimi nong utopu daudi, tuai mutu kwerepupa, nun kan-kan neitamai kikiman kuramepu. Er pio telep kupra kuramupa, diramupu. Er pio telep kuryada, tali tep gume. Ada Allah er Mi Sisa tenpu kurur ngeboda, er pua. Allah er Mi Sisa kuramudi, er tek sisi kuna cap, er tek sisi upu pena cap, er kange dipu tuai nesala tep bicau tenepra, pio melimna deiyo keca cap, angebo deiki weika di kwamu. Nun nai bo Allahdi angebo dokotepseupa, pio teleppu kuramupa, diramupu.

15 Teka tenerami nesala tep, me dongoramu ngebo Yohanes Pembaptisdi, nimi dipru neitamai dirin deiyo keca kareserur ngebo tep, ila upu di peramu. “Ayanmarpa, dinmarum ngeboda, konuma. Men di er tep uperamsisi. Ne menmena taru yanamsi dinin, amenda taru yankamre ngeboda, ne kapul men deipnei taru, er konum gam kuramnga cadi, erda ila mambul ngebo kuredi, ne deiki tara kurure. Neda mambul gum ngebo cadi, erda ne deiki tara kurure. Neda mambul ngebo gum dinin, erda ila mambul ngebo kurure.” Yohanesdi peramu. 16 Angebo erdi tuai nesala tep, bicau tenena deiyo keca cap, melimna cap, lyemna deiyo keca cap, weika di er dipru kuramnga deiki di, telep keca weik kareamseudi, telep kemdiramseupa, nun yuma dororamupka deiki di teleppu kunupe. Erdi pio telep keca kareamseudi, telep kemdiramseutopu, ukutaru peda, tupa kareserure.

17 Aupu pepmasena deiyoda, ake. Ada, Allahdi, ‘Ukunkamrume, angeda men kunkamrume,’ pepra deipupa, Musa gekepudi sekeiamseu mem upu yumada, Musa deiki di kareamseu. Dinino, tek sisi kuna deiyo keca cap, Allah er kange dipapu nun tep bicau teneseredi, melipra lyemsere deiyo keca cap, tuai nesala tep makudana deiyo keca cap, nimi lyemna deiyo keca yuma capda, Yesus Kristus deiki dipu kareserure. 18 Pumun taru di dipra, ukutaru yuma neitamai di, nun tuai nesaladi, Allah er urasin pio men diramupu. Dinino, nun nai Allah, er kuryai kurur ngebo, er Mi Sisa, Allah cap tonpua kure ngeboda, Yesusdi Allah er kure keca katuai dirure. Yesus er kuramu keca cap, er upu peramunge cap deiki di, Allah er kure keca jenek kupra lape peramseue.

Yohanesdi, “Allahdi wepra deiamu ngebo, Nimi Lyemna Deiyo Ngebo Kristus, konum yanmare,” pepu upu

19 Uda, sun kota Yerusalem mutu kurami Yahudi yala deiyo nengdi, upu peipipa, sun Yahudi neng Lewi yala neng cap, Allah er si eremna ati pumbon di, Allah tep karena deiyo neng, sun imam neng capdi, Yohanes damai yaidi, “Kanda ware ngebo do?” pepra asipetepi. 20 Asipetepipa, Yohanesdi, inimna pio gum dipapu, katuai di lap pepu. “Allahdi, ‘Nimi lyepkamre’ tenen, wepra deipudi, dokotepseu ngebo, Nimi Lyemna Deiyo Ngebo, Kristusda, ne men kunune. Neda Kristus gume,” peramu.

21 Upepupa, sun Yahudi yala deiyo nengdi Yohanes tep asipetepi. “Atep kanda ware ngebo kurum do? Pumun taru Allah upu lap peramu ngebo, nabi Elia kurum do? Pumun taru Musadi, ‘Amenda taru ila mambul nabi ngebo yankamre ja,’ pepra peiamseu ngebo kurum do?” asipetepipa, Yohanesdi, “Ne gume,” peramu. 22 Upepupa, sun anengdi, “Atep kan pedi, kan pe tep ware upu perum do? ‘Ne akunune,’ pepra lap pepsemempa, nun dokotepmasenga deiyo neng damai lap perbenkamapa cadi, kanda ware ngebo kurum do?” pepra asipetepi. 23 Asipetepipa, Yohanesdi, Allah upu lap peramu ngebo, nabi Yesaya sekeiamu upu dopra, aupu deiki di pepu. Aupuda ake.

‘Allah er upu kai pedin ngebodi, nimi gum kwamngai di, ila upu deiki di penune. Nun Ila Nimi Deiyo Ngebo yankamre bisida, kwiryepu yapra derinkamrume.’ (Yesaya 40:3)

24 Yohanesdi nabi Yesaya sekeiamu upu dopra pepu. Upepupa, Yerusalem deiyo nengdi dokotepipa, amutu yanmai Farisi nengdi Yohanes tep asipetepi. 25 “Kandi, ‘Neda, nabi Elia gum, Nimi Lyemna Deiyo Ngebo Kristus gume. Tonda, Musadi peiamupa, Israel nesaladi, ‘Ila mambul Allah upu lap pena ngebo, nabi tenpu ton yankamre ja’ tenen, ketenepra dirami ngebo gum, aneng men kunune,’ pepmasereme. Ange tep nengeda, ware keca deiyo tep yuk nesala dopra me dongorum do?” pepra asipetepi.

26 Asipetepipa, Yohanesdi aneng tep upepu. “Gume. Neda teka tenenge nesala dopra, me mokon sisa pumbon dongonun dinin, sun kan-kan neitamai konum akuredi, katuaipu tengrur ngeboda, sundi, ‘Angeboda, ake’ tenen, moupra men kael kemrume. 27 Ne menmena yanamsipane, angeboda, amenda taru tengyankamre. Angeboda, pio ila mambul ngebo cadi, neda mambul gum ngebo, er amutara kunune. Atep nengeda, er yantang deiki geteramre keca, er sandal tapuda, melipra men loptaptene. Neda er amutara kunedi, mambul gum ngebo kununa tepa,” Yohanesdi pepu.

28 Apepmasen upu yumada, Yordan me goupra ortara mutu, amutu sida Betania mutu, Yohanesdi teka teneami nesala dopra, me dongoramu mutu kuramu.

Yesusda, nesala ban-ban yuma, sun mali kun keca wenemna tep, pununa ngebo kurura tep, “Erda Domba Mi Utopu Ngebo kurure,” pepu upu

29 Anengdi Yohanes tep asipetepi tumi dinin, mapmaipa, ambutumi deikida, Yesusdi Yohanes er damai yakanmaupa, Yohanes epudi, pepu.

“Nesala ban-ban yuma, sun mali kun keca gum kupra derina cap, ‘Sun men depkameng’ tenen, sun pununa cap deiyo ngebo, Allah karena tep Domba Mi Utopu Ngeboda, ayanmar adano. 30 Ambutumida, ne Yohanesdi sun tep, ‘Ne yanmasipa, amenda taru yankamre ngeboda, ne men deipnei taru pumun di konum kuramnga tep, erda ila mambul ngebo kurur dinin, neda mambul pio gum ngebo kunune. Atep, er amutarapu kunepa, erda ne deiki tara pio akunkamre,’ pepmasisi. Aupu tep pepmasi ngeboda, ayanmar ngebo akonuma. Er tep aupu pepmasisi.

31 Nedi, ‘Angebo ake’ tenen, er nong kapul men kael keamsi dinino, ne kael keamsi kecada pepkusene. Nedi teka tenenge nesala me dongonuna deiyoda, yuk gume. Deiyoda, Israel nesala yumadi, ayanmare ngebo tep moupra kael kepmengedi, ‘E, Allahdi nimi lyemna tep, wepra deiamseu ngeboda, er pua, tenenkameng’ tenena tep, apel donune. Tonda, angebo er kure keca yuma katuai kuprepa, ‘Israel nesaladi moupra kael kemkameng’ tenen, nedi teka tenenge nesala dopra me dongopra yakaramsi.” Yohanesdi pepu.

32 Upepudi, aupu ton cap dukdongopra pepu. “Ne asuru di epsi keca lape pepkusene. Allah er Lek Sambalada, yal ma urasin utopu daudi, im deiki di angebo er nong deiki yana bukupa epsi. Allah er Sambalada, angebo cap er dipru neitamai tupa kurure. 33 Angeboda, ne pedipapu men kael keamtene dinin, ‘Yohanesdi teka tenenge nesala me dongorbenkamre’ tenen, dokotepneu ngebo Allahdi, upepneu. ‘Allah er Lek Sambala im deiki yaredi, er nong deiki bukra, er dipru neitamai pio akunkamre ngeboda, er konuma. Angebodi yuk teka tenenkameng nesala tep, Allah er Lek Sambala dopra karenkamsere,’ pepra lap peipneu. Ukupra lap peipneutopu, ange yuma konum kupupa epsa tep, ‘Angeboda Yesus adano’ tenen, konum kael kepmasi. 34 Akeca epsa tep, nedi sun tep lape pepsene. Ayanmare ngebo Yesusda, Allah er Mi Sisa kurure.” Yohanesdi pepu.

Yesusdi gonga kepra, er upu gekepra er cap embankami neng, er nyapu tep, wepra deipu upu

35 Yohanesdi aupu pepupa, sun yuma mapmaiya berekupa, sun kunmai mutupu, Yohanes cap, er upu gekepra dombaramrei neng butene cap akunmai. 36 Dakunmaipa, Yesusdi sun damai banmaupa, Yohanes epudi pepu. “Sun dipetepreso. Nesala ban-ban yuma, sun mali kun keca gum kupra derina cap, ‘Sun men depkameng’ tenen, sun pununa cap deiyo ngeboda, akonum yanmar adano. Allah er karena tep Domba Mi Utopu Ngeboda, abanmar adano,” pepu. 37 Upepupa, Yohanes er nyapu sun butene gekeprei dingeda, Yesus banmaupa, sun adipapu er amnyo tara dombereidi, er cap kikiman embanmai.

38 Dombanmareipa, Yesusdi er amnyo tamupra dipetepudi, abutene neng domyakanmareipa, epudi, aupu pepu. “Sunda ware keca putapserepa, domyakanmanererum do?” pepra, asipetepu. Asipetepupa, sun upu deiki di, “Rabi kanda dan mutu bena kunkurem do?” pepra asipeteprei. 39 Upepreipa, Yesusdi tamupra, “Yarerumdi, ne bena kunkamne mutu epkamrerume,” pepu. Yesusdi upepka tep, sun cap bisi banmaiyanen, Yesus kunmau ati epreidi, atumi neitamai yumada, er cap kikiman kunmaipa, idona taru keteng jam 4 utonun kupu.

40 Uda, Yohanesdi peramu upu gekeramrei dinin, amenda taru Yesus dombanmarei neng butene dinin, tenpu ngebo er sida Anderias. Anderias, er du boda, er sida Simon Peterus kuramu. 41 Yesus cap, abutene neng cap, kikiman kunmareipa, keteng jam 4 kupupa, Anderias menmena kupu ngeda, er du bo Simon tep enmauanen, epudi, Simon tep upepu. “Ne du bo, Nimi Lyemna Deiyo Ngebo, Mesias perameng ngeboda, nun konum antapmaneme,” pepu. (Anderiasdi apu pepu ngeda, Allahdi, ‘Nimi weik lyepkamre’ tenen, wepra deiamu ngebo Kristus tep pepu.) 42 Upepudi, er du Simon dopra Yesus damai duyau. Duyaupa, Yesusdi Simon tep dipetepudi, aupu pepmemeu. “Kanda, wisi ngebo kan nai bo Yohanesdi deipkeu mi Simon kurume. Dinin, ukutaru di dipra, oryankamre taruda, Aramaik upu deiki di Kefas penkamkenge.” Yesusdi pepu. Uda, Yunani upu deiki di Kefas tep nengeda Peterus penunge. ‘Galilea.’

Yesusdi Pilipus cap, Nataniel cap tep pepu upu

43 Atumi mapmaiya berekupa, Yesusdi, ‘Galilea tara orbenkamane,’ tenepudi, tenpu ngebo er sida Pilipus tep enmauanen, epu dingeda, upepu. “Pilipuso, ne domyankamnerume. Nun kikiman benkamneme,” pepra, Pilipus tep kongpepu. 44 Uda, Pilipus perami ngeboda, er cap, Anderias cap, Peterus cap, sun yumada, mutu si Betsaida mutu nesala kurami. 45 Pilipusdi er kabo Nataniel tep, enmauanen, antapdareidi, upepu. “Natanielo, Allahdi, ‘Ukunkamrume, angeda men kunkamrume,’ peipupa, Musa sekeiamseu mem upu neitamai di, ‘Angebo yankamre,’ pepra lap pepra sekeiamseu ngeboda, nun cap konum antapmape. Tonda, Allah upu lap perami neng, sun nabi nengdi, upu sekaminge neitamai di mambul ngebo perami ngeboda, konum antapmape. Apepmaken ngeboda, ada Yusupdi deipu mi Yesus, Nasaret mutu ngebo tep pepkene,” Pilipusdi pepu.

46 Upepupa, Natanieldi upepu, “Kandi, ‘Nasaret mutu neitamai di mambul ngebo yanmaserpa antapmape,’ pepmanerem dinino, Nasaret mutuda mambul mutu pio gum tep, amutu neitamai di, pio telep keca kuptu do? Amutu neitamai di, ila mambul neng, telep neng yasetenge do?” pepra asipetepu. Upepupa, Pilipusdi tamupra, “Jo, kanda tali diryayo,” pepu.

47 Upepupa, bisi banmareipa, Yesusdi Nataniel yakanmaua epudi, er tep pepu. “Angeboda, tek sisi dumsisipu kurure. Angeboda, Israel yala ngebo kurure. Er dipruaida, mok pena cap, mawa di kuna cap, tenpunge peda men kurure,” pepu. 48 Upepupnen, Natanieldi Yesus tep pepu, “Kanda ware kuprap kael keamnetum do?” pepra asipetepu. Upepupa, Yesusdi tamupra pepu. “Gume, Pilipusdi kapul men kongpepmaker taruda, kwarang co du mouramre co kauai bukmamumai, nedi konum epmakenue.” 49 Upepupa, Natanieldi mambul kange doupra upepu. “Uo, kanda Peteremna Deiyo Ngebo, Rabi ngebo tek sisi kurume. Ne kaele, kanda Allah er Mi Sisa kurume. Kanda Israel yala nesala nun ila nimi deiyo ngebo, Raja kunkamserume,” pepu.

50 Upepupa, Yesusdi tamupra pepu. “Nedi, ‘Kwarang du mouramre co damai kauai bukmamumpa, epmakenue,’ pepmakena deiki di, konum teka tenepmanereme. Dinino, angeda yambul mambul pua. Amenda, epkamrem kecada, ila mambul weik keca dinkamrume,” pepu. 51 Upepu dingeda, Yesusdi aupu ton cap dukdongopra pepu. “Sun yuma tep, tek sisi pepsene. Sirya taruda, im deiki tara pakeiprepa, Allah er im deiki pel don nesala, malaikatda, neda Nimi Mi Sisa Utopu Ngebo, ne nong deiki kwerepmengedi, kange di ton cap welerbenkameng ngeda epkamrume.” Yesusdi aneng yuma tep pepu.